Moun k ap Chèche Azil ki gen Mwens pase 18 An

Paj sa a se pou moun k ap chèche azil ki gen mwens pase 18 an. Li gen ladan l enfòmasyon sou 5 bagay enpòtan pou w konnen, kijan pou jwenn èd, azil, pemi travay, Estati Espesyal pou Jèn Imigran (SIJS), lòt opsyon imigrasyon, detansyon, ak manm ASAP.

Ki sa moun k ap chèche azil ki gen mwens pase 18 an dwe konnen? 

1. Ou kapab tcheke estati dosye imigrasyon w lan sou entènèt, pou w konnen si w gen nenpòt randevou nan tribinal oswa lòt randevou ki pwograme. Gade paj sa a pou enstriksyon.

2. Gen kèk pwosesis imigrasyon ki diferan lè w gen mwens pase 18 an. Kontinye li pou w aprann sou azil, Estati Espesyal pou Jèn Imigran (SIJS), ak lòt opsyon imigrasyon.

3. Ou pa oblije siyen dokiman gouvènman an si ou pa kapab li yo epi konprann yo poukont ou. Ou kapab pale ak yon granmoun ou fè konfyans oswa ak yon avoka anvan ou siyen.

4. Ou kapab li mezi sekirite pou moun k ap chèche azil. Enfòmasyon sa yo ekri pou granmoun, men yo itil tou si w gen mwens pase 18 an. 

5. Ou kapab chèche èd legal. Li plis enfòmasyon anba a.

Kouman pou mwen jwenn èd? 

• Pou jwenn èd ak dosye imigrasyon w lan, ou kapab kontakte biwo ki pi pre w la nan Kids in Need of Defense (KIND), yon òganizasyon nasyonal ki konsantre sou reprezante timoun ki pa akonpaye. Ou kapab kontakte yon lòt òganizasyon tou ki rele ImportaMi, ki bay resous ak asistans pou timoun ki pa akonpaye. Ou kapab tou chèche yon avoka isit la.

• Si w ap sibi abi, ou kapab rele liy ijans nasyonal pou vyolans domestik nan 1−800−799−7233 oswa pale ak yon moun sou sit entènèt yo a pou w jwenn sipò epi pale sou opsyon ou genyen. Sèvis yo gratis epi yo disponib 24 èdtan pa jou, 7 jou sou 7.

• Ou kapab jwenn lòt lyen ki itil, tankou klinik medikal gratis ak resous pou elèv yo, sou paj entènèt an pou jwenn èd ASAP la. 

Kisa azil ye epi èske mwen kapa b aplike si mwen gen mwens pase 18 an? 

Azil se yon fòm estati imigrasyon pou moun ki vini Ozetazini epi ki pè tounen nan peyi orijin yo. Si ou genyen azil, gouvènman Ozetazini an pa kapab depòte ou. Moun ki gen mwens pase 18 an kapab aplike pou azil Ozetazini. 

Aplike pou azil se yon chwa pèsonèl epi li kapab yon desizyon konplike tou selon sitiyasyon ou. Depi 2025, li vin pi difisil pou yon moun genyen azil.

Ou kapab aprann plis sou desizyon pou aplike pou azil la ak kondisyon yo sou paj entènèt an oryantasyon jeneral sa a. Paj la te ekri pou granmoun, men ou kapab toujou li li pou gidans jeneral. Ou kapab aprann plis tou sou chanjman ki fèt dènyèman yo isit la. 

Si ou deside aplike pou azil, fason ou aplike a depann de si gouvènman Ameriken an konsidere ou kòm yon “timoun ki pa akonpaye” (pafwa yo rele sa tou “UAC” oswa “minè ki pa akonpaye.”)

Pwosesis la si ou PA yon “timoun ki pa akonpaye”

Ki moun yo PA konsidere kòm yon “timoun ki pa akonpaye": 

• Si ou te rive Ozetazini ak youn oswa de paran epi ou toujou anba swen paran ou, gouvènman an pwobableman pa konsidere ou kòm yon “timoun ki pa akonpaye.” 

Kijan pou aplike pou azil si ou PA yon “timoun ki pa akonpaye”:

• Paran ou kapab mete ou nan dosye azil li a. Pou yo mete ou ladan l, ou dwe selibatè epi ou dwe gen mwens pase 21 an nan moman paran ou ap aplike pou azil la. Pou plis enfòmasyo, klike sou lyen sa. 

• Ou kapab aplike pou azil separeman ak paran ou tou. Si ou gen yon dosye nan tribinal imigrasyon, ou kapab aplike pou azil nan tribinal imigrasyon. Si ou pa gen yon dosye nan tribinal imigrasyon, ou kapab aplike pou azil nan USCIS pito, menmsi paran ou gen yon dosye nan tribinal imigrasyon. 

E si ou gen yon dosye nan tribinal imigrasyon:

• Si ou gen yon dosye nan tribinal imigrasyon epi ou PA yon “timoun ki pa akonpaye,” w ap bezwen kontinye dosye tribinal imigrasyon ou an apre ou fin aplike pou azil. Tcheke sistèm tribinal imigrasyon an regilyèman pou ou ka konnen ki lè pwochen randevou ou yo ye. Yo kapab pwograme randevou yo ak yon avi ki kout anpil. Si ou rate yon randevou, ou pral gen anpil chans resevwa yon lòd depòtasyon (removal order). 

• Se pa tout moun ki gen yon dosye nan tribinal imigrasyon. Si ou pa sèten si ou gen yon dosye nan tribinal imigrasyon, aprann kijan pou tcheke sa.

Pwosesis la si ou SE yon “timoun ki pa akonpaye”

Ki moun yo KONSIDERE kòm yon “timoun ki pa akonpaye”: 

• Si ou te rive Ozetazini san yon paran, oswa yo te separe ou ak paran ou lè ou te rive Ozetazini, oswa ou te rive ak yon paran men ou pa anba swen paran an ankò, gouvènman an pwobableman konsidere ou kòm yon “timoun ki pa akonpaye.”

• Si ou te rive Ozetazini san yon paran, oswa yo te separe ou ak paran ou lè ou rive, ou te pwobableman anba swen Biwo pou Reyentegrasyon Refijye (ORR) epi apre sa yo te lage ou bay yon manm fanmi oswa yon moun ki responsab ou (sponsor). Apre yo fin lage ou, ou ta dwe resevwa yon Fòm Verifikasyon Liberasyon (ak yon kat si yo te lage ou apre 5 desanm 2024), ki montre estati timoun ki pa akonpaye ou a. 

• Menmsi ou te rive Ozetazini ak yon paran, ou kapab toujou kalifye kòm yon “timoun ki pa akonpaye” si ou pa anba swen paran ou ankò. Pa egzanp, yon moun ta ka konsidere kòm yon timoun ki pa akonpaye si li te rive ak yon paran men yo te separe apre yo fin travèse fwontyè a, oswa si paran an mouri, oswa si li te sibi abi.  

Kijan pou aplike pou azil si ou SE yon “timoun ki pa akonpaye”: 

• Ou kapa b aplike pou azil nan yon ajans imigrasyon ki rele United States Citizenship and Immigration Services (USCIS), menmsi ou gen yon dosye nan tribinal imigrasyon deja. Ou kapa b voye aplikasyon azil ou a bay USCIS pa lapòs. Asire w ou soumèt aplikasyon w lan anvan ou gen 18 an.

• Pifò moun dwe aplike pou azil nan yon peryòd yon ane apre yo fin rive Ozetazini. Men, kòm yon timoun ki pa akonpaye ki gen mwens pase 18 an, menmsi ou gen plis pase yon ane Ozetazini, ou kapa b aplike pou azil toujou.

E si ou gen yon dosye nan tribinal imigrasyon:

• Si ou se yon “timoun ki pa akonpaye” epi ou gen yon dosye nan tribinal imigrasyon deja, ou kapa b anile dosye tribinal ou a apre ou fin soumèt aplikasyon azil ou a bay USCIS. Sa kapa b yon fason ki itil pou senplifye pwosesis aplikasyon azil la pou yon timoun ki pa akonpaye. Nan kontèks sa a, anile vle di gouvènman an ap sispann dosye w nan tribinal imigrasyon an pou ou kapa b konsantre sou kontinye aplikasyon azil ou a ak USCIS sèlman. 

• Lè ou mande tribinal imigrasyon an pou anile dosye w la, sa kapa b ede si ou pote prèv ki montre gouvènman an te konsidere w kòm yon “timoun ki pa akonpaye” (tankou yon fòm Verification of Release). Sa kapa b ede tou si ou pote prèv ki montre ou te soumèt aplikasyon azil ou a bay USCIS (tankou yon lèt USCIS voye ba ou pou fè w konnen yo te resevwa aplikasyon w lan (receipt notice)).

• Si ou te aplike pou azil nan USCIS anvan 24 fevriye 2025, gouvènman an kapa b oblije anile dosye w la. Si ou te aplike pou azil nan USCIS apre 24 fevriye 2025, ou kapa b toujou mande pou yo anile l, epi nan anpil ka y ap aksepte sa.

• Si yo pa anile dosye tribinal ou a, w ap toujou bezwen kontinye ale nan tout randevou nan tribinal imigrasyon ki pwograme yo anplis de nenpòt randevou USCIS.

Èske mwen kapa b aplike pou yon pemi travay kòm yon moun k ap chèche azil si mwen gen mwens pase 18 an? 

Wi, ou kapa b aplike pou yon pemi travay kòm yon moun k ap chèche azil menmsi ou gen mwens pase 18 an. Menmsi ou pa gen laj pou travay, gen yon pemi travay kapa b yon fòm idantifikasyon ki trè itil. Si yo apwouve w pou yon pemi travay, ou kapa b aplike pou yon nimewo social security (SSN) apre ou fin resevwa pemi travay ou a. 

Moun k ap chèche azil yo kapa b jeneralman aplike pou yon pemi travay 150 jou apre yo fin soumèt yon aplikasyon azil. Si ou soumèt yon aplikasyon azil pou kont ou, oswa si ou enkli nan aplikasyon azil yon paran, ou kapa b soumèt yon aplikasyon pou pemi travay 150 jou apre. Pou plis enfòmasyon sou fason pou aplike, klike sou lyen sa. 

Nan anpil eta, avèk yon pemi travay, ou kapa b aplike tou pou yon lisans chofè oswa yon ID leta. 

Kisa Estati Espesyal pou Jèn Imigran (SIJS) ye?

SIJS se yon estati imigrasyon pou minè yon paran oswa tou de paran te maltrete, abandone, oswa neglije. Ou kapab aplike pou azil ak SIJS anmenmtan.

Se tribinal leta kote w ap viv la ki pran premye desizyon pou SIJS la. SIJS disponib sèlman pou aplikan ki gen mwens pase 18 oswa 21 an (sa depann de nan ki leta w ap viv), donk li trè enpòtan pou ou pale ak yon avoka ASAP. Apre tribinal leta a fin pran desizyon sa a, ou kapab soumèt demann SIJS ou a bay USCIS.

Gen yon nouvo frè $250 pou aplike pou SIJS yo pa kapab bay egzansyon pou li. Si ou deside aplike, ou kapab tcheke paj entènèt USCIS sa a pou plis enfòmasyon sou frè a.

Pou plis enfòmasyon sou fason pou aplike pou SIJS li gid sa a oswa paj entènèt USCIS sa a.

Si USCIS akòde SIJS, ou kapab elijib pou rezidans pèmanan (kat rezidan pèmanan). Sa depann de peyi kote ou soti a, ou ka gen pou w tann yon ti tan anvan ou kapab aplike pou oswa resevwa kat rezidan pèmanan ou.

Si ou te aplike pou SIJS anvan 10 me 2026, USCIS sipoze egzamine dosye w otomatikman pou “aksyon difere.” Aksyon difere pwoteje w kont depòtasyon epi li pèmèt ou aplike pou yon pemi travay. Men, sanble USCIS ap refize aksyon difere pou anpil aplikan SIJS.

Si ou aplike pou SIJS nan dat 10 me 2026 oswa apre sa, yo p ap egzamine w otomatikman ankò pou aksyon difere. Okontrè, w ap gen pou w soumèt yon demann separe, men yo ka pa akòde li. Gade memorandòm politik USCIS sa a.

Si ou gen yon pemi travay kounye a ki baze sou aksyon difere SIJS, pemi travay ou a rete valid, sof si ou resevwa yon avi nan men USCIS ki mete fen nan aksyon difere ou a. Gen kèk rapò ki fè konnen USCIS ap mete fen nan aksyon difere SIJS pou moun ki te deja resevwa li.

Si USCIS refize aplikasyon SIJS ou a, mete fen nan aksyon difere ou a, oswa refize demann ou pou aksyon difere, gouvènman an kapab kòmanse yon ka nan tribinal imigrasyon kont ou epi voye yon dokiman ba ou yo rele Avi pou paret nan tribinal (Notice to Appear).

Ki lòt opsyon imigrasyon ki genyen pou moun ki gen mwens pase 18 an? 

Anba la a gen kèk lòt fòm soulajman nan kesyon imigrasyon ki komen ou ka vle konsidere si ou gen mwens pase 18 an, anplis de azil ak Estati Espesyal pou Jèn Imigran (SIJS).

• Petisyon Fanmi: Si ou gen yon paran oswa yon bèlpè/bopè ki swa yon sitwayen Ameriken oswa yon rezidan pèmanan (lawful permanent resident), yo ka kapab fè petisyon pou ou.

• Viza U: Viza U se pou viktim sèten krim. Ou ka kapab aplike pou yon viza U si oumenm, paran w, oswa frè oswa sè w te viktim yon krim. Ou kapab jwenn plis enfòmasyon sou Viza U isit la.

• Viza T: Viza T se pou viktim trafik moun. Ou ka kapab aplike pou yon viza T si oumenm, paran w, oswa frè oswa sè w te viktim trafik moun. Trafik moun kapab gen ladan yo fòse w travay oswa fòse w bay sèvis seksyèl. Pou plis enfòmasyon sou fason pou aplike pou yon Viza T, tanpri li gid sa a oswa gid sa a.

Li plis sou sa yo ak lòt opsyon imigrasyon isit la.

Èske manm fanmi m yo oswa mwen menm ap nan detansyon pandan m ap chèche azil? 

Sa posib. Sitiyasyon an ap chanje rapidman, epi repons lan depann tou de sitiyasyon pa w ak sitiyasyon manm fanmi w yo. Tanpri li konsèy sekirite yo la a, ki gen ladan l enfòmasyon sou fason pou w prepare w pou posiblite pou yo ta mete w nan detansyon.  

Timoun ki pa akonpaye. ICE pa sipoze mete timoun ki pa akonpaye nan detansyon imigrasyon. Sepandan, si yon jij imigrasyon rejte dosye azil ou a, li bay yon lòd depòtasyon, epi ou pa fè apèl oswa ou pèdi apèl ou a, gouvènman an ta kapab detni w epi depòte w. 

Timoun ki anba swen yon paran. Pafwa gouvènman an detni timoun ak yon paran ansanm, menm pandan dosye azil yo ankou toujou. Dapre lalwa, fanmi yo pa sipoze rete nan detansyon pandan plis pase 20 jou, men pafwa gouvènman an konn detni fanmi yo pou pi lontan.   

Manm fanmi yo. Si yon manm fanmi w ki granmoun nan pwosesis pou chèche azil oswa li pa gen okenn estati imigrasyon, li posib pou yo ta detni li. Ou kapab li konsèy sekirite yo la a epi sa kapab yon bon lide pou w fè yon plan ijans.