Randevou byometrik (biometrics appointment) pou anprent

Nan yon randevou byometrik (biometrics appointment), yo rele tou randevou anprent, Sèvis Sitwayènte ak Imigrasyon Etazini (USCIS) pral pran anprent ou, foto ou, ak siyati ou. Randevou byometrik yo se yon pati nòmal nan pwosesis azil la ak lòt pwosesis imigrasyon. Si ou vle kontinye ak dosye azil ou a, li enpòtan pou ou ale nan randevou byometrik ou a. Ou kapa b gade videyo sa a tou sou randevou byometrik pou moun k ap chèche azil.

Depi ane 2026, gen rapò ki fè konnen gen kèk arestasyon ki fèt nan randevou byometrik, espesyalman pou moun ki te resevwa lòd depòtasyon (removal order) nan tan pase, oswa ki gen istwa kriminèl anvan sa. Men pifò moun toujou ale nan randevou byometrik yo san pwoblèm. Li plis pi ba a, epi tanpri konnen sitiyasyon an ap chanje rapidman. Ou kapa b jwenn plis chanjman resan isit la.

• Kisa yon randevou byometrik ye?

• Kouman pou mwen jwenn yon randevou byometrik?

• Ki lè randevou byometrik mwen an ye?

• Èske y ap mete m nan detansyon nan randevou byometrik mwen an?

• Kisa k ap rive si mwen pa ale nan randevou byometrik mwen an?

• Kisa mwen bezwen pote avè m nan randevou byometrik mwen an?

• Kisa pou m fè si mwen pa resevwa yon lèt randevou pou al fe byometrik (biometrics notice)?

• Èske mwen kapa b toujou aplike pou yon pemi travay menmsi mwen poko fè yon randevou byometrik?

• Kisa pou m fè si mwen pa kapa b ale nan randevou byometrik mwen an nan dat ki te prevwa a?

• Kisa pou m fè si mwen te deja rate randevou byometrik mwen an?

• Kisa k ap rive nan dosye m nan si mwen rate randevou byometrik mwen an epi USCIS pa ban m yon lòt dat?

• Kisa dokiman sa a mwen te resevwa nan men gouvènman an ye?

• Gade lòt kesyon.

• Jwenn èd legal.

Kisa yon randevou byometrik ye?

Yon randevou byometrik (yo rele tou randevou anprent) se yon randevou avèk USCIS. Pandan randevou a, USCIS pran anprent ou, foto ou, ak siyati ou.

Si ou aplike pou azil oswa pou yon pemi travay, yo kapa b mande w pou ale nan yon randevou byometrik. Se yon pati nòmal nan pwosesis azil la ak lòt pwosesis imigrasyon. Enfòmasyon USCIS kolekte nan men w nan randevou byometrik ou a pral sèvi pou konfime idantite w, epi tou pou tcheke istwa imigrasyon w ak nenpòt istwa kriminèl.

Si ou resevwa yon lèt randevou pou al fe byometrik epi ou vle kontinye ak dosye azil ou a, li trè enpòtan pou ou ale nan randevou byometrik ou a. Si ou pa ale nan randevou byometrik ou a, yo kapa b refize aplikasyon azil ou a. Sa kapa b lakòz reta tou oswa refi aplikasyon pemi travay ou a lè ou aplike pou pemi travay ou.

Gen kèk rapò ki fè konnen gen moun yo mete nan detansyon nan randevou byometrik, espesyalman pou moun ki te resevwa lòd depòtasyon nan tan pase. Men pifò moun toujou ale nan randevou byometrik yo san pwoblèm. Li enfòmasyon sou risk detansyon. Ou kapa b li sou mezi sekirite isit la tou.

Si USCIS planifye yon randevou byometrik (biometrics appointment) pou ou, USCIS dwe voye yon lèt randevou pou al fe byometrik (biometrics notice) ba ou ki gen dat, lè, ak kote randevou w la ap ye.

• An jeneral, USCIS voye lèt randevou pou al fe byometrik la ba ou pa lapòs. Tcheke lèt ou yo regilyèman epi kenbe adrès ou ajou.

• Si ou te fè demann azil ou ak USCIS sou entènèt, USCIS dwe telechaje lèt randevou pou al fe byometrik ou a nan kont USCIS (USCIS account) ou a sou entènèt. Tcheke kont USCIS ou a regilyèman.

Ou dwe pote lèt randevou pou al fe byometrik ou a nan randevou a. Pandan randevou a, yon ajan gouvènman an ap mete yon tenm sou lèt la kòm prèv ki montre ou te fè randevou byometrik ou a. Ou dwe kenbe lèt ki gen tenm nan yon kote ki an sekirite.

Li pi ba a pou w asire w ou te fè tout etap ki nesesè yo pou USCIS planifye randevou byometrik ou a. Ou kapa b gade videyo sa a tou sou randevou byometrik pou moun k ap chèche azil.

Kouman pou m fè jwenn yon randevou byometrik?

Fason yo planifye yon randevou byometrik pou ou depann de si w ap fè demann azil ak USCIS, si w ap fè demann azil nan tribinal imigrasyon, oswa si w ap fè demann pou yon pemi travay.

• Si w ap fè demann azil ak USCIS, ou pral soumèt yon aplikasyon azil (Fòm I-589) bay USCIS. Apre sa, USCIS dwe planifye yon randevou byometrik otomatikman pou ou epi voye yon lèt randevou pou al fe byometrik ba ou.

• Si w ap fè demann azil nan tribinal imigrasyon, ou pral soumèt yon aplikasyon azil (Fòm I-589) nan tribinal imigrasyon. Gouvènman an ka pa mande w pou w ale nan yon randevou byometrik. Nan anpil ka, gouvènman an gen anprent ou deja epi li pa bezwen pran yo ankò. Si gouvènman an bezwen pran anprent ou, USCIS dwe planifye yon randevou byometrik otomatikman pou ou epi voye yon lèt randevou pou al fe byometrik ba ou.
  
  Nòt: Depi mwa desanm 2024, moun k ap chèche azil nan tribinal imigrasyon yo pa oblije voye yon kopi Fòm I-589 bay USCIS ankò pou mande yon randevou byometrik.
  
  

• Si w ap fè demann pou yon pemi travay, gouvènman an ka voye yon lèt randevou pou al fe byometrik ba ou menmsi ou te deja ale nan yon randevou byometrik anvan pou azil. Gouvènman an ka refize pemi travay ou a si ou pa ale nan nouvo randevou byometrik sa a.

• E pou mari/madanm mwen ak pitit mwen yo? Si mari/madanm ou oswa pitit ou yo enkli nan dosye azil ou a, yo dwe resevwa lèt randevou tou si ou resevwa pa w. Si y ap fè demann pou pemi travay, yo dwe resevwa pwòp lèt randevou pa yo tou. Pafwa, yo pa planifye randevou byometrik pou timoun ki gen mwens pase 14 an. 

Si ou deplase, ou kapa b mete adrès ou ajou pou w ka resevwa avi yo tankou lèt randevou pou al fe byometrik la. 

Si ou panse ou te dwe resevwa yon lèt randevou pou al fe byometrik, men ou pa t resevwa l, pou plis enfòmasyo sou sa ou kapa b fè apre sa, klike sou lyen sa.

Ki lè randevou byometrik mwen an ap ye?

Lè USCIS fin planifye yon randevou byometrik (biometrics appointment) pou ou, USCIS dwe voye yon lèt randevou pou al fe byometrik ba ou.

• Si ou te fè demann azil ou nan tribinal imigrasyon, oswa si ou te voye demann azil ou bay USCIS pa lapòs, USCIS dwe voye lèt randevou pou al fe byometrik la ba ou pa lapòs. Tcheke bwat lèt ou regilyèman epi toujou mete adrès ou ajou.

• Si ou te fè demann azil ou ak USCIS sou entènèt, USCIS dwe mete lèt randevou pou al fe byometrik ou a nan kont USCIS (USCIS account) ou a sou entènèt. Li bon pou ou tcheke kont ou yon fwa pa senmenn. Pafwa USCIS pa voye notifikasyon lè yo mete yon lèt randevou nan yon kont USCIS sou entènèt.

Lèt randevou pou al fe byometrik ou a ap di ou dat, lè, ak kote randevou a ap ye. Ou dwe pote lèt randevou pou al fe byometrik la epi planifye pou ou rive 15 minit anvan lè randevou ou a.

Èske y ap mete m nan detansyon nan randevou byometrik mwen an? 

Petèt. Depi ane 2026, gen rapò ki fè konnen yo arete kèk moun nan randevou byometrik, sitou moun ki te resevwa lòd depòtasyon (removal order) nan tan pase, oswa moun ki gen dosye kriminèl. Men, pifò moun toujou ale nan randevou byometrik yo san pwoblèm. 

Pou tcheke si ou te resevwa yon lòd depòtasyon, ou kapab antre nimewo alyen (A number) ou ak peyi kote ou soti a sou sit entènèt sa a. Si li di yon jij te “ordered removal” (bay lòd depòtasyon) ak yon dat, sa vle di ou gen yon lòd depòtasyon. Ou kapab tcheke tou nan telefòn: rele 1-800-898-7180, peze opsyon 1 pou Angle epi antre nimewo alyen ou an. Peze 1 pou konfime nimewo alyen ou an, peze 1 pou konfime non ou, epi apre sa peze 3 pou tcheke estati dosye ou. Si li di yon jij te “ordered removal” ak yon dat, sa vle di ou gen yon lòd depòtasyon.

Men kèk lòt gwoup moun ki kapab plis an risk pou yo mete yo nan detansyon nan yon randevou byometrik: 

• Imigran ki genyen yon sispyansyon depòtasyon (withholding of removal) oswa Pwoteksyon anba Konvansyon Kont Torti (CAT). 

• Imigran ki gen dosye kriminèl. 

• Imigran yo akize kòmkwa yo te prezante fo enfòmasyon oswa fo dokiman. 

Si ou enkyete w, pale ak yon avoka anvan ou ale nan randevou byometrik ou a. Jwenn èd legal isit la. 

Ou kapab aprann plis tou sou detansyon imigrasyon.

Kisa k ap rive si mwen pa ale nan randevou byometrik mwen an? 

Si ou rate randevou byometrik ou a, yo kapab refize demann azil ou a. Rate randevou ou a kapab lakòz reta tou oswa yo kapab refize aplikasyon pemi travay ou a. Si dosye azil ou a nan USCIS, gouvènman an kapab voye dosye ou a nan tribinal imigrasyon tou.

Si ou pa kapab ale nan randevou byometrik ou a, ou kapab chanje dat randevou ou a. Si ou te deja rate randevou byometrik ou a, aprann sou opsyon ou genyen yo.

Kisa mwen dwe pote avè m nan randevou byometrik mwen an?

Lè ou ale nan randevou w la, ou ta dwe pote lèt randevou w la avèk ou. Pandan randevou a, yon ofisye gouvènman pral mete yon tenm sou lèt la kòm prèv ou te fè randevou byometrik (biometrics appointment) ou a. Ou ta dwe kenbe lèt ki gen tenm nan yon kote ki an sekirite.

Ou bezwen tou yon dokiman idantite, tankou paspò w, pou randevou byometrik la. Si ou pa gen yon pyès idantite valid gouvènman bay, ou ka eseye pote tout dokiman sa yo ou genyen nan lis sa a:

• Akt de nesans

• Kat idantite lekòl

• Kat idantite ki ekspire

• Yon kopi oswa yon foto yon kat idantite

• Yon dokiman imigrasyon, sitou sa ki gen foto w sou li a, tankou rejis Randevou pou prezante nan yon biwo ICE (ICE check-in) sa a.

Ou ka gade videyo sa a sou randevou byometrik pou moun k ap chèche azil.

Kisa mwen ta dwe fè si mwen pa resevwa yon lèt randevou pou al fe byometrik?

Si ou pa resevwa yon lèt randevou pou al fe byometrik (biometrics notice), pwochen etap ou yo depann de si w ap aplike pou azil nan USCIS oswa nan tribinal imigrasyon. Menm si ou poko fè yon randevou byometrik, ou kapab aplike pou yon pemi travay toujou.

Si w ap aplike nan USCIS: 

1. Tcheke dokiman w yo pou w wè si w te resevwa yon lèt USCIS voye ba ou pou fè w konnen yo te resevwa aplikasyon w lan (receipt notice) pou soumèt aplikasyon azil ou a (Fòm I-589). Malerezman, kounye a li nòmal pou w tann yon bon bout tan anvan USCIS voye yon lèt konfimasyon ba ou.

2. Si ou pa resevwa yon lèt konfimasyon apre twa mwa, ou ka rele Sant Sèvis USCIS (Contact Center) nan 1-800-375-5283. Lè yo mande w pou w eksplike poukisa w ap rele, ou ka di “InfoPass” pou w ka pale ak yon reprezantan. Apre sa, ou ka eksplike ou te soumèt aplikasyon azil ou a sa gen twa mwa men ou pa resevwa yon lèt konfimasyon. Asire w ou gen nimewo alyen (A number) ou pare (si w gen youn), ansanm ak nenpòt enfòmasyon sou anwa lapòs ou ka genyen, tankou dat ou te poste dokiman w yo ak nimewo swivi (tracking number) lapòs la.

3. Si ou te resevwa yon lèt konfimasyon, sèvi ak nimewo resi a pou tcheke estati dosye w sou paj entènèt an USCIS sa a. Si w aprann USCIS te voye yon lèt randevou byometrik ba ou men ou pa t resevwa l nan lapòs, ou ka rele Sant Sèvis USCIS nan 1-800-375-5283. Si w aprann ou te rate randevou byometrik ou a deja, ou ka rele epi eksplike ou pa t resevwa lèt la epi mande pou yo chanje dat randevou a.

4. Si USCIS poko voye yon lèt randevou byometrik ba ou, ou ka kontinye tcheke estati dosye w chak semèn. Li nòmal pou w tann yon ti tan anvan yo planifye yon randevou byometrik pou ou. Tcheke lapòs ou ak kont USCIS sou entènèt ou an (si w te aplike pou azil sou entènèt) epi kenbe adrès ou ajou.

Si w ap aplike nan tribinal imigrasyon: 

Pifò moun k ap chèche azil nan tribinal imigrasyon pa oblije ale nan yon randevou byometrik. Sa se paske, nan pifò ka, gouvènman an gen anprent dwèt ou deja epi li pa bezwen pran yo ankò.

Men, si yon jij imigrasyon te di w ou bezwen yon randevou byometrik epi ou pa resevwa yon lèt randevou pou al fe byometrik, ou ka swiv etap sa yo anba a: 

1. Tcheke si sa fè plis pase 3 mwa depi ou te soumèt aplikasyon azil ou a (Fòm I-589) OSWA si ou gen mwens pase 6 mwa ki rete anvan randevou devan jij (individual or merits hearing) ou a (pafwa yo rele l yon odyans sou "mèrit"). Si repons lan se non, kontinye tann epi tcheke bwat lèt ou pou w wè si ou resevwa yon lèt randevou pou al fe byometrik (biometrics notice). 

2. Si repons lan se wi, ou kapa b rele Sant Sèvis USCIS (Contact Center) nan 800-375-5283. Lè yo mande w pou w esplike poukisa w ap rele, ou kapa b di “InfoPass” pou w ka pale ak yon reprezantan. Apre sa, ou kapa b esplike w ap mande azil nan tribinal imigrasyon epi jij la te di w ou bezwen yon randevou byometrik (biometrics appointment), men ou pa t janm resevwa yon lèt randevou pou al fe byometrik. Gen yon kopi aplikasyon azil ou a (Fòm I-589) bò kote w si reprezantan an ta bezwen plis enfòmasyon sou dosye w la.   

Èske mwen kapa b toujou aplike pou yon pemi travay menmsi mwen poko fè randevou byometrik mwen an?

Wi, ou kapa b toujou aplike pou yon pemi travay! Moun k ap chèche azil yo ka jeneralman aplike pou yon pemi travay 150 jou apre yo fin soumèt yon aplikasyon azil. Si 150 jou fin pase deja men ou poko fè randevou byometrik ou a, ou kapa b toujou soumèt yon aplikasyon pou pemi travay. Men, yo ka ba w yon randevou byometrik pita anvan gouvènman an apwouve pemi travay ou a. Ou kapa b jwenn plis enfòmasyon sou fason pou w aplike pou premye pemi travay ou kòm yon moun k ap chèche azil isit la.

Kisa mwen ta dwe fè si mwen pa kapa b ale nan randevou byometrik mwen an nan dat ki te prevwa a?

Ou kapa b mande pou yo chanje dat randevou byometrik ou a anvan dat ki te prevwa a, men li posib pou USCIS pa aksepte demann ou an. Si USCIS pa aksepte demann ou an, ou t ap bezwen ale nan randevou byometrik ki te prevwa a si ou vle kontinye ak aplikasyon azil ak pemi travay ou yo. 

Menmsi USCIS dakò pou l chanje dat randevou byometrik ou a, chanje dat randevou byometrik la kapa b tou retade aplikasyon pou premye pemi travay ou a. Si ou rate randevou byometrik ou a epi USCIS pa chanje dat la, yo kapa b refize aplikasyon azil ou a oswa aplikasyon pemi travay ou a. 

Depi ane 2026, gen rapò ki fè konnen yo arete kèk moun nan randevou byometrik, sitou moun ki te resevwa lòd depòtasyon (removal order) nan tan pase. Men, pifò moun toujou ale nan randevou byometrik yo san pwoblèm. Pou plis enfòmasyo, klike sou lyen sa. 

Kijan pou w mande pou yo chanje dat randevou byometrik ou a: 

Si ou deside eseye chanje dat randevou byometrik ou a, ou kapa b fè demann lan nan telefòn oswa sou entènèt. Li pi bon pou w fè demann pou chanje dat randevou byometrik ou a pi vit posib anvan dat randevou w la. 

Opsyon 1: Telefòn

• Rele USCIS nan 1-800-375-5283.

• Lè sistèm òdinatè a mande w pou w esplike poukisa w ap rele, ou kapa b di “Reschedule biometrics appointment.” Apre sa, ou ta dwe kapa b pale ak yon reprezantan USCIS pou w chanje dat randevou w la. Pare pou w bay rezon presi ki fè w dwe chanje dat randevou w la epi ki fè w pa kapa b ale. Si USCIS panse rezon w lan pa sifizan, yo kapa b refize chanje dat randevou w la. 

• Apre apèl la, si USCIS apwouve demann ou an, ou ta dwe resevwa yon nouvo lèt randevou pou al fe byometrik nan lapòs. Pote nouvo lèt la avèk ou nan randevou a.

Opsyon 2: Sou entènèt

• Kreye oswa konekte nan kont myUSCIS sou entènèt ou a. Ou kapab gade videyo USCIS sa a sou fason pou kreye yon kont sou entènèt.

• Apre ou fin konekte, si yo mande w pou chwazi ant plizyè opsyon paj entènèt an, ou kapab chwazi “myUSCIS” pou ale nan kont ou a.

• Yon fwa ou nan paj kont myUSCIS ou a, ou kapab kòmanse demann ou an pou yon nouvo randevou byometrik (biometrics appointment). Si w ap itilize yon telefòn, klike sou “Menu” nan kwen anwo adwat la, klike sou “Account actions,” epi klike sou “Reschedule Biometrics.” Si ou sou yon òdinatè, klike sou “My Account” nan kwen anwo adwat la, epi klike sou “Reschedule Biometrics.”

• Swiv enstriksyon yo pou mande yon nouvo randevou byometrik. Chwazi rezon presi ki fè ou pa kapab ale nan randevou w la, oswa antre “Other” epi ekri rezon yo an detay. Si USCIS kwè rezon ou an pa sifizan, yo kapab refize chanje dat randevou w la. 

• Si USCIS apwouve demann ou an pou chanje dat la, ou ta dwe resevwa yon nouvo lèt randevou pou al fe byometrik (biometrics notice) nan kont ou sou entènèt. Enprime epi pote nouvo lèt la nan randevou w la.

• Remak: Ou pa kapab itilize opsyon sou entènèt la si randevou w la se nan mwens pase 12 èdtan oswa si ou te deja chanje dat randevou w la de fwa. Rele USCIS nan 1-800-375-5283 pito.

Si ou te deja rate randevou byometrik ou a, li enfòmasyon sou pwochen etap yo isit la.

Kisa mwen dwe fè si mwen te deja rate randevou byometrik mwen an?

Depi mwa out 2026, USCIS rann li pi difisil pou moun k ap chèche azil yo chanje dat yon randevou byometrik yo te rate. USCIS di ou dwe soumèt yon demann pou chanje dat entèvyou w la nan yon delè 10 jou apre ou fin rate randevou a, epi montre yon rezon “eksepsyonèl”. Egzanp sikonstans eksepsyonèl yo gen ladan vyolans domestik oswa maladi grav.

Si ou vle kontinye ak dosye azil ou a, swiv etap ki anba yo pou mande chanje dat randevou byometrik ou a kou sa posib (ASAP). Si USCIS pa chanje dat randevou byometrik ou a, gen anpil chans pou gen konsekans negatif pou dosye w la.

Swiv etap sa yo pou mande chanje dat randevou byometrik ou a: 

1. Rele USCIS nan 1-800-375-5283.

2. Lè sistèm òdinatè a mande w pou eksplike pou kisa w ap rele, ou kapab di “Reschedule biometrics appointment.” Apre sa, ou ta dwe kapab pale ak yon reprezantan Sant Sèvis USCIS (Contact Center) pou chanje dat randevou w la. Pare pou w eksplike rezon presi ki fè ou dwe chanje dat randevou w la epi pou kisa ou pa kapab ale. Si USCIS kwè rezon ou an pa sifizan, yo kapab refize chanje dat randevou w la. 

3. Apre apèl la, si USCIS apwouve demann ou an, ou ta dwe resevwa yon nouvo biometrics notice nan lapòs. Pote nouvo lèt la nan randevou w la. Si USCIS rejte demann ou an, aprann plis sou konsekans posib yo. 

Anplis rele USCIS, ou kapab eseye ale tou nan biwo USCIS ki make sou lèt randevou pou al fe byometrik ou a. Ale ak lèt la. Ou kapab eksplike ofisye yo sitiyasyon w epi mande yo pou yo pran anprent ak foto w nan moman sa a menm. Gen kèk biwo USCIS ki kapab pèmèt sa. Li enpòtan tou pou w pare pou w eksplike espesyalman pou kisa ou te rate randevou w la. Si ou kapab, pote dokiman pou montre rezon ki fè ou te rate randevou a.  

Sa kapab itil tou pou w jwenn asistans legal pou w konprann opsyon ou genyen yo.

Kisa k pral rive nan dosye m nan si m rate randevou byometrik (biometrics appointment) mwen an epi USCIS pa chanje dat la?

Sa k pral rive apre a depann de ki kalite dosye randevou byometrik la te ye: yon aplikasyon pou pemi travay, yon dosye azil nan tribinal imigrasyon, oswa yon dosye azil ak USCIS.

Aplikasyon pou pemi travay:

USCIS kapa b refize aplikasyon pou pemi travay ou a, epi ou kapa b bezwen soumèt yon nouvo aplikasyon epi peye frè a ankò. Ou kapa b tcheke estati aplikasyon pemi travay ou a lè w sèvi ak zouti USCIS sa a pou tcheke estati dosye.

Dosye azil nan tribinal imigrasyon: 

Jij imigrasyon an kapa b deside refize dosye azil ou a. Rele liy dirèk tribinal imigrasyon an nan 1-800-898-7180 epi ale sou sit entènèt tribinal sa a pou tcheke estati dosye w la

Dosye azil ak USCIS: 

Sa k pral rive apre nan dosye azil ou a depann de estati imigrasyon w. 

• Si ou pa gen lòt estati imigrasyon (tankou Estati Pwoteksyon Tanporè (TPS) oswa yon viza valab ki poko ekspire), USCIS pral pwobableman kòmanse yon dosye nan tribinal imigrasyon kont ou.

• Si ou gen pawol (“parole”), USCIS kapa b deside mete fen nan pawol ou a epi kòmanse yon dosye nan tribinal imigrasyon kont ou. 

• Si ou gen yon lòt estati imigrasyon, USCIS ap anile dosye azil ou a.

Ou kapa b tcheke estati dosye azil ou a lè w sèvi ak zouti USCIS sa a pou tcheke estati dosye. 

Anplis de sa, si sa fè mwens pase 180 jou depi ou te aplike pou azil, lefètke ou rate randevou byometrik ou a kapa b tou reta premye aplikasyon pemi travay ou a.