Pwosesis Azil USCIS la

Kijan pou mwen konnen ki lè randevou pou entèvyou azil mwen an ap fèt ak USCIS?

Si ou te aplike pou azil nan USCIS, ou kapa b resevwa yon randevou pou yon entèvyou pou prezante ka ou a. Men, gen kèk moun ki pa janm resevwa yon entèvyou. Depi mwa jiyè 2026, USCIS kapa b transfere sèten ka dirèkteman nan tribinal imigrasyon pou al chèche azil la, olye pou yo planifye entèvyou.

Si ou resevwa yon randevou pou entèvyou, li trè difisil pou predi ki lè USCIS ap planifye li. Gen kèk moun ki resevwa yon entèvyou nan kèk semèn oswa kèk mwa apre yo fin aplike, alòske gen lòt moun ki tann pandan plizyè ane pou yon entèvyou.

Yon fwa yo planifye entèvyou ou a, USCIS dwe voye yon avi entèvyou ba ou ki gen dat, lè, ak kote l ap fèt la. Si ou te voye aplikasyon azil ou a (Fòm I-589) pa lapòs, ou kapa b resevwa avi sa a nan lapòs. Si ou deplase, asire w ou mete adrès ou ajou pou ou pa rate okenn avi. 

Si ou te voye aplikasyon azil ou a (Fòm I-589) sou entènèt, oswa si ou gen yon kont USCIS (USCIS online account), ou kapa b resevwa avi sa a nan kont USCIS ou a sou entènèt. Li bon pou ou tcheke kont USCIS ou a yon fwa pa semèn. Nou resevwa rapò ki fè konnen pafwa USCIS pa voye notifikasyon lè yo mete yon avi entèvyou nan yon kont USCIS sou entènèt.

Si ou poko resevwa yon avi entèvyou, ou kapa b tcheke estati aplikasyon azil ou a nan USCIS lè ou antre nimewo resi ou nan zouti sou entènèt pou tcheke estati ka nan USCIS sa a. Nimewo resi ou a nan kwen anwo sou bò gòch nan lèt USCIS voye ba ou pou fè w konnen yo te resevwa aplikasyon w lan (receipt notice) pou aplikasyon azil ou a. Nimewo resi a anjeneral kòmanse ak twa lèt. Zouti pou tcheke estati ka a ap montre si yo te voye yon avi entèvyou ba ou, men li p ap montre dat entèvyou ou a.

Si zouti pou tcheke estati ka a montre yo te voye yon avi entèvyou men ou pa t resevwa li, ou kapa b rele USCIS nan 1-800-375-5283. Lè yo mande w pou eksplike poukisa w ap rele, ou kapa b di “missing notice” pou mande yon nouvo avi epi tou mande dat, lè, ak kote entèvyou ou a ap fèt.

Ou kapa b eseye kontakte biwo azil USCIS ki nan zòn kote w rete a tou pou mande yo asistans. Ou kapa b jwenn enfòmasyon pou kontakte biwo ki nan zòn ou an lè ou antre kòd postal ou nan paj entènèt an sa a.

Kisa pou mwen fè si mwen pa kapa b ale nan entèvyou azil mwen an nan dat ki te planifye a?

Ou kapa b mande pou yo chanje dat entèvyou azil ou a, men USCIS kapa b pa aksepte demann ou an. USCIS di ou dwe montre yon rezon “eksepsyonèl” pou yo chanje dat yon entèvyou azil. Egzanp sikonstans eksepsyonèl yo gen ladan vyolans domestik oswa maladi grav. Si USCIS pa aksepte demann ou an, ou t ap bezwen ale nan entèvyou azil ou a nan dat orijinal la si ou vle kontinye ak ka azil ou a.

Menm si USCIS dakò pou chanje dat entèvyou azil ou a, sa kapa b gen lòt konsekans negatif. Yo kapa b pa planifye yon nouvo entèvyou pou ou pandan yon bon bout tan. Si sa fè mwens pase 180 jou depi ou te aplike pou azil, chanje dat entèvyou ou a kapa b reta premye aplikasyon pemi travay ou a tou. 

Kijan pou mande pou chanje dat entèvyou ou a: 

Si ou chwazi eseye chanje dat entèvyou ou a, li pi bon pou voye demann ou an pou chanje dat la pi vit posib.

1) Pou chanje dat la, rele Sant Sèvis USCIS (Contact Center) nan 1-800-375-5283. Lè yo mande w pou w eksplike pou kisa w ap rele, ou kapa b di “Reschedule my asylum interview.” Pare pou w bay nimewo resi Fòm I-589 ou a, ki make sou avi pou entèvyou azil ou a, oswa sou lèt USCIS voye ba ou pou fè w konnen yo te resevwa aplikasyon w lan (receipt notice) pou azil la. Sa ka pran anpil tan anvan w jwenn yon moun an dirèk, men kontinye eseye. Ou ka bezwen mande pou w pale ak yon ofisye “Tier 2”. Pare pou w eksplike rezon presi ki fè w ap mande pou chanje dat la. Mande yon nimewo demann sèvis (service request number). Ekri nimewo demann sèvis ou a ak dat ou te kontakte USCIS la epi sere l si w ta bezwen fè swivi sou demann ou an.

2) Si sa pa mache, ou kapa b eseye kontakte biwo azil ou a tou. Ou kapa b voye yon lèt pa lapòs oswa yon imèl bay biwo azil ou a, oswa ou ka menm ale nan biwo azil la an pèsòn epi ranpli yon Demann pou Chanje Dat Entèvyou Azil. Si w ap voye demann ou an pa lapòs, nou rekòmande pou w voye yon kopi pa imèl tou.

Ou kapa b jwenn non ak adrès biwo azil ou a sou avi pou entèvyou azil ou a, oswa sou lèt USCIS voye ba ou pou fè w konnen yo te resevwa aplikasyon w lan pou azil la. Ou kapa b chèche biwo azil yo tou lè w sèvi ak Asylum Office Locator USCIS la. Apre w fin klike sou eta w la oswa ou fin antre kòd postal ou, klike sou non vil kote biwo a ye a. Apre sa, w ap wè yon paj ki gen enfòmasyon sou adrès postal, lè biwo a ouvri, ak adrès imèl. 

Demann pou chanje dat la ta dwe gen ladan l rezon presi ki fè w pa ka ale nan entèvyou a nan dat ki te prevwa a. Mete tou nenpòt dokiman ki montre pou kisa w pa ka ale jou sa a. 

Pwochen etap apre w fin mande pou chanje dat la: 

Si w fè demann pou chanje dat la men ou pa resevwa konfimasyon nan men USCIS ki di yo chanje dat entèvyou w la, ou kapa b fè swivi ak USCIS epi rele oswa voye imèl bay biwo azil kote w te fè demann lan pou w mande si yo chanje dat entèvyou w la. Si w pa ka konfime chanjman dat la, epi ou vle kontinye ak dosye azil ou a, ou ta dwe toujou planifye pou w ale nan dat ki te prevwa a si w kapab.

Si w rate entèvyou azil ou a epi USCIS pa t apwouve yon demann pou chanje dat entèvyou azil ou a, gouvènman an ka voye dosye w la nan tribinal imigrasyon. Si w pèdi dosye w nan tribinal imigrasyon, yo ka depòte w.

Si w te deja rate entèvyou w la, li enfòmasyon sou etap ou kapa b pran yo.

Konbyen tan m ap gen pou m tann anvan yo ban m yon dat pou entèvyou m nan?

Pa gen yon repons klè pou keksyon sa a. Li posib pou w gen pou w tann yon bon bout tan anvan yo ba w yon dat pou entèvyou azil ou a. Kounye a, USCIS ap pran anpil ane pou l bay pifò moun k ap chèche azil yo yon dat pou entèvyou azil.

Pandan w ap tann entèvyou azil ou a, ou kapa b fè demann pou yon pemi travay epi kontinye renouvle l. Si sa fè lontan w ap tann entèvyou azil ou a epi ou vle konnen si w ka fè pwosesis la mache pi vit, li isit la sou etap ou kapa b pran yo.

Kisa mwen kapab fè pandan dosye azil mwen an ap tann nan USCIS?

Si ou gen yon dosye azil k ap tann nan USCIS, pafwa ou dwe tann yon bon bout tan pou yon entèvyou. Men 5 bagay ou kapab fè pandan w ap tann, si ou vle kontinye pouswiv dosye azil ou a.

Kijan mwen kapab bay nouvo prèv pou sipòte dosye azil mwen an apre mwen te fin voye aplikasyon azil mwen an deja?

Si ou te soumèt aplikasyon azil ou a bay USCIS deja, epi kounye a ou gen plis prèv pou sipòte dosye azil ou a, ou kapab swiv etap ki anba yo pou soumèt li. 

USCIS di tout prèv dwe soumèt omwen 14 jou anvan dat entèvyou azil ou a. Men, ou pa bezwen tann. Anfèt, se kapab yon bon lide pou soumèt prèv ou yo pi vit posib, menm byen lontan anvan yo planifye yon entèvyou azil pou ou. Nan dat 28 jiyè 2026, USCIS te anonse yon nouvo règleman ki pèmèt ofisye azil yo transfere kèk dosye azil nan tribinal imigrasyon san yo pa fè entèvyou. Si ou pa t bay prèv nan moman ou te aplike pou azil la, sa ta kapab itil pou w eseye bay prèv sipò kounye a. Gade egzanp prèv sipò yo.

Nenpòt prèv ki pa nan lang Anglè dwe genyen yon tradiksyon an Anglè ansanm ak yon sètifika tradiksyon. Ou ta dwe kenbe kopi nenpòt prèv ou voye. Apre sa, pote yon kopi nouvo prèv yo nan entèvyou azil ou a. 

Gen 3 fason pou voye nouvo prèv:  

(1) Kont USCIS sou entènèt. Si ou te ranpli Fòm I-589 sou entènèt oswa si ou te ajoute Fòm I-589 nan yon kont USCIS (USCIS account) sou entènèt, ou kapab soumèt nouvo prèv ou yo nan onglet “Unsolicited Evidence” la.

(2) Pa imèl. Ou kapab voye nouvo prèv yo bay Biwo Azil la pa imèl. Ou kapab jwenn non biwo azil ou a nan kwen anba sou bò gòch nan lèt USCIS voye ba ou pou fè w konnen yo te resevwa aplikasyon w lan (receipt notice). Apre sa, ou kapab chèche biwo w la sou sit entènèt USCIS sa a. Mete kòd postal ou oswa klike sou non eta a. Nan paj ki vin apre a, klike sou non vil la. Enfòmasyon pou Biwo Azil ou a pral parèt epi w ap wè imèl la nan seksyon “Mailing Address” la. Atache yon imaj receipt notice aplikasyon azil ou a ak nenpòt nouvo prèv nan imèl la. Nan liy sijè imèl la, ou kapab ekri “Evidence to supplement Form I-589” epi mete nimewo resi aplikasyon azil ou a, ou jwenn sou receipt notice ou a.

(3) Pa lapòs. Li pi bon pou soumèt prèv yo atravè yon kont USCIS sou entènèt oswa pa imèl. Men ou kapab voye yo pa lapòs tou. Asire w ou sèvi ak yon sèvis lapòs ki bay nimewo swivi (tracking). Ou kapab gade videyo sa a pou aprann sou diferan fason pou voye dokiman w yo pa lapòs. 

Ou kapab jwenn non biwo azil ou a nan kwen anba sou bò gòch nan receipt notice aplikasyon azil ou a. Apre sa, ou kapab chèche biwo w la sou sit entènèt USCIS sa a. Mete kòd postal ou oswa klike sou non eta a. Nan paj ki vin apre a, klike sou non vil la. Nan paj ki vin apre a, ou kapab jwenn adrès la anba seksyon “Mailing Address” la. 

Ou kapab mete yon paj pa anlè ki gen non ou, nimewo resi aplikasyon azil ou a (ou jwenn sou receipt notice aplikasyon azil ou a), ak “Evidence to supplement Form I-589.” Apre sa, mete yon kopi receipt notice ou a epi apre sa nouvo prèv la.

Èske mwen kapa b jwenn yon randevou pou entèvyou azil mwen an pi vit?

Petèt. Li posib pou mande USCIS pou trete dosye azil ou a pi vit, men pwosesis la difisil epi souvan li pa mache. 

Anba la a gen kèk opsyon pou mande USCIS trete dosye azil ou a pi vit. Si yo apwouve demann ou an, sa pa vle di USCIS dakò pou ba ou azil. Sa vle di sèlman y ap planifye entèvyou ou a pi bonè. Desizyon final sou dosye azil ou a kapab pozitif oswa negatif.

Li ka itil pou pale ak yon avoka sou ka espesifik ou a. Jwenn yon avoka isit la.

Opsyon 1. Soumèt yon demann pou akselere nan biwo azil lokal ou a

Ou kapab mande USCIS pou trete dosye ou a pi vit. Yo souvan rele sa yon demann pou “akselere” (expedite). Ou kapab soumèt yon demann alekri pou akselere dosye ou a nan biwo azil lokal USCIS ki pral pran desizyon sou dosye ou a.

Demann lan dwe fèt alekri epi voye l pa imèl oswa pa lapòs (pa nan telefòn). Li ta dwe genyen prèv pou sipòte l. Biwo azil yo egzamine demann sa yo ka pa ka. Yo ka apwouve demann lan si dosye ou a koresponn ak youn oswa plis nan sitiyasyon sa yo:

1. Ta ka gen gwo domaj finansye pou yon moun oswa yon konpayi si yo pa pran yon desizyon sou dosye ou a pi vit.

2. Ou ap fè fas ak yon ijans oswa yon sitiyasyon imanitè ijan. Pa egzanp, ou ap soufri ak yon maladi grav oswa fanmi ou ki aletranje an danje.

3. Ou ap ede gouvènman Ameriken an. Pa egzanp, gouvènman an vle mete ou nan yon pwogram pwoteksyon temwen.

4. USCIS te fè yon erè klè nan dosye imigrasyon ou a.

Ou kapab vizite paj entènèt an USCIS sa a pou jwenn plis enfòmasyon sou fason pou soumèt yon demann pou akselere. Ou kapab jwenn tou enfòmasyon ki pi detaye isit la.

Opsyon 2. Mande manm kongrè ou a asistans

Yon lòt opsyon se kontakte manm kongrè ou a (Reprezantan nan Chanm Reprezantan Etazini oswa Senatè Etazini) pou mande asistans yo pou akselere dosye azil ou a ak USCIS. Ou kapab jwenn Reprezantan ou an isit la, epi Senatè ou a isit la.

Chak manm kongrè gen pwòp pwosedi pa yo pou mande èd. Yon fwa ou fin idantifye kilès ki manm kongrè ou a, ou ka ale sou sit entènèt yo oswa rele biwo lokal yo pou konprann ki jan pou mande asistans yo pou dosye imigrasyon ou a. Yo ka mande ou pou ranpli epi siyen divès fòm.

Opsyon 3. Konsidere yon manda mandamis (writ of mandamus). 

Yon manda mandamis se yon demann yo fè nan yon tribinal federal. Lè ou depoze yon manda mandamis, ou mande tribinal federal la pou fòse USCIS pran yon desizyon sou dosye ou a. Ou kapab aprann plis sou manda mandamis sou paj entènèt sa a.

Kisa k pase nan yon entèvyou azil?

Pandan entèvyou azil la, yon ofisye azil pral poze w kesyon pou detèmine si ou kalifye pou azil. Entèvyou a kapa b pran anpil tan — soti nan 1 èdtan rive plis pase 4 èdtan.

Lè ou rive nan biwo azil la, ou pral pase nan yon tcheke sekirite (security checks) dabò. Apre sa, ou kapa b prezante tèt ou bay yon resepsyonis. Ou pral tann nan yon sal datant jiskaske yon ofisye azil rele non w epi mennen w nan yon chanm prive pou entèvyou w la. Entèprèt ou ak avoka w (si ou genyen youn) kapa b vini avèk ou.

Yon fwa ou nan chanm entèvyou a, ofisye azil la pral mande w pou fè sèman ke ou pral di laverite nan entèvyou a.

Si ou gen nenpòt dokiman ou pa t soumèt anvan, ou ta dwe voye yo bay Biwo Azil la omwen 14 jou davans epi pote kopi anplis nan entèvyou w la. Nan kòmansman entèvyou a, ou kapa b mande ofisye a si yo te resevwa lòt prèv ou te voye yo, epi ba yo kopi si yo pa t resevwa yo.

Ofisye a pral revize aplikasyon azil ou a avèk ou, sa gen ladan l enfòmasyon tankou non w, adrès ou, ak nimewo telefòn ou. Apre sa, ofisye a pral poze w kesyon sou dosye w la. Kèk kesyon ofisye a kapa b poze w ka gen ladan l poukisa ou te kite peyi orijin ou, ki kalite mal ou te sibi, si ou te eseye jwenn èd nan men lapolis oswa gouvènman an, ak kisa ki ta kapa b rive w si ou ta tounen nan peyi orijin ou nan lavni.

Nan fen entèvyou a, si ou gen yon avoka, avoka w la pral gen dwa pale. Avoka w la kapa b esplike ofisye a poukisa ou ta dwe genyen azil la. Finalman, ofisye a pral esplike kijan ou pral resevwa desizyon w lan. Apre sa, entèvyou a ap fini epi w ap soti nan chanm nan.

Li enpòtan pou w onèt nan entèvyou a. Enfòmasyon ki pa kòrèk oswa ki pa konsistan kapa b lakòz pwoblèm pou dosye imigrasyon w lan. Ou ta dwe revize aplikasyon azil ou a ak prèv ou te soumèt yo, anvan entèvyou a.

Si ou santi w konfonn nenpòt lè pandan entèvyou a, ou kapa b mande klarifikasyon. Si ou pa konnen repons yon kesyon, li nòmal pou w di ou pa konnen repons lan. Si ofisye a mande ki lè yon bagay te pase, ou pa oblije bay yon dat egzak si ou pa konnen l. Ou kapa b bay yon dat apwoksimatif (pa egzanp, ou kapa b di “nan zòn avril oswa me ane pase” oswa “prentan pase”). Si ou gen difikilte pou w konprann entèprèt ou a, ou ta dwe di ofisye azil la sa.

Li nòmal pou w santi w nève oswa estrèse pandan entèvyou azil ou a. Sa kapa b trè difisil ak trè emouvan pou w pale de pase w ak krent ou yo. Li nòmal si ou kriye pandan entèvyou a. Ou kapa b mande ofisye a yon poz si ou bezwen youn. Enfòmasyon ou pataje pandan entèvyou a sipoze rete konfidansyèl ak sekrè, donk yon moun andeyò gouvènman Ameriken an pa ta dwe konnen istwa w. Pwosesis pou chèche azil la kapa b difisil, men sonje ke ou pa poukont ou. Gen plizyè milye moun k ap chèche azil Ozetazini.

Pou plis enfòmasyon sou entèvyou azil yo, ou kapa b gade videyo sa a.

Kisa mwen ta dwe pote nan entèvyou a?

Ou ta dwe pote:

• Avi entèvyou azil ou a.

• Mari oswa madanm ou ak pitit ou yo ki enkli nan dosye azil ou a.

• Yon entèprèt, si ou pa pale Anglè byen.

• Avoka oswa reprezantan ou, si ou genyen youn.

• Dokiman Idantite, tankou yon paspò, pou ou menm ak manm fanmi ou ki enkli nan dosye azil ou a.

• Yon kopi aplikasyon azil (Fòm I-589) ou a ak dokiman sipò yo.

• Original tout dokiman ou te soumèt ak aplikasyon azil ou a, tankou paspò, dokiman depi lè ou te antre Ozetazini, akte nesans, ak akte maryaj pou ou menm ak fanmi ou ki enkli nan dosye azil ou a.

• Nenpòt lòt prèv anplis ki sipòte dosye ou. Men ou ta dwe tou voye nouvo prèv sa yo nan Biwo Azil la omwen 14 jou anvan entèvyou ou a.

• Tradiksyon ak sètifika tradiksyon pou nenpòt dokiman ki pa nan lang Anglè.

• Lèt randevou pou al fe byometrik (biometrics notice) ou a ki gen yon tenm ki montre ou te ale nan randevou byometrik ou a.

• Li enstriksyon ki nan avi entèvyou ou a byen pou wè si ou bezwen pote nenpòt lòt bagay nan entèvyou ou a.

Ou pa ta dwe pote:

• Manje ak bwason.

• Aparèy elektwonik. Ou kapab kite telefòn selilè ou ak lòt aparèy elektwonik lakay ou oswa nan machin ou.

• Nenpòt zam oswa objè ki file. Y ap tcheke sekirite (security checks) lè ou rive nan biwo azil la.

Bagay sa yo pa obligatwa, men yo ka itil:

• Ou kapab pote yon bagay pou okipe ou menm ak fanmi ou pandan n ap tann. Pafwa, apre ou fin rive nan biwo azil la, ou pral bezwen tann yon ti tan anvan entèvyou a kòmanse. Ou pa kapab pote aparèy elektwonik, men ou kapab pote bagay tankou liv ak magazin. Si ou gen yon timoun piti, ou ta dwe pote yon bagay pou okipe li, tankou yon jwèt oswa yon liv koloryaj. Ou ka pase plizyè èdtan nan biwo azil la.

• Ou ta dwe abiye ak rad ki pwòp e ki kòrèk. Ou pa oblije mete yon kostim. Ou kapab pote yon chanday oswa yon vès paske kèk biwo azil ka fè frèt.

Planifye pou rive bonè (anviwon 30 minit anvan lè ki te fikse a).

Ou kapab gade videyo sa a pou plis enfòmasyon sou entèvyou azil yo.

Èske mwen bezwen mennen fanmi mwen nan entèvyou a?

Wi, si ou gen manm fanmi ki enkli nan dosye azil ou a, yo bezwen vini nan entèvyou azil la avèk ou. Men, an jeneral yo p ap poze yo keksyon. Si yo pa enkli nan dosye azil ou a, yo pa bezwen vini.

Ou ka bezwen mennen yon moun pou chita ak pitit ou yo pandan y ap poze w keksyon nan entèvyou a. Pitit ou yo ki enkli nan dosye w la bezwen vini nan biwo USCIS la avèk ou, men gen anpil chans pou yo chita nan sal tann nan pandan yon ofisye azil ap poze w keksyon nan entèvyou a.

Ou ka santi w pi alèz tou pou w pale sou evènman difisil ki te pase oswa krentif ou genyen pou w tounen lakay ou si pitit ou yo pa nan sal entèvyou a avèk ou. Men, timoun piti pa gen dwa chita pou kont yo nan sal tann nan, donk ou ka bezwen yon moun pou siveye yo.

Tanpri revize enstriksyon ki nan lèt randevou pou entèvyou w la byen anvan entèvyou w la.

Ou kapa b gade videyo sa a tou pou plis enfòmasyon sou entèvyou azil yo.

Èske mwen bezwen mennen yon avoka nan entèvyou a?

Yon avoka pa obligatwa pou entèvyou a, men si ou gen yon avoka, ou gen dwa mennen avoka w la avèk ou.

Avoka w la pa gen dwa pale pandan pifò tan nan entèvyou a. Avoka a ka pran nòt pandan entèvyou a, reponn nenpòt keksyon ofisye azil la poze l, epi tou li ka di yon bagay nan fen entèvyou a pou l esplike poukisa yo ta dwe ba ou azil.

Tanpri pran nòt ke avoka w la ka kapab patisipe nan entèvyou a a distans, nan telefòn.

Paj sa a ka ede w chèche yon avoka imigrasyon toupre w.

Ou kapa b gade videyo sa a tou pou plis enfòmasyon sou entèvyou azil yo.

Si mwen pa pale Angle, èske mwen bezwen mennen yon entèprèt nan entèvyou a?

Wi, ou ta dwe mennen yon entèprèt nan entèvyou a si ou pa pale Angle byen. Sa enpòtan anpil! Si ou bezwen yon entèprèt men ou pa mennen youn, ofisye azil la ka chanje dat entèvyou w la, oswa voye dosye w la nan tribinal imigrasyon, oswa menm fèmen tout dosye azil ou a nèt.

Li lèt randevou pou entèvyou w la avèk atansyon pou w wè enstriksyon yo! Ou kapa b gade videyo sa a tou pou plis enfòmasyon sou entèvyou azil yo.

Men kèk konsèy sou fason pou w jwenn yon entèprèt si w bezwen youn: 

Si ou mennen yon entèprèt, entèprèt la dwe gen omwen 18 an epi li dwe pale Angle ak lang ou prefere a byen.

Entèprèt ou a pa obligatwa pou l gen yon sètifikasyon pwofesyonèl kòm entèprèt.

Asire w ke entèprèt ou a se yon moun ki serye ki pral tradui chak mo ou di yon fason ki kòrèk, epi ki pral kenbe enfòmasyon ou yo konfidansyèl. Entèprèt ou a pa kapab avoka w, yon temwen ki pral temwaye pou ou, oswa yon reprezantan oswa yon anplwaye gouvènman peyi kote w soti a.

Si ou mennen yon entèprèt, ofisye azil la ap rele pwòp entèprèt pa l tou nan telefòn, pou l asire l ke tout sa entèprèt ou a ap di a kòrèk. Entèprèt sa a ki nan telefòn nan ap rete an silans pifò tan an, epi l ap pale sèlman si ofisye azil la mande l sa, oswa si li santi li bezwen korije yon bagay.

Si ou soud oswa ou gen pwoblèm pou tande, USCIS ap bay yon entèprèt pou ou men ou dwe mande youn. Pou w mande yon entèprèt, swiv enstriksyon ki sou lèt randevou pou entèvyou azil ou a. Ou kapa b ranpli fòm sa a tou oswa rele 1-800-375-5283.

Èske mwen kapa b mande pou se yon ofisye azil fi oswa gason ki fè entèvyou mwen an?

Wi, ou kapa b mande pou se yon ofisye azil fi oswa gason ki fè entèvyou mwen an. USCIS rekonèt pafwa li pi difisil pou w pale de eksperyans ou te pase ak yon moun ki gen yon sèten sèks. Biwo azil la pral fè tout sa l kapab pou l onore demann ou an. Ou kapab soumèt yon lèt ekri oswa yon imèl bay biwo azil ou a pou mande yon ofisye azil fi oswa gason.

Èske enfòmasyon mwen pataje nan entèvyou a ap rete konfidansyèl?

Wi, enfòmasyon ou yo dwe rete konfidansyèl. Sa vle di enfòmasyon ou yo pa dwe pataje ak lòt moun andeyò gouvènman Etazini an.

Kisa mwen dwe fè si mwen te rate entèvyou azil mwen an?

Si ou te rate entèvyou ou a epi ou vle kontinye pouswiv dosye azil ou a, ou ta dwe kontakte biwo azil la pi vit posib. USCIS di ou dwe soumèt yon demann pou chanje dat entèvyou ou a nan yon delè 10 jou, epi montre yon rezon “eksepsyonèl” ki fè w te rate entèvyou a. 

Egzanp sikonstans eksepsyonèl yo gen ladan vyolans domestik oswa maladi grav. Ou kapab li plis sou “sikonstans eksepsyonèl” sou paj entènèt an USCIS sa a. Lè ou kontakte biwo azil la, ou kapab esplike sitiyasyon ou epi soumèt prèv ki enpòtan. 

Si ou rate entèvyou azil ou a epi ou pa soumèt demann ou pou chanje dat la nan yon delè 10 jou, oswa si USCIS di rezon ou an pa eksepsyonèl, USCIS ap pwobableman refize chanje dat entèvyou azil ou a. 

Kisa k ap pase si USCIS pa chanje dat entèvyou azil mwen an? 

Sa k ap pase apre a depann de sitiyasyon ou:

• Si ou pa gen lòt estati imigrasyon (tankou Estati Pwoteksyon Tanporè (TPS) oswa yon viza valab ki pa t ankò ekspire), USCIS ap pwobableman kòmanse yon dosye nan tribinal imigrasyon kont ou.

• Si ou gen pawol (“parole”), USCIS kapab anile pawol ou a epi kòmanse yon dosye nan tribinal imigrasyon kont ou. 

• Si ou gen yon lòt estati imigrasyon, USCIS ap anile dosye azil ou a.

Anplis de sa, si sa fè mwens pase 180 jou depi ou te aplike pou azil, lefètke ou rate entèvyou azil ou a kapab tou reta premye aplikasyon pemi travay ou a. 

Ou kapab tcheke estati dosye azil ou a lè w sèvi ak zouti pou tcheke estati dosye USCIS sa a. Ou ka swete jwenn asistans legal pou w konprann opsyon ou genyen yo.