Ekri pa avoka imigrasyon ekspè ASAP yo · Mizajou nan dat
Paj sa a gen enfòmasyon sou desizyon pou mande azil ak lòt sijè jeneral. Mande azil se yon chwa pèsonèl. Li kapab yon desizyon konplike tou selon sitiyasyon ou. Anplis de sa, lwa imigrasyon ak azil yo konplèks epi yo chanje souvan. Kòm rezilta, nan anpil ka, li pral pi bon pou ou jwenn èd legal epi diskite sou detay espesifik ka ou a. Tanpri pran nòt: kèk opsyon imigrasyon diferan si ou gen mwens pase 18 an.
Desizyon pou mande azil
Enfòmasyon sou ka ak ajans imigrasyon yo
Si ou genyen azil
Lòt enfòmasyon
Kouman pou mwen voye dokiman ki gen rapò ak ka imigrasyon mwen an pa lapòs?
Èske mwen kapab ouvri yon kont bankè oswa yon kont kredi si mwen gen yon ka azil k ap tann desizyon?
Kisa azil ye?
Azil se yon fòm estati imigrasyon pou moun ki vini Ozetazini epi ki pè retounen nan peyi orijin yo. An jeneral, si ou genyen azil, gouvènman Etazini an pa kapab depòte ou.
Pou ou genyen azil, ou dwe montre tout pwen sa yo:
Yo te fè ou mal nan tan pase, oswa ou gen bon rezon pou ou kwè y ap fè ou mal nan lavni, nan peyi orijin ou.
Domaj sa a se poutèt yon karakteristik espesifik tankou ras ou, relijyon ou, nasyonalite ou, opinyon politik ou, oswa yon lòt bagay sou ou ke ou pa kapab chanje oswa ou pa ta dwe oblije chanje.
Gouvènman peyi orijin ou an pral lakòz domaj sa a, oswa gouvènman an p ap vle oswa li p ap kapab pwoteje ou kont domaj sa a.
Ou pa t ap an sekirite si ou ta deplase nan yon lòt pati nan peyi orijin ou.
Ou kapab gade videyo sa a (ki disponib nan plizyè lang) pou ou pi byen konprann kondisyon pou azil Ozetazini.
Ki moun ki kapab aplike pou azil?
An jeneral, ou kapab aplike pou azil si:
Ou andedan Etazini kounye a. Pou ou kapab aplike pou azil, ou dwe andedan Etazini nan moman w ap aplike a. Si ou pè pou yo pa fè ou mal nan peyi orijin ou men ou pa andedan Etazini, ou ka kapab aplike pou estati refijye, ki se yon pwosesis diferan. Nan tan pase, li te posib tou pou moun aplike pou azil nan fwontyè Etazini ak Meksik ak Kanada, men opsyon sa yo limite anpil kounye a epi y ap chanje rapidman.
Sa fè mwens pase yon ane depi ou te rive Ozetazini, oswa ou kalifye pou yon eksepsyon nan delè yon ane a. Pa egzanp, si ou gen yon estati legal tanporè tankou pawòl (“parole”) oswa Estati Pwoteksyon Tanporè (TPS), ou kapab aplike pou azil, menm si ou gen plis pase yon ane Ozetazini. Ou kapab aplike pou azil tou apre pawòl oswa TPS ou a ekspire. Men si ou chwazi chèche azil, li pi bon pou ou aplike pi vit posib anvan estati ou a ekspire.
Men, gouvènman Ameriken an entèdi moun jwenn azil si:
Ou te aplike pou azil Ozetazini anvan, epi yo te refize ou. Men ou ka kapab aplike ankò si gen nouvo sikonstans ki afekte dosye azil ou a.
Gouvènman Ameriken an te eseye depòte ou anvan. Si ou te resevwa yon lòd depòtasyon (removal order) nan tan pase, souvan ou pa elijib pou aplike pou azil.
Yo te ofri ou yon estati legal pèmanan nan yon lòt peyi ki pa peyi orijin ou oswa Etazini.
Ou gen sèten kalite kondanasyon kriminèl ke gouvènman Ameriken an konsidere kòm “patikilyèman grav.”
Gouvènman Ameriken an kwè ou te patisipe nan teroris oswa ou te lakòz domaj bay lòt moun poutèt ras yo, relijyon yo, nasyonalite yo, opinyon politik yo, oswa lòt karakteristik espesifik.
Si ou pa sèten si ou kapab aplike pou azil, ou ka swete jwenn yon avoka pou konprann opsyon ou yo.
Menm si ou pa kapab aplike pou azil, ou ka toujou kapab aplike pou lòt fòm pwoteksyon kont depòtasyon, tankou sispansyon depòtasyon (withholding of removal) oswa pwoteksyon anba Konvansyon Kont Torti (CAT).
Ki benefis ki posib si ou aplike pou azil?
1. Benefis prensipal lè ou aplike pou azil Ozetazini se paske ou ka rive genyen azil la finalman.
Si ou genyen azil, w ap pwoteje kont depòtasyon epi ou kapab travay legalman touswit Ozetazini. Pou plis enfòmasyon sou sa pou w konnen si ou genyen azil, klike sou lyen sa a.
Tribinal imigrasyon yo ap kontinye pran desizyon sou aplikasyon azil yo, menmsi li vin pi difisil pou moun genyen. USCIS te sispann pran desizyon sou aplikasyon azil pou moun ki soti nan 40 peyi. Lòt peyi yo pa t afekte.
2. Aplike pou azil kapab ba ou kèk pwoteksyon tou menm anvan gouvènman an pran yon desizyon sou aplikasyon azil ou a.
Si ou deja gen yon dosye nan tribinal imigrasyon, lefètke ou aplike pou azil sa ta dwe ba ou kèk pwoteksyon kont depòtasyon pandan aplikasyon azil ou a ap tann yon desizyon. Men, kounye a gouvènman an ap fèmen kèk dosye nan tribinal imigrasyon pi bonè epi y ap mete moun k ap chèche azil nan detansyon oswa y ap depòte yo anvan yo jwenn yon odyans konplè. Pou plis enfòmasyon, klike sou lyen sa a.
Si ou pa gen yon dosye nan tribinal imigrasyon, aplike pou azil nan USCIS vle di ou kapab rete Ozetazini legalman pandan dosye azil ou a ap tann yon desizyon. Men, gouvènman an kapab mete moun ki aplike pou azil nan USCIS nan detansyon tou, oswa voye dosye yo nan tribinal imigrasyon pou pwosesis depòtasyon. Pou plis enfòmasyon, klike sou lyen sa a.
3. Finalman, menm anvan gouvènman an pran yon desizyon sou aplikasyon azil ou a, ou kapab aplike pou yon pemi travay pandan aplikasyon azil ou a ap tann yon desizyon.
Ki dezavantaj ki posib si ou aplike pou azil?
1. Nan aplikasyon azil la, yo mande w pou bay anpil enfòmasyon pèsonèl, sa gen ladan l adrès ou kounye a, enfòmasyon sou manm fanmi w, ak rezon ki fè ou pè tounen nan peyi orijin ou. Chak fwa ou ranpli yon nouvo aplikasyon, w ap bay gouvènman an enfòmasyon ki ajou ke yo te ka pa genyen deja. Epitou, si kounye a ou pa gen okenn dosye imigrasyon ak gouvènman an, lè ou aplike pou azil sa fè gouvènman an konnen ou prezan Ozetazini.
2. Aplike pou azil pa anpeche yo mete w nan detansyon. Gen yon aplikasyon azil k ap tann yon desizyon swa nan USCIS oswa nan tribinal imigrasyon ka anpeche yo depòte w, men gouvènman an ta kapab toujou mete w nan detansyon.
3. Si ou pèdi dosye azil ou a, yo ta kapab depòte w.
Si ou aplike pou azil nan USCIS epi ou pa gen yon lòt estati imigrasyon, oswa si ou gen yon lòt estati ki fini, USCIS ka voye dosye w la nan tribinal imigrasyon. USCIS ka fè sa apre yon entèvyou, oswa menm san li pa ba ou yon entèvyou azil. Nan tribinal imigrasyon, ou kapab toujou goumen pou azil. Men, si yon jij imigrasyon rejte dosye w la nan tribinal, yo ta kapab depòte w nan peyi kote ou se sitwayen an oswa petèt menm nan yon twazyèm peyi.
Men, si ou deja gen yon dosye nan tribinal imigrasyon epi ou vle aplike pou azil, gouvènman an deja gen enfòmasyon sou ou epi yo kapa b depòte w si ou pèdi dosye w la. Konsa, gen mwens risk lè ou aplike pou azil nan tribinal imigrasyon si ou pè retounen nan peyi orijin ou.
4. Gen yon frè pou aplike pou azil. Kounye a, ou dwe peye $100 pou soumèt yon aplikasyon azil, ak yon lòt frè azil pou peye chak ane (annual asylum fee) apre sa pou kontinye ak dosye azil ou a. Pou plis enfòmasyon sou frè azil yo, klike sou lyen sa.
5. Ou kapa b tann yon tan ki trè long pou yon desizyon nan dosye azil ou a. Dosye azil yo kapa b pran plizyè ane swa nan USCIS oswa nan tribinal imigrasyon. Epitou, depi 28 novanm 2025, gouvènman an te sispann pran desizyon sou aplikasyon azil ki annatant nan USCIS pou moun ki soti nan 40 peyi.
6. Li vin pi difisil pou genyen azil. Gouvènman an ap fèmen anpil dosye azil byen bonè anvan moun k ap chèche azil yo jwenn tout opòtinite pou defann dosye yo. Tribinal imigrasyon yo ap fèmen anpil dosye azil san yon randevou devan jij (individual or merits hearing) konplè epi yo ap bay lòd depòtasyon (removal order). USCIS ap voye kèk dosye azil dirèkteman nan tribinal imigrasyon san yo pa menm fè entèvyou ak aplikan an. USCIS te sispann apwouve azil tou pou moun ki soti nan 40 peyi depi 28 novanm 2025. Anplis de sa, USCIS te anonse ke lefètke yon moun soti nan 40 peyi sa yo, sa pral konsidere kòm yon “faktè negatif enpòtan” nan desizyon pou anpil aplikasyon imigrasyon, tankou azil. Aprann kijan lwa azil yo ap chanje.
7. Pèdi dosye azil ou a kapa b afekte opsyon imigrasyon ou nan lavni. Si ou pèdi dosye azil ou a epi yo depòte w, sa kapa b pi difisil pou ou retounen Ozetazini nan lavni.
Epitou, li enpòtan pou ou onèt nan aplikasyon azil ou a. Si gouvènman an panse ou te bay manti sou enfòmasyon enpòtan, yo kapa b di aplikasyon azil ou a te “frivòl.” Si sa rive, gouvènman an kapa b diskalifye w nèt pou ou pa janm ka retounen Ozetazini legalman nan okenn pwosesis.
Ki lè mwen bezwen aplike pou azil?
An jeneral, ou dwe soumèt aplikasyon azil ou a (Fòm I-589) nan espas yon ane apre ou fin rive nan peyi Etazini.
Men, kèk moun ki nan sitiyasyon espesifik kapa b aplike pou azil menm apre yon ane depi yo te rive nan peyi Etazini. Pa egzanp, timoun ki gen mwens pase 18 an, moun ki gen yon lòt kalite estati imigrasyon, ak lòt moun ki nan sikonstans espesyal kapa b aplike pou azil apre yon ane. Pou plis enfòmasyon, klike sou lyen sa.
Epitou, menm si ou gen plis pase yon ane Ozetazini, ou kapa b toujou kalifye pou lòt fòm pwoteksyon anba lwa imigrasyon ameriken.
Èske mwen kapa b aplike pou azil san yon avoka?
Wi, ou kapa b ranpli aplikasyon pou azil la (Fòm I-589) epi aplike pou azil poukont ou, san yon avoka. Kontinye li pou aprann plis sou pwosesis la!
Men, li kapa b pi fasil pou w aplike pou azil avèk èd yon avoka ou fè konfyans oswa yon òganizasyon san bi likratif. Ou kapa b jwenn asistans legal isit la.
Kouman pou mwen aplike pou azil?
Pwosesis pou aplike pou azil la kapa b diferan selon sitiyasyon ou. Premyèman, li enpòtan pou w konprann si w gen yon dosye nan tribinal imigrasyon oswa non. Li isit la si ou pa sèten si ou gen yon dosye nan tribinal imigrasyon.
Si ou PA gen yon dosye nan tribinal imigrasyon, ou kapa b aplike pou azil nan Sèvis Sitwayènte ak Imigrasyon Etazini (USCIS). Aplike pou azil nan USCIS rele tou pwosesis azil “afimatif”.
Si ou GEN yon dosye nan tribinal imigrasyon, pifò moun k ap aplike pou azil dwe depoze aplikasyon azil la nan tribinal imigrasyon. Aplike pou azil nan tribinal imigrasyon rele tou pwosesis azil “defansif”. Men, gen kèk sikonstans espesyal kote moun ki gen yon dosye nan tribinal imigrasyon epi k ap chèche azil dwe voye aplikasyon azil yo bay USCIS.
Pa egzanp, si ou gen mwens pase 18 an epi w ap aplike pou azil, ou kapa b aplike pou azil nan USCIS, menm si ou gen yon dosye nan tribinal imigrasyon. Jwenn plis enfòmasyon sou fason pou w aplike pou azil antanke yon moun ki gen mwens pase 18 an isit la.
Èske mwen kapab aplike pou azil si mwen gen pawòl (“parole”) oswa TPS?
Wi. Si ou deja gen yon estati legal tanporè tankou pawòl oswa Estati Pwoteksyon Tanporè (TPS), ou kapab aplike pou azil tou. Kontrèman ak pawòl oswa TPS, si ou genyen yon ka azil sa vle di ou kapab aplike pou rezidans pèmanan (permanent residence) (yon kat rezidan pèmanan) ak sitwayènte Etazini nan lavni.
Ou kapab aplike pou azil nenpòt kilè pandan ou gen pawòl oswa TPS, menm si ou gen plis pase yon ane depi ou Ozetazini. Ou kapab aplike pou azil tou apre pawòl oswa TPS ou a ekspire. Men, si ou chwazi aplike pou azil, li pi bon pou ou aplike pi vit posib anvan estati ou a ekspire.
Èske mwen gen yon dosye nan tribinal imigrasyon?
Si ou pa sèten si ou gen yon dosye nan tribinal imigrasyon, men kèk fason ou ka chèche konnen.
Revize dokiman imigrasyon ou yo pou w wè si ou te resevwa yon Avi pou paret nan tribinal (Notice to Appear). Si ou gen yon Avi pou paret nan tribinal, sa vle di swa ou deja gen yon dosye nan tribinal imigrasyon, oswa gouvènman Ameriken an ap planifye pou kòmanse yon dosye nan tribinal imigrasyon kont ou nan lavni.Apre sa, antre nimewo alyen (A number) ou a (ki make kòm “File No.” sou Avi pou paret nan tribinal la) sou sit entènèt tribinal imigrasyon sa a oswa rele liy dirèk tribinal imigrasyon an nan 1-800-898-7180. Pou enstriksyon detaye, gade fliyè sa a sou fason pou itilize sit entènèt la epi fliyè sa a sou fason pou rele liy dirèk la. Si enfòmasyon ou yo nan sistèm nan, dosye tribinal imigrasyon ou a kòmanse. Si enfòmasyon ou yo pa nan sistèm nan, dosye tribinal imigrasyon ou a poko kòmanse. Pafwa ou ka gen yon dosye nan sistèm nan men yo make dosye a kòm konfidansyèl. Klike la a pou w li plis pou w konpare fraz egzak sistèm nan bay si ou pa gen okenn dosye nan tribinal imigrasyon ou byen si se yon dosye konfidansyèl.
Revize lòt dokiman imigrasyon ou yo pou w wè si gen youn ladan yo ki gen yon nimewo alyen. Yon nimewo alyen se yon nimewo 9 chif ofisyèl imigrasyon yo ba ou. Gen moun ki gen nimewo alyen, men gen lòt moun ki pa genyen. Si ou gen yon nimewo alyen, antre nimewo alyen ou a sou sit entènèt tribinal imigrasyon sa a oswa rele liy dirèk tribinal imigrasyon an nan 1-800-898-7180. Si enfòmasyon ou yo nan sistèm nan, sa vle di ou gen yon dosye nan tribinal imigrasyon. Si enfòmasyon ou yo pa nan sistèm nan, ou pa gen yon dosye aktif nan tribinal imigrasyon. Men, li posib pou gouvènman Ameriken an ta kòmanse yon dosye nan tribinal imigrasyon kont ou nan lavni. Ou kapab kontinye tcheke sistèm tribinal imigrasyon an chak semèn.
Konsidere lòt enfòmasyon. Ou ka gen yon dosye nan tribinal imigrasyon si youn nan sitiyasyon sa yo konsène ou:
Imigrasyon te detni ou lè ou te antre Ozetazini nan fwontyè Meksik ak Etazini.
Imigrasyon te detni ou nan yon moman apre ou te fin antre Ozetazini.
Gouvènman an te di ou pou w prezante tèt ou nan biwo ICE apre ou te rive Ozetazini.
Ou te fè demann pou yon estati imigrasyon nan USCIS, tankou azil, epi USCIS pa t ba ou azil.
Anvan sa, ou te gen yon fòm estati imigrasyon, tankou pawol (“parole”) oswa Estati Pwoteksyon Tanporè (TPS), ki ekspire kounye a.Si youn nan sitiyasyon sa yo konsène ou, revize dokiman ou yo epi siveye lapòs ou pou w wè si w resevwa yon Avi pou paret nan tribinal. Yon Avi pou paret nan tribinal vle di gouvènman an ap kòmanse yon dosye nan tribinal imigrasyon kont ou. Si Avi pou paret nan tribinal ou a bay yon dat tribinal men sit entènèt tribinal la oswa 1-800-898-7180 di ou pa gen okenn dosye nan tribinal imigrasyon, kontakte tribinal imigrasyon sa a dirèkteman pou konfime randevou ou.
Si ou toujou pa sèten si ou gen yon dosye nan tribinal imigrasyon, ou ka vle chèche yon avoka pou ede w konprann sitiyasyon dosye w la.
Ki diferans ki genyen ant CBP, ICE, USCIS, ak Tribinal Imigrasyon?
Gouvènman ameriken an gen plizyè ajans imigrasyon. Chak ajans responsab pou yon pati diferan nan sistèm imigrasyon an. Ajans sa yo gen ladan yo: Ladwann ak Pwoteksyon Fwontyè (CBP), Imigrasyon ak Ranfòsman Ladwann (ICE), Sèvis Sitwayènte ak Imigrasyon Etazini (USCIS), ak Tribinal Imigrasyon (yo rele tou Biwo Egzekitif pou Revizyon Imigrasyon oswa EOIR).
Si ou vle pouswiv dosye azil ou a, li trè enpòtan pou ou ale nan TOUT randevou ak odyans ki pwograme pou ou yo. Si ou deplase, ou kapab mete adrès ou ajou nan chak ajans sa yo separeman. Diferan ajans yo pa di youn lòt lè yon moun deplase, donk ou bezwen mete enfòmasyon yo ajou nan chak ajans separeman.
CBP se ajans gouvènman ki fè respekte lwa imigrasyon nan fwontyè, pò, ak ayewopò yo. Yo fè yon premye detèminasyon sou ki moun ki ka antre Ozetazini ak ki moun ki pa kapab. Yo kapab arete ak detni moun toupre fwontyè a tou.
ICE se ajans gouvènman ki fè respekte lwa imigrasyon anndan peyi Etazini. Yo kapab detni moun yo panse ki vyole lwa imigrasyon yo. Gen kèk moun ki gen randevou pou prezante nan yon biwo ICE regilyèman. Randevou sa yo konn fèt pafwa ak konpayi prive k ap travay pou ICE, atravè yon pwogram yo rele “ISAP.”
USCIS se ajans gouvènman ki trete anpil aplikasyon imigrasyon. Si ou pa gen yon dosye nan tribinal imigrasyon, ou kapab apliké pou azil nan USCIS. Kit ou gen yon dosye nan tribinal imigrasyon oswa ou pa genyen, USCIS se kote pou ou ale pou randevou byometrik (biometrics appointment) ou (kote yo pran anprent dwèt ou). USCIS trete aplikasyon pou pemi travay, rezidans pèmanan (kat rezidan pèmanan), sitwayènte ameriken, ak lòt ankò.
Tribinal imigrasyon se ajans gouvènman ki deside si sèten imigran ka rete Ozetazini. Si ou aplike pou azil nan tribinal imigrasyon, yon jij imigrasyon ap deside sou dosye w la. Yon dosye nan tribinal imigrasyon rele tou “pwosedi tribinal imigrasyon,” “pwosedi ranvwa,” “pwosedi depòtasyon” oswa “EOIR.” Si yon jij imigrasyon refize ba ou azil, ou kapab fè apèl nan nivo ki pi wo nan sistèm tribinal imigrasyon an, yo rele Komisyon Apèl Imigrasyon (BIA).
Kouman pou mwen tcheke estati dosye mwen an?
Pou konnen estati dosye w la, dabò ou bezwen konnen nan ki ajans imigrasyon pou w tcheke. Gen kèk moun k ap chèche azil ki gen yon dosye nan tribinal imigrasyon. Gen lòt moun k ap chèche azil ki pa gen dosye nan tribinal imigrasyon, epi yo aplike pou azil nan USCIS. Kit dosye azil ou a nan tribinal imigrasyon oswa nan USCIS, se nan USCIS w ap soumèt aplikasyon pou pemi travay ou a epi se yo k ap trete l.
Tribinal Imigrasyon
Rele liy dirèk tribinal imigrasyon an nan 1-800-898-7180 epi ale sou sit entènèt tribinal sa a pou w konnen dat pwochen odyans ou a ak lòt enfòmasyon.
W ap bezwen antre nimewo alyen (A number) ou.
Sou sit entènèt la, w ap bezwen antre peyi kote w soti a tou (“Nationality”).
Li enfòmasyon sou sa diferan mesaj ki nan sistèm nan vle di.
Tcheke estati dosye w la chak semèn si ou kapab. Nan ane 2026, gouvènman an ap pwograme epi ap chanje dat odyans nan tribinal imigrasyon yo ak yon avi ki trè kout.
Li enfòmasyon sou kijan pou w prepare w pou premye randevou w nan tribinal (master calendar hearing) ak randevou devan jij (individual or merits hearing).
Peye frè azil pou peye chak ane a. Sistèm tribinal imigrasyon an PAP di w si frè azil pou peye chak ane (annual asylum fee) ou a dwe peye – men si ou te aplike pou azil depi plis pase yon ane, ou kapab peye frè a nenpòt lè.
USCIS
Tcheke estati dosye azil ou sou paj entènèt USCIS sa a.
Ou pral bezwen antre nimewo lèt resi w la, ou ka jwenn li anwo sou bò gòch nan lèt USCIS voye ba ou pou fè w konnen yo te resevwa aplikasyon w lan (receipt notice).
Li enfòmasyon sou sa mesaj diferan yo vle di nan sistèm nan.
Tcheke kont ou sou entènèt. Si ou te soumèt aplikasyon azil ou bay USCIS sou entènèt, ou ka konekte tou nan kont USCIS ou pou tcheke estati w epi jwenn dokiman tankou lèt resi w la.
Tcheke si ou dwe peye frè azil anyèl la. Ou ka tcheke si ou dwe peye frè azil pou peye chak ane (annual asylum fee) sou paj entènèt USCIS sa a.
Pemi Travay
Tcheke estati aplikasyon pemi travay ou sou paj entènèt USCIS sa a.
Ou pral bezwen antre nimewo lèt resi w la, ou ka jwenn li anwo sou bò gòch nan lèt resi pemi travay ou.
Jwenn enfòmasyon sou tan tretman yo. Kounye a, USCIS pral bay yon estimasyon sou ki lè ou ta dwe resevwa yon desizyon sou aplikasyon pemi travay ou.
Vizite kont USCIS ou sou entènèt epi klike sou onglet “myProgress” la. (Remak: tan yo estime a ka pa egzak).
Si ou bezwen kreye yon kont sou entènèt, pou plis enfòmasyon sou fason pou w fè sa, klike sou lyen sa a.
Kisa nimewo alyen (A number) mwen an ye?
Yon nimewo alyen se yon nimewo idantifikasyon inik gouvènman Ameriken an bay moun ki pa sitwayen lè yo an kontak ak sistèm imigrasyon an. Yon nimewo alyen anjeneral gen 9 chif epi li rete menm jan an pou tout aplikasyon oswa dosye imigrasyon ou yo.
Nenpòt moun ki pa sitwayen ki te janm soumèt yon aplikasyon imigrasyon bay gouvènman Ameriken an, oswa ki te arete oswa detni pa yon ajans imigrasyon Ameriken, ta dwe gen yon nimewo alyen. Ou ka jwenn nimewo alyen ou nan dokiman imigrasyon ou yo, tankou yon lèt resi aplikasyon azil, yon lèt resi pemi travay, yon Avi pou paret nan tribinal (Notice to Appear) ki soti nan tribinal imigrasyon, oswa yon rejis Randevou pou prezante nan yon biwo ICE (ICE check-in). Yo ka rele nimewo alyen ou tou “alien number,” “alien registration number,” oswa "file number."
E si mwen pa ka jwenn nimewo alyen mwen an?
Si ou pèdi tout dokiman imigrasyon ou yo, ou ka mande gouvènman an pou li voye yon kopi yo ba ou. Ou ka li enfòmasyon sou fason pou mande dokiman nan men USCIS. Ou ka li enfòmasyon sou fason pou mande dokiman nan men tribinal imigrasyon an. Tanpri pran nòt pwosesis sa a ka pran anpil tan.
Si ou pa janm an kontak ak yon ajans imigrasyon, li posib pou ou pa gen yon nimewo alyen ankò. Pa egzanp, ou ka pa gen yon nimewo alyen si yo pa t janm detni w, si ou pa t soumèt okenn aplikasyon imigrasyon, epi si ou pa gen yon dosye nan tribinal imigrasyon. Anplis de sa, si yo te lage w nan fwontyè a avèk yon Avi pou prezante tet ou (Notice to Report), ou ka pa gen yon nimewo alyen ankò.
Yon fwa ou kòmanse yon aplikasyon imigrasyon ak gouvènman Ameriken an, tankou yon aplikasyon azil, yo ta dwe ba ou yon nimewo alyen.
Kisa dokiman sa a mwen resevwa nan men gouvènman an ye?
Tanpri voye yon je sou egzanp dokiman sa yo pou w wè si youn ladan yo koresponn ak sa ou te resevwa nan men gouvènman an. Ou kapa b tou eseye sèvi ak Google Translate pou tradui tèks la soti nan lang Angle pou ale nan yon lòt lang.
Kisa mwen ta dwe konnen si mwen genyen azil?
Si USCIS oswa yon tribinal imigrasyon akòde ou azil, felisitasyon dèske ou genyen azil!
Benefis imedyat
Lè ou genyen azil, ou pwoteje kont depòtasyon ak detasyon, epi ou ka viv epi travay nenpòt kote nan peyi Etazini.
Apre ou fin genyen azil, ou ka travay legalman imedyatman, menm san yon pemi travay. Pou plis enfòmasyon, klike sou lyen sa a.
Ou ka gen aksè a kèk benefis piblik ak asistans ou pa t gen aksè a anvan ou te genyen azil. Ou ka jwenn òganizasyon pou ede w sou paj entènèt gouvènman sa a.
Remak: gouvènman an di yo ka revize apwobasyon imigrasyon moun ki soti nan kèk peyi ki te rive Ozetazini nan dat 20 janvye 2021 oswa apre sa te genyen, epi yo ta ka anile apwobasyon sa yo. Nou poko gen detay sou sa k pral rive. Rete enfòme sou fason lwa yo ap chanje.
Manm fanmi yo
Si konjwen ou ak pitit ou yo te enkli nan aplikasyon azil ou a kòm derivatif, yo te resevwa estati azil (asylee status) anmenmtan avèk ou tou.
Si konjwen ou ak pitit ki kalifye yo pa t enkli okòmansman nan aplikasyon azil ou a kòm derivatif, ou ka kapab mande azil pou yo tou, menm si yo andeyò peyi Etazini oswa si y ap viv Ozetazini san estati legal. Pitit ou yo pa dwe marye kounye a, epi yo dwe te gen mwens pase 21 an lè ou te soumèt aplikasyon w pou azil la. Pou kòmanse pwosesis sa a, ou ka ranpli Fòm I-730 gratis, nan yon delè 2 an apre yo fin akòde w azil.
Men, gouvènman Ameriken an sispann trete Fòm I-730 pou moun ki soti nan 40 peyi. Genyen tou rapò ki fè konnen menm si Fòm I-730 ou a te deja apwouve, manm fanmi ki soti nan 40 peyi sa yo pa kapab konplete dènye etap yo nan yon konsila Ameriken pou yo vwayaje Ozetazini.
Rezidans pèmanan (kat rezidan pèmanan)
Apre ou fin genyen azil, ou ka chwazi aplike pou w vin yon rezidan pèmanan (permanent residence) (moun ki gen kat rezidan pèmanan) nenpòt ki lè.
Si yo akòde w ajisteman estati (adjustment of status), ou ka chwazi aplike pou sitwayènte Ameriken kèk ane apre.
Men, USCIS sispann trete prèske tout aplikasyon imigrasyon moun ki soti nan kèk peyi te soumèt. Poz sa a gen ladan aplikasyon pou rezidans pèmanan ak aplikasyon pou sitwayènte Ameriken. Ou ka toujou soumèt yon aplikasyon, men USCIS ka pa pran yon desizyon sou aplikasyon an.
Gouvènman an ap revize ka rezidan pèmanan yo tou pou yon posib depòtasyon si yo te arete yo oswa si yo te kondane yo pou sèten krim, oswa si gouvènman an sispèk yo nan fwod. Pou plis enfòmasyon, klike sou lyen sa a.
Vwayaje andeyò Etazini
Ou kapa b mande gouvènman an pèmisyon pou vwayaje andeyò Etazini epi retounen Ozetazini, men gen risk pou konsidere lè w ap vwayaje andeyò Etazini.
Èske mwen kapa b aplike pou yon kat rezidan pèmanan (rezidans pèmanan) apre mwen fin genyen azil?
Wi. Ou kapa b aplike pou rezidans pèmanan nenpòt ki lè apre ou fin genyen azil. Ou kapa b fè sa lè ou soumèt yon aplikasyon Fòm I-485 bay USCIS.
Konbyen tan pwosesis la ap pran?
Ou kapa b aplike imedyatman apre ou fin genyen azil. Men USCIS pa kapa b apwouve rezidans pèmanan jiskaske omwen yon ane pase apre ou fin genyen azil, epi sa pral gen plis chans pran plis tan.
Malerezman, USCIS te sispann trete aplikasyon kat rezidan pèmanan pou moun ki soti nan 40 peyi.
Si ou pa soti nan youn nan 40 peyi sa yo, ou kapa b tcheke tan tretman "nòmal" yo sou paj USCIS sa a. Men sa kapa b pran plis tan. Yo rapòte ke USCIS ap mete anpil dosye kat rezidan pèmanan an datant akòz tcheke sekirite (security checks) ki ogmante, sa ki pral lakòz plis reta.
Èske mwen bezwen soumèt yon Afidavit Sipò (Affidavit of Support)?
Si ou ranpli Fòm I-485 pou aplike pou Rezidans Pèmanan apre ou fin genyen azil, ou pa obligatwa pou ranpli fòm adisyonèl yo rele Afidavit Sipò (Fòm I-864). Sou Fòm I-485, apre ou fin koche "Asylum Status" epi bay dat yo te ba ou azil la nan tèt Paj 7 la, ou kapa b:
Koche Kaz 1.e. nan Pati 3 nan paj 8 pou deklare ke ou pa obligatwa pou ranpli yon Afidavit Sipò, epi
Koche kaz pou "Asylee" pou Kesyon 56 nan Pati 9 nan paj 18 fòm nan. Ou kapa b sote Kesyon 57-66 nan paj 19-20.
(Enfòmasyon sa a se pou edisyon 01/20/2025 Fòm I-485 la. Ou ta dwe telechaje fòm nan dirèkteman nan paj entènèt an USCIS sa a pou asire w ke w ap jwenn dènye vèsyon fòm nan.)
Ou kapa b jwenn plis enfòmasyon sou fason pou aplike pou rezidans pèmanan apre ou fin genyen azil sou sit entènèt USCIS sa a. Ou kapa b aprann tou sou fason pou aplike pou yon pemi travay apre ou fin genyen azil.
Kisa k ap pase apre mwen fin vin yon rezidan pèmanan (permanent residence)?
Si yo ba ou rezidans pèmanan, ou kapa b chwazi aplike pou sitwayènte ameriken kèk ane apre. Aprann sou fason pou aplike pou sitwayènte. Si ou pa vle aplike pou sitwayènte ameriken, ou kapa b kontinye renouvle kat rezidan pèmanan ou an.
Pifò rezidan pèmanan konsève estati rezidans pèmanan yo oswa yo vin sitwayen ameriken san okenn pwoblèm. Men, sa pa gen lontan, gouvènman ameriken an anonse y ap revize kèk apwobasyon yo te bay nan tan pase nan kèk ka:
Gouvènman an di yo kapa b revize ansyen apwobasyon imigrasyon moun ki soti nan 40 peyi sa yo ki te rive Ozetazini nan dat 20 janvye 2021 oswa apre sa te genyen, epi yo ta kapa b anile ansyen apwobasyon sa yo. Men, nan dat 5 jen 2026, yon tribinal te pase lòd pou USCIS sispann politik sa a. Men, gouvènman an fè apèl kont desizyon tribinal la, epi nou pa konnen kisa rezilta final la pral ye.
Gouvènman an ap revize tou ka kèk rezidan pèmanan si yo te arete yo oswa si yo te kondane yo pou sèten krim, oswa si gouvènman an sispèk yo nan fwod. Pou plis enfòmasyon, klike sou lyen sa.
Kijan pou mwen voye dokiman ki gen rapò ak dosye imigrasyon mwen an pa lapòs?
Ou kapa b gade videyo sa a pou w aprann kijan pou w voye dokiman w yo pa lapòs. Ou gen kèk opsyon diferan pou w voye dokiman ki gen rapò ak dosye imigrasyon w lan pa lapòs:
Premyèman, ou ka chwazi voye kourye a nan United States Postal Service (USPS), moun konnen sou non biwo lapòs. Se gouvènman ameriken an ki jere USPS. Yo ofri plizyè kalite sèvis livrezon ak swivi (tracking), tankou Priority Mail ak Priority Mail Express. Yo ofri tou Regular Mail men li pa gen swivi. Pou w jwenn yon biwo lapòs toupre w, ale sou paj entènèt an sa a epi antre vil ak eta kote w ye a. Pou “Location Type,” chwazi “Post Office.”
Oubyen, ou ka chwazi voye kourye a ak yon konpayi prive tankou FedEx oswa UPS. Konpayi prive yo anjeneral pi chè pase biwo lapòs la, men souvan yo ka garanti yon tan livrezon ki pi rapid.
Kèlkeswa opsyon ou chwazi a, gen kèk pwen enpòtan pou w kenbe nan tèt ou:
Li enpòtan pou w gen yon fason pou w swiv kourye w la epi pou w gen prèv livrezon! Pifò opsyon livrezon yo, eksepte Regular Mail nan biwo lapòs la, ta dwe pèmèt ou swiv kourye w la. Asire w ou kenbe nimewo swivi a (ki anjeneral sou resi a) yon kote ki an sekirite. Yon fason ou ka fè sa se pran yon foto nimewo swivi a ak telefòn ou.
Si yo ba w yon opsyon pou moun k ap resevwa a siyen lè yo resevwa pakè a, pa chwazi opsyon sa a! USCIS ak tribinal imigrasyon yo pa gen anplwaye ki disponib pou siyen pou dokiman yo. Sa vle di dokiman w yo ka pa rive si w chwazi opsyon sa a.
Asire w w ap voye dokiman w yo nan adrès ki kòrèk la. Pafwa USCIS sèvi ak yon adrès pou USPS, ak yon adrès diferan pou konpayi prive tankou UPS ak FedEx.
Ou ka kalifye tou pou depoze aplikasyon azil ou sou entènèt nan sèten sitiyasyon, oswa pou depoze aplikasyon pou yon pemi travay sou entènèt baze sou azil.
Kijan mwen ka evite magouy nan imigrasyon?
Malerezman, magouy oswa fwod nan imigrasyon kouran anpil Ozetazini. Pafwa li difisil pou konnen kisa ki yon sèvis lejitim ak kisa ki yon magouy. Pa peye lajan oswa bay enfòmasyon pèsonèl ou jiskaske ou sèten nèt! Li pòs sa a pou w jwenn konsèy sou kijan pou w evite magouy nan imigrasyon.
Kisa pou m fè si m pa satisfè ak avoka mwen an?
Si ou pa satisfè ak avoka ou a, ou kapab aprann sou etap posib ou ka pran yo anba a.
1. Ou kapab mande yon dezyèm opinyon.
Ou kapab mande yon lòt avoka opinyon li. Ou kapab chèche asistans legal isit la, sa gen ladan l èd legal gratis ak sa ki pa koute chè, ansanm ak avoka prive ki mande frè.
Si yon avoka di li pa kapab ede w, ou kapab mande l si li gen rekòmandasyon pou lòt avoka serye nan zòn ou an. Gen kèk biwo ki pran sèlman sèten kalite ka, donk sa kapab itil pou w rele plizyè biwo.
Ou kapab tou jwenn enfòmasyon sou pwosesis azil la isit la.
2. Ou kapab pran dokiman w yo nan men avoka w la.
Ou gen dwa pou w gen yon kopi nenpòt kontra alekri pou sèvis avoka a.
Ou gen dwa pou w gen yon kopi konplè tout dokiman ki nan dosye w la, eksepte nòt pèsonèl avoka a. Avoka a kapab mande yon frè rezonab pou l bay kopi sa a, men li pa kapab refize ba ou li.
Ou gen dwa pou w gen tout dokiman orijinal ou yo, tankou paspò oswa batistè.
Ou gen dwa tou pou konfidansyalite. Avoka w la pa kapab pataje dokiman w yo oswa enfòmasyon ou ba li ak gouvènman an oswa ak lòt moun san pèmisyon w.
3. Ou kapab mande avoka w la enfòmasyon sou dosye w la, pou ede w pran desizyon.
Ou gen dwa pou avoka w la kominike avèk ou. Si w poze kesyon, li dwe ba w enfòmasyon sou dosye w la nan yon tan ki rezonab.
Si pèsonn pa reponn lè w rele biwo avoka w la, ou kapab kite yon mesaj vokal ak non w ak nimewo telefòn ou. Epi ou kapab kontinye eseye! Ou kapab eseye ale nan biwo avoka w la tou an pèsòn pandan lè travay.
Ou gen dwa pou w pran tout desizyon enpòtan nan dosye w la. Avoka w la ta dwe konseye w sou sa li panse ki pi bon ak poukisa. Men, ou gen dwa pou w pran desizyon final yo.
4. Si w deside ou pa vle kontinye travay ak avoka w la, ou kapab revoke li.
Si w deside ou pa vle kontinye travay ak avoka w genyen kounye a, ou gen dwa pou w revoke li.
Si avoka a pa t fè tout travay ou te peye l pou l fè a, lalwa kapab egzije l pou l rann ou lajan w. Si w gen yon kontra alekri, ou kapab revize l epi konpare sa yo te pwomèt ou ak sa yo te fè tout bon vre.
5. Si w te gen yon pwoblèm grav ak avoka w la, ou kapab depoze yon plent.
Pou w chèche konnen kijan pou w depoze yon plent kont yon avoka nan eta kote w ye a, ale sou Google epi tape “lawyer complaint in [non eta w la]”.
Si w te viktim yon magouy oswa yon fwod nan zafè imigrasyon, aprann sou pwochen etap yo.
Kisa mwen kapa b fè si gouvènman Ameriken an te fè m mal?
Si gouvènman Ameriken an te fè w mal, nou vrèman dezole. Li ka posib pou w pousuiv gouvènman an lajistis lè w sèvi ak yon lwa yo rele Lwa Federal sou Reklamasyon pou Domaj (FTCA). Aprann plis sou fason pou w depoze yon reklamasyon anba FTCA.
Èske mwen kapa b ouvri yon kont labank oswa yon kont kredi si mwen gen yon dosye azil ki annatant?
Wi, ou kapa b ouvri kont labank ak kont kredi si ou gen yon dosye azil ki annatant. Jwenn plis enfòmasyon sou dokiman ou kapa b itilize pou ouvri yon kont labank isit la ak isit la.
Tanpri pran nòt: Li posib pou kèk règleman sou kont labank chanje nan lavni — pa egzanp, règleman sou ki kalite idantifikasyon ki nesesè pou ouvri yon kont. Nan mwa me 2026, gouvènman an te bay ajans yo enstriksyon pou yo pwopoze direktiv ki ajou nan 2 a 6 mwa k ap vini yo. N ap mete paj sa a ajou amezir n ap jwenn plis enfòmasyon.
Kisa “enregristreman” an ye?
Gouvènman Ameriken an te kreye yon nouvo règleman ki mande pou imigran yo “anrejistre” nan USCIS. Règleman sa a te antre an vigè nan dat 11 avril 2025. Kesyon pou konnen si yon imigran bezwen soumèt yon fòm anrejistreman an konplike anpil. Yo konsidere anpil imigran kòm moun ki deja anrejistre, donk yo pa bezwen anrejistre ankò.
Men kèk nan imigran gouvènman an di ki PA bezwen soumèt yon fòm anrejistreman, paske yo deja anrejistre:
Pemi travay: Moun ki te janm resevwa yon pemi travay, menmsi pemi travay la ekspire.
Fòm I-94: Moun ki te janm resevwa Fòm I-94 (gade egzanp yo isit la, isit la, ak isit la).
Pawòl: Moun ki te janm resevwa pawòl (“parole”), menmsi pawòl yo a ekspire.
Tribinal imigrasyon: Moun ki te janm gen yon dosye nan tribinal imigrasyon.
Sa gen ladan l moun ki te janm resevwa yon Avi pou paret nan tribinal (Notice to Appear) menmsi yo poko janm pwograme yo pou yon randevou nan tribinal imigrasyon.
Sa gen ladan l tou moun ki te resevwa yon Avi sou Randevou menmsi yo poko janm ale nan yon randevou nan tribinal imigrasyon.
Epi sa gen ladan l moun ki te gen yon dosye nan tribinal imigrasyon nan tan lontan, menmsi yo te resevwa yon desizyon final oswa si yo te anile dosye yo a.
Viza: Moun ki te antre Ozetazini ak yon viza, menmsi viza a ekspire. Sa gen ladan l tou moun ki te aplike pou yon viza lè yo te ranpli Fòm DS-160 oswa Fòm DS-260 depi anndan oswa deyò Ozetazini.
Rezidans pèmanan: Moun ki se rezidan pèmanan (lawful permanent resident) (moun ki gen kat rezidan pèmanan). Epitou moun ki te soumèt Fòm I-485 pou aplike pou yo vin yon rezidan pèmanan epi ki te gen yon randevou byometrik (biometrics appointment) (anprent).
Kat pou travèse fwontyè: Moun ki gen yon kat pou travèse fwontyè (pou sèten sitwayen Meksik ak Kanada).
Fòm ki pa kouran: Moun ki te ranpli oswa ki te resevwa fòm sa yo ki pa kouran ditou: I-67, I-95, I-181, I-184, I-185, I-221, I-221S, I-590, I-687, I-691, I-698, I-700, oswa I-817.
Sa a se pa yon lis konplè imigran ki deja anrejistre yo. Ou kapa b jwenn plis enfòmasyon sou paj entènèt an USCIS sa a, ki gen ladan l yon zouti ki fèt pou ede moun konprann si yo deja anrejistre. Men, tanpri pran nòt ke zouti sa a poze kesyon ki difisil pou moun konprann ak pou yo reponn kòrèkteman.
Pou imigran ki pa t ko anrejistre, fòm anrejistreman an mande adrès ou, ak enfòmasyon detaye sou ou menm ak fanmi ou. Apre ou fin anrejistre, gouvènman an ka planifye yon randevou byometrik (biometrics appointment) pou pran anprent dwèt ou, foto ou, ak siyati ou.
Gouvènman an fè konnen yo ta kapab itilize enfòmasyon pèsonèl ou bay pandan pwosesis anrejistreman an pou yo jwenn, detni, epi depòte moun ki pa gen okenn estati imigrasyon. Men, gouvènman an fè konnen tou si yon moun pa anrejistre, sa ka rann li pi difisil pou li jwenn yon estati imigrasyon alavni, epi gouvènman an te deja pouswiv yon ti kantite moun pou krim kòmkwa yo te fè espre yo pa anrejistre.
Si ou pa sèten si ou deja anrejistre, oswa ou pa sèten kisa pou ou fè, ou kapab chèche yon avoka imigrasyon. Ou kapab chèche asistans legal nan zòn kote ou ye a, sa enkli òganizasyon san bi likratif ki gen avoka gratis oswa ki pa koute chè. Ou kapab li tou sou mezi sekirite.
ASAP (Pwojè ki an Defans pou Moun k ap Chèche Azil) gen kòm objektif pou bay enfòmasyon ki baze sou reyalite konsènan lwa imigrasyon aktyèl yo. Enfòmasyon sa yo se pa konsèy legal.
Tout kontni legal yo ekri epi revize legalman pa ekip avoka ekspè nan imigrasyon ASAP yo. Avoka ekspè ASAP yo gen plizyè dizèn ane eksperyans nan lwa imigrasyon ak nan litij. Ansanm, yo genyen plizyè santèn ka. Avoka nou yo admèt nan Bawo nan plizyè eta Ozetazini, yo gen diplòm nan dwa nan inivèsite tankou Harvard, Yale, ak UCLA, epi yo genyen plizyè prim pou travay legal yo.