Mezi sekirite ak lòt enfòmasyon pou moun k ap chèche azil

Lis sa a bay enfòmasyon ki kapab itil pou moun k ap chèche azil yo. Nou fyè pou nou sipòte ou.

1. Lè ou kite lakay ou, pote yon pyès idantite Etazini si ou genyen youn.

Si ou gen yon kat idantite ameriken tankou yon lisans chofè oswa yon ID leta, pote l avèk ou lè ou kite lakay ou. Ou kapab chwazi montre ID ou si lapolis oswa ofisyèl imigrasyon yo kanpe ou deyò lakay ou. 

Ou kapab chwazi pote youn nan dokiman ki anba yo tou pou pwouve estati imigrasyon ou.

• Kat rezidan pèmanan (kat rezidan pèmanan)

• Pemi travay

• Kopi Avi pou paret nan tribinal (Notice to Appear)

• Kopi Avi Randevou nan Tribinal

• Kopi Fòm I-94 (gade egzanp yo isit la, isit la, ak isit la)

• Kopi yon viza ou te resevwa pou vini nan Etazini

2. Pote dokiman ki pwouve ou nan peyi Etazini depi omwen 2 zan.

Gouvènman an ap eseye mete plis moun nan yon pwosesis depòtasyon ki pi rapid yo rele “depòtasyon akselere” (expedited removal). Gouvènman an di l ap kapab mete moun nan detansyon epi mete yo nan pwosesis depòtasyon rapid sa a si yo gen mwens pase 2 zan depi yo nan peyi Etazini, EPI yo te antre nan peyi Etazini san yon viza valab oswa yon pawol (“parole”).  

Ou ka vle pote dokiman pou montre ou nan peyi Etazini depi omwen 2 zan. Dokiman yo ta dwe montre non ou ak adrès ou nan peyi Etazini, epi yo dwe gen dat sou yo. Yon sèl dokiman kapab pafwa montre yon peryòd tan ki long, pa egzanp yon bòdwo telefòn selilè ki montre plizyè mwa.  

Men kèk egzanp:

• Bòdwo entènèt, telefòn, elektrisite, oswa lòt bòdwo

• Dosye medikal oswa dosye lekòl

• Relve bankè oswa relve kat kredi

• Kontra lwaye oswa tit pwopriyete

• Asirans machin, asirans kay, oswa asirans sante

• Lòt lèt oswa dokiman

3. Fè atansyon lè w ap kondwi ak lè w ap vwayaje.

Pote lisans chofè ameriken ou epi pran asirans machin jan lalwa mande sa nan tout eta yo. Kondwi ak pridans epi respekte lwa sikilasyon yo. Konnen byen ke lè ou vwayaje anndan peyi Etazini, ou kapab rankontre ofisyèl imigrasyon oswa pòs kontwòl imigrasyon. An jeneral, vwayaje nan avyon oswa toupre fwontyè ak Meksik oswa Kanada kapab gen plis risk.

Ou kapab li gid sa a oswa gid sa a ki soti nan lòt òganizasyon pou aprann sou gwoup ki kapab gen plis risk pou yo ale nan detansyon, ak sou konsèy sekirite pou vwayaje nan avyon.

4. Fè atansyon ak pwoblèm konfidansyalite sou rezo sosyal yo.

Si ou pa sèvi ak yon kont rezo sosyal ankò, konsidere efase li. Si ou deside efase kont rezo sosyal ou a epi li gen prèv sou dosye azil ou oswa lòt enfòmasyon ki enpòtan pou ou, fè kapti ekran oswa enprime kopi yo anvan ou efase li.

Anpil konpayi ak gouvènman an gen aksè ak done moun pataje sou entènèt, sa gen ladan l sou platfòm rezo sosyal yo. Pa egzanp, gouvènman an deklare ke enfòmasyon yo pataje sou rezo sosyal yo kapab gen efè sou estati imigrasyon yon moun. Konpayi rezo sosyal yo vann done pèsonèl itilizatè yo bay lòt konpayi tou.

5. Mande moun ou fè konfyans pou ede w si ta gen yon ijans epi aprann nimewo telefòn yo pa kè.

Aprann nimewo telefòn omwen yon moun ou fè konfyans pa kè. Konsa, ou ka toujou rele yo menm si ou pa gen aksè ak telefòn ou ankò. Mande yo si yo ka ede w si ta gen yon ijans, pa egzanp ede w al chèche timoun yo lekòl oswa mennen timoun yo nan randevou doktè. Yon lòt òganizasyon kreye yon modèl plan ijans ou kapab ranpli, si sa ka ede w.

6. Sere dokiman enpòtan ou yo nan yon kote ki an sekirite.

Asire w ke dokiman ak enfòmasyon enpòtan ou yo sere nan yon kote ki an sekirite. Pa egzanp, sa ka gen ladan l paspò ou, dokiman imigrasyon, enfòmasyon finansye, enfòmasyon medikal, kòd aksè pou kont ou yo, ak nimewo telefòn ki enpòtan. Di yon lòt moun ou fè konfyans kote li ka jwenn enfòmasyon sa yo si ta gen yon ijans.

7. Si ajan imigrasyon arete w epi ou pè tounen nan peyi orijin ou, deklare sa klèman.

Si ajan imigrasyon arete w epi ou pè tounen nan peyi orijin ou, eseye di ou pè tounen chak fwa ou jwenn okazyon. Si ou te deja aplike pou azil, di ke ou gen yon aplikasyon azil ki annatant. 

Pa siyen okenn dokiman ou pa ka li oswa ou pa konprann poukont ou. Mande pou pale ak yon avoka, apre sa rele avoka w la si ou gen youn, oswa rele yon moun pwòch ki ka ede w. Jwenn èd legal isit la. Yon fwa ou nan detasyon (detention), dosye w la ka avanse rapid. Pou plis enfòmasyon sou detansyon.

8. Konsidere fè yon plan ki pi detaye si ta gen detansyon oswa depòtasyon.

Si ou gen yon dosye nan tribinal imigrasyon, dosye w la toujou aktif jiskaske jij la pran yon desizyon. Men, lefètke ou gen yon aplikasyon annatant, sa pa vle di nesesèman sa ap anpeche yo detni yon moun. Li enfòmasyon sou risk detansyon si ou gen yon randevou nan tribinal imigrasyon oswa yon Randevou pou prezante nan yon biwo ICE (ICE check-in) k ap vini. 

Ou ka konsidere pran lòt dispozisyon pou fè plan si yo ta detni w oswa depòte w, pa egzanp fè plan konsènan timoun yo ak finans ou. Ou ka jwenn yon gid preparasyon pou fanmi isit la, oswa gade manyèl preparasyon pou depòtasyon sa a ki pi detaye. 

9. Rete enfòme sou chanjman nan lwa imigrasyon yo.

Lwa imigrasyon yo ap chanje rapidman, epi chanjman sa yo kapa b gen efè sou dosye w la. Li kijan lwa yo ap chanje sou paj entènèt an sa a. ASAP mete paj sa a ajou souvan parapò ak nouvo chanjman yo.

10. Enskri pou w vin manm ASAP pou w resevwa dènye enfòmasyon legal yo gratis pa SMS oswa pa imèl.

Chak mwa, ASAP (Pwojè ki an Defans pou Moun k ap Chèche Azil) bay tout manm li yo dènye enfòmasyon legal yo gratis pa imèl oswa pa mesaj tèks – sa gen ladan l enfòmasyon sou lwa k ap chanje yo. Vin manm ASAP se yon bagay ki konplètman gratis, epi li fèt pou moun k ap chèche azil Ozetazini.