Enfòmasyon pou moun k ap chèche azil ki nan detansyon imigrasyon

Paj sa a gen enfòmasyon sou detansyon (detention) imigrasyon pou moun k ap chèche azil ak moun pwòch yo. Ou kapab jwenn: 

• Bagay enpòtan pou w konnen sou detansyon

• Kijan pou w jwenn yon moun ki nan detansyon

• Kijan pou w kontakte yon moun ki nan detansyon epi jwenn èd

• Kijan pou w mande liberasyon pou w rete Ozetazini 

• Kijan pou w kite Etazini 

• Sistèm imigrasyon an nan detansyon

Bagay enpòtan pou w konnen sou detansyon imigrasyon

1. Ou kapab prepare w pou posiblite pou yo mete w nan detansyon. Li enfòmasyon sou mezi sekirite ou kapab pran, kijan pou w prepare w pou risk detansyon nan tribinal imigrasyon, ak kijan pou w prepare w pou risk detansyon nan Randevou pou prezante nan yon biwo ICE (ICE check-in).
   
   

2. Ou pa oblije siyen okenn dokiman ou pa kapab li epi konprann poukont ou. Ou pa oblije reponn kesyon ou pa konprann. Li nòmal pou w mande yon ofisye imigrasyon oswa yon jij imigrasyon pou repete oswa esplike bagay yo.
   
   

3. Ou kapab mande pou w rele avoka w oswa yon moun pwòch ou. Ou kapab rele avoka w si w gen youn, oswa rele yon manm fanmi w oswa yon zanmi ki kapab ede w jwenn yon avoka. Chèche yon avoka isit la. Si w gen yon avoka, ou sipoze kapab pale avè l an prive. 
   
   

4. Si w pè tounen nan peyi orijin ou, ou kapab di ou pè tounen chak fwa ou jwenn okazyon. Si w di ofisyèl imigrasyon yo ou pè, ou kapab resevwa yon Entèvyou "Krent ki Fondé" (Credible Fear) oswa "Krent Rezonab" (Reasonable Fear). Ou kapab anmezi pou w aplike pou azil. Si w te deja aplike pou azil, ou kapab di ou gen yon aplikasyon azil ki annatant.
   
   

5. Ou kapab mande pou yo lage w nan detansyon. Si w vle eseye rete Ozetazini, ou kapab mande pou yo lage w atravè yon demann habeas corpus (habeas petition). Si w pa ap eseye rete Ozetazini ankò, ou kapab mande pou yo lage w lè w mande yon depar volontè. Nan kèk sikonstans, ou kapab anmezi pou w jwenn liberasyon atravè yon odyans pou kosyon (bond hearing) oswa pawol (“parole”) imanitè.
   
   

6. Si w se yon paran, ou kapab aprann sou dwa w yo isit la.

Kijan pou jwenn yon moun ki nan detansyon

Pou jwenn yon granmoun ki nan detansyon (detention) imigrasyon, ou kapab itilize sit entènèt ICE sa a. Nan tèt paj la, ou kapab chanje lang lan. Si ou konnen nimewo alyen (A number) moun nan, ki se nimewo idantifikasyon 9 chif ki sou pifò dokiman imigrasyon yo, ou kapab antre li pou chèche moun nan. Si ou pa konnen nimewo alyen moun nan, ou kapab antre premye non li, siyati li, dat nesans li, ak peyi kote li te fèt la — pou eseye chèche konnen nan ki sant detansyon li ye. Ou kapab gade videyo sa a tou sou kijan pou itilize sit entènèt ICE la.

Li enpòtan pou tcheke sit entènèt ICE la regilyèman paske yo kapab transfere moun nan yon lòt sant detansyon, souvan san avètisman.

Pafwa sit entènèt ICE la pa gen enfòmasyon ki pi resan yo, epi moun w ap chèche a ka pa parèt nan sistèm nan. Si moun ou renmen an pa parèt nan sistèm nan, ou kapab li gid sa a tou pou lòt etap ou ka pran. Yon lòt opsyon pou jwenn yon moun ki nan detansyon se sit entènèt sa a pou voye lajan bay moun ki nan detansyon. Si ou gen yon lide nan ki eta ak nan ki sant detansyon moun nan ka ye, ou kapab itilize sit entènèt la pou konfime si li la. Ou pa bezwen voye lajan tout bon pou w itilize sit entènèt la.

Pou jwenn yon timoun ki nan detansyon, paran yo kapab eseye rele liy gouvènman sa a: 1-800-203-7001 oswa eseye voye yon imèl nan: [email protected]. Resous gouvènman sa a gen plis enfòmasyon. Ou kapab jwenn plis enfòmasyon pou moun k ap chèche azil ki gen mwens pase 18 an isit la. 

Kijan pou kontakte yon moun ki nan detansyon epi jwenn èd

Chak sant detansyon gen règleman diferan sou kijan ou kapab kontakte moun ki nan detansyon ak kijan ou kapab mete lajan nan kont yo pou yo ka itilize pou achte manje oswa fè apèl. Resous sa a bay enfòmasyon jeneral sou kijan pou kontakte yon moun ou renmen, fason ki komen pou depoze lajan, ak kijan pou voye atik bay yon moun ki nan detansyon.

Pou enfòmasyon espesifik sou chak sant detansyon, vizite sit entènèt gouvènman sa a epi filtre rechèch la selon eta kote sant detansyon an ye a.

Ou kapab kontakte yon lòt òganizasyon ki rele Freedom for Immigrants pou asistans pou w pran kontak ak moun ou renmen yo, pou jwenn èd legal oswa medikal, oswa pou pote plent konsènan sant detansyon an. Ou kapab kontakte yo nan [email protected]. Si ou nan detansyon kounye a, nimewo dirèk pou rele depi anndan sant detansyon an se 9233#. 

Ou kapab eseye jwenn yon avoka tou pou moun ki nan detansyon an. Ou kapab chèche yon avoka imigrasyon prive, yon avoka ki espesyalize nan liberasyon nan detansyon, oswa yon òganizasyon san bi likratif (chèche selon non sant detansyon an).

Mande pou yo lage w nan detansyon (detention) 

Si ou vle eseye rete Ozetazini, ou kapab mande pou yo lage w atravè yon demann habeas corpus (habeas petition) oswa lè w mande yon odyans pou kosyon (bond hearing) oswa pawòl (“parole”) pou rezon iminitè. Si ou pa ap eseye rete Ozetazini ankò, ou kapab mande pou yo lage w lè w mande yon depar volontè. Si ou pa sèten sa pou w fè, ou ka vle pale ak yon avoka. Li kapab difisil pou yo lage w nan detansyon, men ou gen dwa pou w mande pou yo lage w.

Demann habeas corpus 

Lè imigran yo nan detansyon, pafwa yo kapab mande yon tribinal federal ameriken pou ede yo soti nan detansyon atravè yon demann habeas corpus.

Yon demann habeas corpus se yon dokiman legal ki mande yon tribinal federal fòmèlman pou l bay lòd pou yo lage w nan detansyon, oswa pafwa pou l bay jij imigrasyon an lòd pou l ba ou yon odyans pou kosyon. Se PA yon fason pou chanje estati imigrasyon w oswa pou konteste yon lòd depòtasyon (removal order).

Risk ak benefis: 

Gen kèk risk lè w depoze yon demann habeas corpus. Si ou deja gen yon lòd depòtasyon oswa si ou resevwa youn pandan demann habeas corpus ou a ap tann desizyon, ICE ta kapab eseye akselere efò li yo pou depòte w nan peyi orijin ou oswa nan yon twazyèm peyi.

Yon lòt bò, si ou pa gen yon lòd depòtasyon epi ou deside kite Etazini, yon demann habeas corpus ta kapab pafwa ralanti pwosesis pou w kite peyi a. Nan sitiyasyon sa a, olye pou w depoze yon demann habeas corpus, ou ta kapab konsidere mande yon depar volontè. 

Benefis prensipal lè w depoze yon demann habeas corpus se paske yon jij ta kapab aksepte demann lan epi yo ta ka lage w. Pou plis enfòmasyon, klike sou lyen sa. 

Kijan pou w depoze yon demann habeas corpus: 

Ou kapab itilize zouti sou entènèt nou an pou ede w depoze yon demann habeas corpus pa kont ou, san yon avoka. Ou kapab chèche tou yon avoka ki espesyalize nan demann habeas corpus.

Odyans pou kosyon

Gen kèk moun ki kapab mande yon jij imigrasyon pou lage yo nan detansyon atravè yon pwosesis yo rele odyans pou kosyon, men jwenn yon kosyon vin pi difisil anpil. Si yon jij imigrasyon akòde yon kosyon, y ap fikse yon kantite lajan ou bezwen peye pou w soti nan detansyon. 

Ki moun ki kapab mande yon odyans pou kosyon:

• Ou kapab tcheke Avi pou paret nan tribinal (Notice to Appear) ou a pou w konnen si ou elijib pou yon odyans pou kosyon pou w mande pou yo lage w. 

• Si ou gen twazyèm kaz la koche sou NTA w la ki di, “You have been admitted to the United States, but are removable for the reasons stated below” (Yo te admèt ou Ozetazini, men yo kapab depòte w pou rezon ki make anba a), jeneralman ou elijib pou yon odyans pou kosyon. Pa egzanp, si ou te antre Ozetazini ak yon viza, ou kapab elijib pou mande pou yo lage w nan detansyon atravè yon kosyon.

• Si ou gen dezyèm kaz la koche sou NTA w la ki di, “You are an alien present in the United States who has not been admitted or paroled” (Ou se yon etranje ki prezan Ozetazini ki pa t admèt oswa ki pa t resevwa yon pawòl), jeneralman ou elijib pou yon odyans pou kosyon, EKSEPTE si ou nan detansyon nan eta sa yo: Louisiana, Mississippi, Texas, Arkansas, Iowa, Minnesota, Missouri, Nebraska, North Dakota, ak South Dakota. Men, menm si tribinal imigrasyon an refize fè yon odyans pou kosyon, ou kapab konsidere depoze yon demann habeas corpus.

• Si ou gen premye kaz la koche sou NTA w la ki di “You are an “arriving alien,” (Ou se yon “etranje k ap rive”), li pwobab pou w PA elijib pou yon odyans pou kosyon.

• Ou kapab tou PA elijib pou yon odyans pou kosyon si ou nan pwosedi “depòtasyon rapid” oswa si ou gen sèten antecedan kriminèl.

Kijan pou mande yon odyans pou kosyon (bond hearing): 

• Gid sa a ak gid sa a ki soti nan lòt òganizasyon gen enfòmasyon sou kijan pou mande yon odyans pou kosyon ak ki lòt dokiman pou bay pou sipòte liberasyon ou anba kosyon. 

• Ou kapab eseye mande jij imigrasyon an tou si ou elijib pou mande yon odyans pou kosyon, epi mande jij imigrasyon an pou ba ou tan pou rasanble lòt dokiman yo anvan li fikse yon odyans pou kosyon pou ou. 

Sa k ap pase si jij imigrasyon an akòde kosyon an: 

• Si yon jij imigrasyon akòde yon kosyon, y ap fikse yon kantite lajan ou dwe peye pou ou kite detasyon (detention). 

• Si yo akòde ou yon kosyon epi ou bezwen èd pou peye kantite lajan kosyon an, ou ka kapab mande sipò.

Pawòl (“parole”) imanitè 

Yon lòt fason posib pou mande liberasyon nan detansyon se lè ou mande Ofisye Depòtasyon ou an yon “pawòl imanitè” poutèt yon sitiyasyon ijan tankou yon pwoblèm medikal grav oswa gwosès. Men, nan ane 2025 ak 2026, jwenn pawòl imanitè vin pi difisil anpil. 

Ki moun ki ka mande pawòl imanitè: 

• An jeneral, nenpòt moun ki nan detansyon kapab mande pawòl imanitè. Men, nan ane 2025 ak 2026, li vin trè difisil pou nenpòt moun resevwa pawòl imanitè. ICE ka konsidere akòde pawòl imanitè nan sikonstans ki gen rapò ak yon pwoblèm medikal grav oswa gwosès.

Kijan pou mande pawòl imanitè: 

• Si ou deside mande pawòl imanitè, ou fè yon demann pou pawòl imanitè bay Ofisye Depòtasyon (Deportation Officer) ICE ou a. Y ap ba ou yon Ofisye Depòtasyon, epi an jeneral anplwaye nan detansyon an ap gen yon lis Ofisye Depòtasyon yo ak enfòmasyon pou kontakte yo. 

• Ou kapab li gid sa a oswa gid sa a ki soti nan lòt òganizasyon pou plis enfòmasyon sou kijan pou mande pawòl imanitè. Pa gen okenn frè pou mande pawòl imanitè, men si yo akòde demann pawòl ou a, gen yon frè $1,000 pou peye anvan yo ka lage ou. 

• Men, tanpri pran nòt ke nan ane 2025 ak 2026, li vin trè raman pou ICE akòde pawòl imanitè. 

Sa k ap pase si ICE akòde pawòl imanitè: 

• Si ICE akòde pawòl imanitè, ou ta dwe resevwa yon desizyon alekri. Papye sa yo ka gen ladan yo tou sèten kondisyon pou liberasyon ou, tankou ale nan Randevou pou prezante nan yon biwo ICE (ICE check-in). 

• Depi 16 oktòb 2025, ou pral gen pou peye yon frè pawòl $1,000 tou anvan yo ka lage ou. 

• Nan kèk ka, yo ka mande ou tou pou peye yon kantite lajan anplis kòm kosyon pou yo ka lage ou nan detansyon anba pawòl imanitè. 

• Si ou bezwen èd pou peye frè pawòl la oswa kantite lajan kosyon an, ou ka kapab mande sipò. 

Kite peyi Etazini

Si ou nan detansyon epi ou deside ou vle kite peyi Etazini, gen plizyè fason sa ka fèt. Si ou vle tounen Ozetazini legalman nan lavni, sa ka ede si ou mande yon jij tribinal imigrasyon yon depa volontè. Si ou bezwen èd pou jwenn dokiman vwayaj tankou yon paspò, ou kapab eseye kontakte konsila peyi kote ou se sitwayen an pou jwenn èd isit la.

Èske depoze yon demann habeas corpus (habeas petition) ka rann li pi difisil pou mwen kite peyi Etazini? 

Wi, pafwa. Avoka yo konn rekòmande pafwa pou moun mande yon depa volontè olye pou yo depoze yon demann habeas corpus, sitou si objektif yo se kite peyi Etazini. Si ou pa sèten sa pou ou fè, ou kapab pale ak yon avoka. 

Ki fason prensipal moun ki nan detansyon kapab mande pou yo kite peyi Etazini? 

Men fason prensipal moun ki nan detansyon yo kite peyi Etazini: 

1. Depa volontè: Depa volontè se yon fason pou w kite peyi Etazini san w pa resevwa yon lòd depòtasyon. Ou kapab mande yon jij imigrasyon yon depa volontè, oswa ICE kapab ofri w yon depa volontè.
   
   Si ou resevwa yon depa volontè, ICE dwe ba ou yon Fòm I-210 ki presize kondisyon yo, tankou si se ou k ap òganize epi peye pou pwòp vwayaj ou oswa si se gouvènman an k ap peye. Si ou nan detansyon, ajan ICE yo kapab akonpaye w “anba siveyans” (under safeguard) jouk nan ayewopò a epi asire yo ou monte nan avyon an. Nan kèk ka, ou kapab mande pou w ale nan ayewopò a pou kont ou epi kite detansyon an anvan. Pafwa, gouvènman an ofri moun ki nan detansyon $2,600 pou yo pati nan yon pwosesis yo rele “depa volontè ak ankourajman,” men gen kèk moun ki pa janm resevwa lajan sa a apre yo fin pati.
   
   Yon avantaj lè w kite peyi Etazini ak yon depa volontè se paske ou pa resevwa yon lòd depòtasyon (lòd depòtasyon (removal order)). Lè w evite yon lòd depòtasyon, sa retire yon obstak legal pou w tounen Ozetazini legalman alavni, men li ka toujou difisil pou w tounen. 
   
   Gid sa yo bay plis esplikasyon sou depa volontè ak fason pou w mande l: Gid 1, Gid 2, Gid 3.
   
   

2. Lòd depòtasyon: Si yon jij imigrasyon ba ou yon lòd depòtasyon epi ou pa fè apèl, oswa ou pèdi apèl ou a, yo kapab depòte w. Yo kapab depòte w tou si yo mete w nan yon pwosesis ki pi rapid yo rele "depòtasyon rapid,” epi ou pa pase yon entèvyou krent kredib oswa rezonab. Si yo depòte w, gouvènman ameriken an ap transpòte w dirèkteman soti nan detansyon pou ale nan yon peyi ki aksepte w. Pifò imigran yo depòte yo nan peyi kote yo sitwayen an si yo gen yon paspò, men pafwa, yo depòte imigran yo nan yon lòt peyi. Si ou resevwa yon lòd depòtasyon, li pi difisil pou w tounen Ozetazini alavni.
   
   

3. Akò pou depòtasyon: Ofisye ICE yo kapab mande w oswa fè presyon sou ou pou w siyen yon akò yo rele stipulation of removal. Si ou siyen dokiman sa a, ou abandone dwa w genyen pou w defann tèt ou nan tribinal imigrasyon epi ou dakò pou yo depòte w san w pa wè yon jij. Si ou pa kapab jwenn yon depa volontè, siyen yon akò pou depòtasyon kapab fason ki pi rapid pou w kite peyi Etazini. Gouvènman an ap transpòte w dirèkteman soti nan detansyon pou ale nan yon peyi ki aksepte w, anjeneral peyi kote w sitwayen an. Men, ou ta dwe siyen dokiman sa a sèlman si ou sèten ou vle yo depòte w, epi ou konprann sa pral rann li difisil pou w tounen Ozetazini alavni. Pa janm siyen okenn dokiman ou pa konprann. Pou plis enfòmasyon epi pou w wè yon egzanp.
   
   

Gid sa a gen plis enfòmasyon tou sou depòtasyon, depa volontè, ak sa gouvènman an ka fè presyon sou ou pou w siyen si ou nan detasyon. Ou ka jwenn enfòmasyon tou sou fason pou w fè plan pou fanmi w ak finans ou nan gid preparasyon pou fanmi sa a oswa nan manyèl preparasyon pou depòtasyon sa a. 

Si ou pa vle kite peyi Etazini, ou gen dwa pou w kontinye goumen nan dosye tribinal imigrasyon ou pandan ou nan detansyon epi eseye mande pou yo lage w.

Sa k ap pase si yo lage w nan detansyon

Si yo lage w nan detansyon Ozetazini, epi dosye tribinal imigrasyon w lan toujou ankou, ou ka kontinye dosye imigrasyon w lan deyò detansyon. Gen anpil chans pou yo transfere dosye w la nan tribinal imigrasyon ki pi pre kote w ap viv la. Li plis enfòmasyon sou pwosesis tribinal imigrasyon an.

Nan kèk ka, yo ka ba w yon braslè elektwonik nan cheviy ou oswa ou ka gen Randevou pou prezante nan yon biwo ICE (ICE check-in). Randevou pou prezante nan yon biwo ICE yo separe ak odyans nan tribinal imigrasyon yo. 

Sa k ap pase si yo pa lage w nan detansyon 

Si yo rejte demann ou fè pou yo lage w nan detansyon epi ou chwazi kontinye goumen nan dosye imigrasyon w lan, w ap oblije fè sa pandan ou nan detansyon. Sa vle di ou dwe ranpli epi depoze aplikasyon azil ou a oswa nenpòt lòt aplikasyon pou soulajman nan imigrasyon pandan ou nan detansyon. W ap bezwen soumèt nenpòt prèv pou sipòte dosye w la tou.

Tout odyans tribinal ou yo ap fèt pandan ou nan detansyon, epi jij imigrasyon an ap pran yon desizyon pandan ou rete nan detansyon.

Si w ap aplike pou azil, ou ka li plis sou fason pou w soumèt aplikasyon azil ou ak prèv ou yo. Ou ka li tou sou sa pou w atann nan randevou devan jij (individual or merits hearing) ou a.

Ou pa bezwen yon avoka pou reprezante w nan dosye w la. Men, gen yon avoka kapab itil. Yon avoka ka ede w prepare aplikasyon w lan epi rasanble ak òganize prèv ou yo. Ou ka jwenn yon avoka imigrasyon prive oswa yon òganizasyon san bi likratif (chèche dapre non sant detansyon an).    

Si ou genyen dosye w la pandan ou nan detansyon epi gouvènman an pa fè apèl kont desizyon an, yo ta dwe lage w nan detansyon. 

Si ou genyen dosye w la pandan ou nan detansyon epi gouvènman an fè apèl, gen anpil chans pou w rete nan detansyon pandan pwosesis apèl la ankou. 

Si ou pèdi dosye w la pandan ou nan detansyon, ou gen dwa pou w fè apèl kont desizyon an. Gen anpil chans pou w rete nan detansyon pandan pwosesis apèl la ankou. Si ou pa fè apèl, lòd depòtasyon (removal order) jij imigrasyon an ap vin final epi gen anpil chans pou yo depòte w nan peyi orijin ou. Gouvènman Ameriken an ap eseye voye kèk imigran tou kounye a nan lòt peyi ki pa peyi orijin yo. Si ou nan detansyon epi yo di w yo ta ka voye w nan yon lòt peyi, epi si ou pè pou yo voye w nan peyi sa a, di otan ofisye imigrasyon ou kapab sa. Pou plis enfòmasyon, klike sou lyen sa a.

Kijan sistèm imigrasyon an fonksyone nan detansyon

Gen de pwosesis legal komen kote imigran k ap fè fas ak depòtasyon ka tonbe ladan yo: pwosesis regilye tribinal imigrasyon an ak pwosesis depòtasyon rapid. Li enpòtan pou w konnen ki pwosesis ki aplikab pou ou. Dwa w, opsyon w yo, ak etap nan dosye w la ka diferan selon pwosesis ou ladan l lan.

Pwosesis regilye tribinal imigrasyon

Nan pwosesis regilye tribinal imigrasyon an, imigran yo gen dwa pou yo wè yon jij imigrasyon. Yo gen dwa tou pou yo aplike pou diferan fòm pwoteksyon imigrasyon, tankou azil, si yo kalifye.

Pifò moun nan pwosesis regilye tribinal imigrasyon an pral genyen omwen yon premye randevou w nan tribinal (master calendar hearing). Sa yo se randevou kout, ki fèt anvan jijman an kòmanse toutbon. Apre sa, y ap gen yon randevou devan jij (individual or merits hearing). Nan randevou devan jij la, jij imigrasyon an egzamine aplikasyon an, gade prèv yo, epi koute temwayaj yo. Apre randevou a, jij la deside si l ap akòde oswa refize soulajman imigrasyon an.

Si yo kenbe w nan detansyon (detention) pandan w nan pwosesis regilye tribinal imigrasyon an, etap nan dosye w la se menm jan ak si w pa t nan detansyon. Men, dosye w la pral anjeneral avanse pi vit. Ou ka kapab mande pou yo lage w nan detansyon. Si yo pa lage w, w ap bezwen kontinye dosye w la pandan w rete nan detansyon.

Ou ka li plis enfòmasyon sou pwosesis tribinal imigrasyon an isit la. Tanpri pran nòt (please note) ke enfòmasyon sa yo eksplike pwosesis la pou moun ki pa nan detansyon, donk kèk detay ka diferan si w nan detansyon.

Pwosesis depòtasyon rapid 

“Depòtasyon rapid” se yon pwosesis ki pèmèt gouvènman Ameriken an depòte kèk imigran byen vit – san yo pa gen chans pou yo wè yon jij imigrasyon oswa prezante yon defans pou eksplike poukisa yo ta dwe rete Ozetazini. Gouvènman Ameriken an ap elaji depòtasyon rapid la pou l enkli plis imigran.

Ki moun yo ka mete nan depòtasyon rapid

Yo ka mete w nan depòtasyon rapid si:

• Gouvènman an konsidere w kòm yon “alyen k ap rive” (pa egzanp paske ou te resevwa pawòl (“parole”) lè w te antre Ozetazini), OSWA

• Ou gen mwens pase 2 an Ozetazini, EPI ou te antre Ozetazini san yon viza valab.

Kijan gouvènman an elaji depòtasyon rapid la

• Nan tan lontan, depòtasyon rapid te konn aplike pou moun ki te toupre fwontyè a epi ki te gen mwens pase 14 jou Ozetazini. Kounye a, li ka aplike pou moun nenpòt kote Ozetazini ki te antre san yon viza valab epi ki gen mwens pase 2 an Ozetazini. Imigran yo ap konteste elajisman sa a nan yon pwosè.

• Nan tan lontan, gouvènman an te raman mete moun ki te resevwa pawòl nan depòtasyon rapid. Men, sa ka chanje akòz yon desizyon tribinal ki fèk tonbe. 

Sitiyasyon an ap chanje rapidman. N ap mete paj entènèt an (webpage) sa a ajou amezir n ap aprann plis.

Si w panse yo mete w nan depòtasyon rapid pa erè, pa egzanp paske w te rive Ozetazini depi omwen 2 an, ou ka eseye di sa bay tout ofisyèl ou kapab. Ou ka bay kopi pemi travay ou, Avi pou paret nan tribinal (Notice to Appear) ou a, yon Avi Randevou, oswa yon Fòm I-94 (gade egzanp isit la, isit la, ak isit la) pou montre ou gen omwen 2 an Ozetazini. Li plis enfòmasyon isit la.

Si yo mete ou nan yon pwosesis depòtasyon rapid, epi ou pè retounen nan peyi orijin ou, ou kapa b di ou pè retounen chak fwa ou jwenn okazyon. Lè yon moun ki nan pwosesis depòtasyon rapid di gouvènman an li pè retounen nan peyi orijin li, gouvènman an sipoze ba li yon Entèvyou sou Krent ki Kredib oswa ki Rezonab. Pou plis enfòmasyo, klike sou lyen sa a sou Entèvyou sou Krent ki Kredib ak Rezonab anba a.

Entèvyou sou Krent ki Kredib oswa ki Rezonab (yon pati nan pwosesis depòtasyon rapid la) 

Si ou nan pwosesis depòtasyon rapid la epi ou di ofisye imigrasyon yo ou pè retounen nan peyi orijin ou, ou sipoze resevwa yon Entèvyou sou Krent ki Kredib oswa yon Entèvyou sou Krent ki Rezonab (CFI oswa RFI).

Tanpri pran nòt ke ofisye imigrasyon yo gen anpil chans pou yo pa mande ou si ou pè, donk ou kapa b di tout ofisye ou kapab sa, otan fwa ou kapab. Si ou te deja aplike pou azil, ou kapa b di ofisye imigrasyon yo sa. Ou kapa b eseye soumèt yon lèt bay ICE tou ki eksplike poukisa ou pè. Gen yon modèl lèt nan paj 36 nan gid sa a. 

Yon Entèvyou sou Krent ki Kredib oswa ki Rezonab diferan de yon entèvyou azil nòmal avèk USCIS. Nan entèvyou a, ou kapa b eksplike yon ofisye imigrasyon poukisa ou pè retounen nan peyi orijin ou.

Ou gen dwa pou yon avoka reprezante ou nan Entèvyou sou Krent ki Kredib oswa ki Rezonab ou a, si ou gen youn. Ou gen dwa tou pou gen yon entèprèt ki pale lang ou pi byen konnen an.

Si ou pase entèvyou a, ou sipoze kapa b aplike pou azil oswa lòt fòm pwoteksyon nan tribinal imigrasyon. Yo kapa b kenbe ou nan detasyon pandan pwosesis sa a. 

Si ou pa pase entèvyou ou a, ou kapa b mande jij imigrasyon an pou li revize desizyon ofisye azil la. Si jij imigrasyon an dakò ak desizyon ofisye azil la, ou pral gen anpil chans resevwa yon lòd depòtasyon (removal order). Si jij imigrasyon an pa dakò ak desizyon ofisye azil la, ou sipoze kapa b aplike pou azil oswa lòt fòm pwoteksyon nan tribinal imigrasyon.

Gid sa a gen plis enfòmasyon sou Entèvyou sou Krent ki Kredib ak Rezonab. Men, tanpri konnen resous sa yo pa t mete ajou sa pa gen lontan.

Aplike pou azil oswa lòt fòm pwoteksyon pandan ou nan detansyon

Si ou nan pwosesis nòmal tribinal imigrasyon an nan detansyon, OUBYEN si yo te mete ou nan depòtasyon rapid men apre sa ou pase yon Entèvyou sou Krent ki Kredib oswa yon Entèvyou sou Krent ki Rezonab, ou sipoze gen yon chans pou aplike pou azil oswa lòt fòm pwoteksyon nan tribinal imigrasyon. 

Aplike pou azil oswa lòt pwoteksyon pandan ou nan detansyon kapa b difisil, epi sitiyasyon an pou moun k ap chèche azil nan tribinal imigrasyon ap chanje rapidman. Pa egzanp, anpil ka azil ap fini anvan moun k ap chèche azil la gen chans pou prezante ka li nan tribinal imigrasyon. Pou plis enfòmasyo, klike sou lyen sa a sou pwosesis tribinal imigrasyon an. Ou kapa b jwenn enfòmasyon ajou tou sou jan lwa yo ap chanje pou moun k ap chèche azil.

Men kèk etap ou kapa b konsidere. 

• Si ou pè tounen nan peyi w, di sa klèman. Ou kapab di sa chak fwa ou gen chans, menmsi ou te deja di sa anvan. Si ou te deja aplike pou azil anvan sa, ou kapab di ou gen yon aplikasyon azil ki annatant. Si ou pa t janm aplike pou azil anvan sa, ou kapab mande jij imigrasyon an yon kopi yon fòm aplikasyon azil.
  
  

• Si Angle pa pi bon lang ou, ou kapab mande yon entèprèt. Tribinal imigrasyon an sipoze ba ou yon entèprèt pou randevou w la. Ou gen dwa mande yon entèprèt nan lang oswa dyalèk ou santi w pi alè pou w pale a, menmsi ou pale yon ti kras Angle.
  
  

• Si ou vle aplike pou azil, depoze aplikasyon azil ou a epi peye frè a anvan dat limit jij la fikse a. Jij la kapab ba ou dat limit presi pou w depoze aplikasyon azil (I-589) ou a ak prèv ou yo. Li enpòtan pou w respekte dat limit sa yo si ou ta renmen kontinye ak dosye azil ou a. Sinon, jij la kapab di ou abandone aplikasyon w lan epi li kapab ba ou yon lòd depòtasyon (removal order). Si aplikasyon azil ou a pare, ou kapab soumèt li pandan randevou w la. Si w poko pare, ou kapab soumèt li pita, men anvan dat limit la. Ou ka bezwen mande yon moun pwòch ou ki pa nan detansyon (detention) pou l ede w peye frè azil pou peye okòmansman epi voye lèt USCIS voye ba ou pou fè w konnen yo te resevwa aplikasyon w lan (receipt notice) ba ou oswa voye lèt la nan tribinal la pou jij imigrasyon an ka gen prèv peman ou an.
  
  

• Konsidere aplike pou lòt kalite pwoteksyon imigrasyon. Ou kapab kalifye tou pou lòt soulajman nan imigrasyon, selon sitiyasyon w. Pa egzanp, kèk moun kapab kalifye pou Sispansyon Depòtasyon (withholding of removal) oswa Pwoteksyon anba Konvansyon Kont Torti (CAT), ki kapab pwoteje w kont depòtasyon menmsi yo ta refize aplikasyon azil ou a. Gen kèk imigran ki te viv Ozetazini pandan plis pase 10 ane ki kapab mande yon jij imigrasyon yon Anilasyon Depòtasyon si yo gen yon paran, mari/madanm, oswa pitit ki sitwayen Ameriken oswa ki se rezidan pèmanan (lawful permanent resident) ki ta pral soufri yon “mizè ki eksepsyonèl epi ki pa nòmal ditou”.  Gid sa a ak paj entènèt an sa a ki soti nan lòt òganizasyon gen plis enfòmasyon sou fason pou w aplike pou azil ak lòt fòm pwoteksyon pou imigran ki nan detansyon.
  
  

• Si ou pa gen yon avoka, ou kapab mande jij la plis tan pou w jwenn yon avoka, si ou vle. Paj sa a kapab ede w chèche yon avoka nan zòn kote w ye a. Jij imigrasyon an kapab ba ou yon lis sèvis legal gratis tou ki toupre sant detansyon an.
  
  

• Eseye kenbe kopi nenpòt dokiman ou resevwa epi ou soumèt. Ou ta kapab gen aksè ak yon fotokopyè ak yon enprimant nan sant detansyon an pou w fè kopi aplikasyon w lan, dokiman sipò yo, ak dokiman gouvènman an. Sa kapab ede w si yo transfere w nan yon lòt sant detansyon oswa si ou jwenn yon avoka pita.