Ekri pa avoka imigrasyon ekspè ASAP yo · Mizajou nan dat
Malerezman, magouy nan zafè imigrasyon kouran anpil Ozetazini. Pafwa li difisil pou konnen kisa ki yon sèvis lejitim ak kisa ki yon magouy. Pa peye lajan ni bay enfòmasyon pèsonèl ou toutotan ou pa sèten nèt! Si ou peye yon moun epi apre sa ou dekouvri se te yon magouy, li difisil pou ou jwenn lajan w lan ankò.
Si ou pa sèten si yon moun ap fè magouy sou ou, eseye mande yon lòt moun opinyon li. Ou kapab chèche avoka imigrasyon isit la. Si ou se yon manm ASAP ki enkyete paske ou panse yon moun ap eseye fè magouy sou ou, ou kapab voye yon imèl tou ak yon kesyon bay ASAP nan [email protected] epi mete nimewo idantifikasyon manm ASAP ou a.
Tanpri kontinye li pou jwenn enfòmasyon sou fason pou evite magouy nan zafè imigrasyon.
Pran prekosyon ak fo dokiman, fo sit entènèt, ak fo kominikasyon!
Fo dokiman: Pafwa, moun k ap fè magouy yo ap voye yon dokiman ba ou ki sanble li soti nan gouvènman ameriken an men an reyalite li se yon fo. Li souvan difisil pou di si dokiman an lejitim oswa si li pa lejitim. Si ou pa sèten si yon dokiman se toutbon, pa peye lajan!
Moun k ap fè magouy yo souvan fè fo dokiman sa yo sanble anpil ak dokiman reyèl. Men yon egzanp ak yon lòt egzanp fo dokiman. Fo dokiman yo pafwa gen erè òtograf ak enfòmasyon ki pa kòrèk, epi yo ka pa sanble ak dokiman ofisyèl gouvènman an. Ou kapab wè egzanp sou fason dokiman reyèl yo ye sou paj Modèl Dokiman ASAP la.
Si ou se yon manm ASAP, ou kapab voye foto dokiman yo tou pa imèl bay ASAP nan [email protected] epi mande ekip avoka nou an si yo panse yo se toutbon.
Si yon moun voye yon avi ba ou ki di li soti nan Sèvis Sitwayènte ak Imigrasyon Etazini (USCIS), ou kapab kontakte USCIS dirèkteman tou pou konnen si li se toutbon.
Si dokiman an gen yon nimewo resi, ou kapab antre nimewo resi a sou sit entènèt USCIS sa a.
Si pa gen nimewo resi, ou kapab rele USCIS nan 1-800-375-5283. Lè yo mande w pou eksplike pou kisa w ap rele, pafwa lè w di “InfoPass” sa kapab ede w pale ak yon moun an dirèk.
Fo sit entènèt: Pran prekosyon ak fo sit entènèt ki sanble ak sit entènèt ofisyèl gouvènman ameriken an. Tout sit entènèt ofisyèl gouvènman ameriken yo fini ak .gov, pa egzanp, https://www.uscis.gov/. Anvan ou antre enfòmasyon ou oswa anvan ou fè yon peman sou yon sit entènèt, tcheke bwat adrès la pou konfime li fini ak .gov. Si yon sit entènèt fini ak .com, .net, .org, oswa nenpòt lòt bagay, li pa yon sit entènèt ofisyèl gouvènman an.
Fo apèl ak fo tèks: Moun k ap fè magouy yo konn rele w oswa voye tèks ba ou tou nan telefòn oswa sou WhatsApp epi yo pran pòz yo soti nan yon ajans gouvènman. An jeneral, ajans gouvènman reyèl yo pa rele w ni voye tèks ba ou pou mande peman imedyat. Si ou resevwa yon apèl oswa yon tèks konsa, ou kapab fèmen telefòn lan oswa pa reponn. Apre sa, ou kapab rele ajans lan dirèkteman pou tcheke si se te toutbon. Jwenn enfòmasyon sou fason pou kontakte USCIS, ICE, tribinal imigrasyon an, ak biwo azil la.
Epitou, fè atansyon si y ap di w ou kapab parèt a distans pou yon entèvyou USCIS oswa parèt nan yon odyans nan tribinal imigrasyon pa Zoom (randevou pa videyo nan tribinal imigrasyon fèt atravè yon aplikasyon ki rele Webex). Ou kapab konfime enfòmasyon sou entèvyou oswa enfòmasyon sou odyans sou sit entènèt ofisyèl gouvènman yo.
Gen kèk kwasè tou ki pretann yo travay pou òganizasyon san bi likratif ki lejitim oswa pou kabinè avoka. Li plis anba a.
Li plis enfòmasyon sou magouy nan zafè imigrasyon sou paj entènèt an USCIS sa a. Li enfòmasyon sou mezi sekirite ak lòt enfòmasyon pou moun k ap chèche azil.
Pran prekosyon ak moun k ap pretann yo se avoka oswa reprezantan akredite.
Se sèlman avoka ki gen lisans ak anplwaye nan kèk òganizasyon san bi likratif espesifik ki ka bay sèvis legal nan zafè imigrasyon Ozetazini. Ozetazini, yon notè piblik pa yon avoka.
Si yon moun di li se yon avoka, ou kapa b mande l nimewo lisans avoka li (yo rele nimewo baro) ak nan ki eta li gen lisans lan. Apre sa, tcheke si li se yon avoka ki gen lisans tout bon vre. Ou ka fè rechèch sou entènèt: “attorney directory in [non eta sa a].” Apre sa, chèche non li oswa antre nimewo a sou sit entènèt sa a pou konfime si moun nan gen lisans tout bon vre.
Nan kèk ka, gen moun ki ka pretann yo se yon vrè avoka ak yon vrè nimewo baro, men enfòmasyon pou kontakte yo a diferan. Si ou pa t janm rankontre avoka sa a an pèsòn, ou ka chèche non li oswa biwo avoka li sou Google pou w wè sit entènèt li. Apre sa, rele nimewo ki sou sit entènèt li a dirèkteman pou w konfime si se li menm w ap pale avè l la.
Nan kèk òganizasyon san bi likratif, moun yo rele “reprezantan akredite DOJ” yo gen dwa bay sèvis legal nan zafè imigrasyon tou. Ou ka tcheke si yon moun se yon reprezantan akredite DOJ sou sit entènèt gouvènman sa a.
Gen kèk kwasè tou ki pretann yo travay pou òganizasyon san bi likratif ki lejitim oswa pou kabinè avoka ki ede imigran. Nan ane 2026, nou wè kwasè k ap pretann manti yo soti nan biwo Catholic Charities, pa egzanp.
Si yon moun kontakte w epi li pretann li soti nan yon òganizasyon san bi likratif oswa nan yon kabinè avoka epi li ofri w èd nan dosye imigrasyon w lan, ou ka chèche òganizasyon oswa kabinè avoka sa a sou Google. Ou ka chèche enfòmasyon tou pou kontakte òganizasyon san bi likratif yo sou sit entènèt serye sa a. Apre sa, kontakte biwo a dirèkteman pou w mande pale ak moun sa a, epi mande si yo te kontakte w. Si biwo a di moun sa a pa travay la, se pwobableman yon magouy.
Si yon moun ofri w sèvis imigrasyon men ou pa t janm kontakte l anvan, fè atansyon!
An jeneral, avoka imigrasyon ki serye pa kontakte kliyan potansyèl yo dirèkteman, sof si se ou ki kontakte yo an premye epi mande yon randevou. Si yon moun kontakte w an premye epi li ofri w sèvis imigrasyon, se pwobableman yon magouy.
Sa ka gen ladan moun k ap pretann yo travay pou òganizasyon san bi likratif oswa pou kabinè avoka prive.
Si yon moun pwomèt ou yon estati imigrasyon rapid ak fasil, fè atansyon!
Pifò aplikasyon imigrasyon pran tan epi yo gen kondisyon trè presi. Avoka ki serye yo ap pran tan pou yo aprann istwa imigrasyon w, evalye dosye w, epi diskite sou opsyon ou genyen yo avèk ou.
Se pwobableman yon magouy si:
Yo di ou kalifye pou yon estati imigrasyon, menmsi yo pa konnen anpil bagay sou sitiyasyon w.
Yo di pwosesis la rapid ak fasil. Pifò pwosesis imigrasyon pran plizyè mwa oswa plizyè ane.
Yo pwomèt 100% siksè. Avoka ki serye yo p ap janm garanti w ap resevwa yon estati imigrasyon.
Yo di yo te deja prepare aplikasyon w lan, oswa yo te deja soumèt aplikasyon w lan. Aplikasyon imigrasyon yo pran tan pou yo prepare, epi aplikan an dwe siyen yon aplikasyon anvan yo ka soumèt li bay gouvènman an.
Mande pou w revize chak fòm anvan w siyen yo.
Mande avoka w la pou l revize chak fòm avèk ou anvan w siyen yo. Si ou pa pale Anglè, ou kapab revize repons ou yo tou lè w mete yo sou Google translate epi tradui yo nan lang ou.
Pran prekosyon pou w pa siyen okenn fòm imigrasyon ki vid oswa ki poko ranpli nèt.
Apre ou fin siyen, mande avoka w la kopi tout fòm li soumèt pou ou yo.
Suiv dewoulman dosye imigrasyon w lan.
Malgre chak dosye diferan, gen yon pwosesis jeneral pou dosye ki nan USCIS ak nan tribinal imigrasyon. Si ou gen yon dosye azil nan USCIS, ou kapab aprann sou etap pwosesis azil nan USCIS la. Si ou gen yon dosye nan tribinal imigrasyon, ou kapab aprann sou etap nòmal pwosesis azil nan tribinal imigrasyon an. Ou gen dwa tou pou w poze avoka w la kesyon sou chak etap nan dosye imigrasyon w lan.
Pran prekosyon sou rezo sosyal yo!
Anpil magouy fèt sou rezo sosyal. Pran prekosyon si w wè yon reklam oswa si w resevwa yon mesaj dirèk sou rezo sosyal ki pwomèt ou yon estati imigrasyon. Li pwobab pou se yon magouy.
Menm moun ki gen yon gwo kantite moun k ap suiv yo kapab fè magouy sou moun. Pa peye okenn lajan sof si w sèten nèt se pa yon fwod.
Gouvènman an pa ta dwe ap kontakte w sou kont rezo sosyal ou yo.
Si yon moun di li travay pou ASAP epi li mande w lajan an echanj pou sèvis imigrasyon, li pa di laverite.
Vin manm ASAP se gratis, epi ASAP pa janm pran lajan an echanj pou sèvis li yo. Si nenpòt moun di li travay pou ASAP epi li mande w lajan pou sèvis imigrasyon, li pa di laverite. Li pa travay pou ASAP.
Si yon moun janm di w li travay pou ASAP epi li fè w peye lajan pou èd nan imigrasyon, tanpri rapòte moun sa a ba nou nan [email protected]. N ap pran mezi kont nenpòt moun ki pretann yo travay pou ASAP.
Chèche èd nan imigrasyon ki serye.
Ou kapab chèche èd legal pou imigrasyon isit la, sa gen ladan l asistans legal gratis oswa a yon pri ki ba ak avoka prive ki serye.
Ou kapab klike sou lyen ki anba yo tou pou w aprann sou pwosesis azil la ak pemi travay. Ou pa bezwen gen yon avoka pou w aplike pou azil!
Si ou se yon manm ASAP (Pwojè ki an Defans pou Moun k ap Chèche Azil), ou kapab voye kesyon pa imèl tou bay ASAP nan [email protected] epi mete nimewo idantite manm ASAP ou a.
Si ou te viktim yon magouy, ou kapa b gen opsyon.
Si ou te deja viktim yon magouy, aprann plis sou opsyon ou yo isit la. Ou kapa b jwenn lòt resous tou sou paj entènèt an sa a ki soti nan yon lòt òganizasyon.
ASAP (Pwojè ki an Defans pou Moun k ap Chèche Azil) gen pou objektif pou bay enfòmasyon ki kòrèk sou lwa imigrasyon aktyèl yo. Enfòmasyon sa yo se pa konsèy legal.
Tout kontni legal se ekip avoka ekspè nan imigrasyon ASAP yo ki ekri li epi ki revize li legalman. Avoka ekspè ASAP yo gen plizyè dizèn ane eksperyans nan lwa imigrasyon ak nan litij. Ansanm, yo genyen plizyè santèn ka. Avoka nou yo admèt nan Baro nan plizyè eta Ozetazini, yo gen diplòm nan dwa nan inivèsite tankou Harvard, Yale, ak UCLA, epi yo genyen plizyè prim pou travay legal yo fè.