Ekri pa avoka imigrasyon ekspè ASAP yo · Mizajou nan dat
Desann anba oswa klike sou lyen ki anba yo pou jwenn enfòmasyon sou lòt fòm soulajman nan imigrasyon. Si ou pa sèten si ou ta dwe aplike pou nenpòt nan sa yo, ou kapa b vle chèche èd legal.
Depi nan kòmansman ane 2026, anpil nan opsyon imigrasyon sa yo te sibi konsekans restriksyon imigrasyon pou 40 peyi. USCIS te sispann trete prèske tout aplikasyon imigrasyon pou moun ki soti nan peyi sa yo. Pou plis enfòmasyon, klike sou lyen sa.
Sispansyon depòtasyon (withholding of removal) ak Pwoteksyon anba Konvansyon kont Torti (CAT)
Estati Pwoteksyon Tanporè (TPS) pou imigran ki soti nan peyi espesifik
Estati Espesyal pou Jèn Imigran (SIJS) pou timoun yon paran abandone, maltrete, oswa neglije
Anilasyon Depòtasyon pou imigran ki san papye ki Ozetazini depi plis pase 10 ane
Anilasyon Depòtasyon pou sèten rezidan pèmanan (moun ki gen kat rezidan pèmanan)
Sispansyon depòtasyon ak Pwoteksyon anba Konvansyon kont Torti (CAT)
Menm jan ak azil, sispansyon depòtasyon ak pwoteksyon anba Konvansyon kont Torti (CAT) se fòm pwoteksyon kont depòtasyon pou moun ki pè tounen nan peyi orijin yo.
Sispansyon depòtasyon ak pwoteksyon anba CAT pi difisil pou genyen pase azil. Men, prensipal avantaj sispansyon depòtasyon oswa pwoteksyon anba CAT se ke ou kapa b aplike menmsi ou pa elijib pou azil. Pa egzanp, moun ki gen ansyen lòd depòtasyon (removal order) jeneralman pa kapa b aplike pou azil, men yo kapa b aplike pou sispansyon depòtasyon ak pwoteksyon anba CAT. Epitou, an jeneral ou dwe aplike pou azil nan espas yon ane apre ou fin antre nan peyi Etazini (ak kèk eksepsyon). Men, menm apre yon ane fin pase, ou kapa b toujou aplike pou sispansyon depòtasyon ak pwoteksyon anba CAT.
Pou plis enfòmasyon sou sispansyon depòtasyon ak pwoteksyon anba CAT, ou kapa b li gid sa a.
Kijan pou aplike:
Lè ou depoze aplikasyon azil la, ou aplike otomatikman pou sispansyon depòtasyon (withholding of removal) anplis de azil la. Epi si ou vle aplike tou pou pwoteksyon anba Konvansyon Kont Torti (Convention Against Torture), ou ta dwe koche kaz ki anlè premye paj Fòm I-589 la, ki di “Check this box if you also want to apply for withholding of removal under the Convention Against Torture.” An jeneral, pa gen okenn dezavantaj si ou aplike pou sispansyon depòtasyon ak pwoteksyon anba CAT anmenmtan ou aplike pou azil.
Si oumenm oswa manm fanmi ou depoze Fòm I-589 pou aplike sèlman pou sispansyon depòtasyon oswa pwoteksyon anba CAT nan tribinal imigrasyon, frè azil pou peye chak ane (annual asylum fee) $100 premye fwa a pa ta dwe aplike. Men, nou tande gen kèk jij imigrasyon ki ka toujou mande yon frè pou depoze Fòm I-589 menmsi aplikan an ap aplike sèlman pou sispansyon depòtasyon oswa pwoteksyon anba CAT. Pou plis enfòmasyo sou frè azil yo, klike sou lyen sa.
Si ou gen yon dosye nan tribinal imigrasyon, jij la ta dwe egzamine dosye ou pou sispansyon depòtasyon ak pwoteksyon anba CAT anmenmtan ak dosye azil ou a.
Si ou gen yon dosye nan USCIS, USCIS pa kapab bay sispansyon depòtasyon oswa pwoteksyon anba CAT. Men, ou kapab toujou koche kaz la sou Fòm I-589 la. Si USCIS pa ba ou azil epi yo kòmanse yon dosye nan tribinal imigrasyon kont ou, jij imigrasyon an kapab pran yon desizyon sou azil ou, sispansyon depòtasyon, ak reklamasyon CAT yo anmenmtan.
Kisa ki pase pou manm fanmi yo:
Si oumenm ak manm fanmi ou gen dosye nou ansanm nan tribinal imigrasyon, epi si nou vle aplike pou sispansyon depòtasyon ak pwoteksyon anba CAT, chak manm fanmi dwe soumèt pwòp Fòm I-589 pa yo separe epi koche kaz la. Oumenm ak manm fanmi ou ka vle soumèt aplikasyon azil separe si nou panse nou ka pa kalifye pou azil (pa egzanp, si ou pa t aplike pou azil nan espas yon ane apre ou te antre Ozetazini oswa si nenpòt nan nou gen yon lòd depòtasyon (removal order) anvan sa).
Sa k ap pase si ou genyen:
An jeneral, si ou genyen sispansyon depòtasyon oswa pwoteksyon anba CAT, yo pa kapab depòte w nan peyi orijin ou, epi ou kapab aplike pou yon pemi travay.
Men, kontrèman ak azil, si ou genyen sispansyon depòtasyon oswa pwoteksyon anba CAT, sa p ap pèmèt ou aplike pou rezidans pèmanan (permanent residence) (yo rele tou kat rezidan pèmanan) apre sa. Epi kontrèman ak azil, ou pa kapab mande pwoteksyon pou fanmi ou baze sou lefèt ke ou genyen sispansyon depòtasyon oswa pwoteksyon anba CAT.
Posibilite pou detansyon ak depòtasyon nan yon twazyèm peyi:
Nan ane 2025 ak 2026, gouvènman Ameriken an ap eseye voye kèk imigran nan yon lòt peyi apre yo fin genyen sispansyon depòtasyon oswa pwoteksyon anba CAT, menmsi yo pa t janm ale nan lòt peyi sa a. Gen rapò ki fè konnen sa ap rive toupatou Ozetazini.
Si ou ale nan yon Randevou pou prezante nan yon biwo ICE (ICE check-in) epi ou gen sispansyon depòtasyon oswa pwoteksyon anba CAT, gen yon risk pou gouvènman an ta ka eseye voye w nan yon twazyèm peyi epi mete w nan detasyon (detention).
Si yo ta mete w nan detansyon epi yo di w yo ta ka voye w nan yon lòt peyi, ou kapab aprann kijan pou mande pou yo lage w nan detansyon. Si ou pè pou yo voye w nan peyi sa a, di sa bay plis ofisye imigrasyon ou kapab. Ou kapab eseye tou jwenn èd nan men yon avoka.
Pou plis enfòmasyo sou depòtasyon nan twazyèm peyi, klike sou lyen sa.
Imigran yo ap goumen kont politik sa a atravè yon pwosè.
Estati Pwoteksyon Tanporè (TPS) pou imigran ki soti nan peyi espesifik
TPS se yon estati imigrasyon tanporè yo bay moun ki soti nan peyi espesifik k ap travèse pwoblèm tankou lagè oswa dezas natirèl. Si ou resevwa TPS, yo pa kapab depòte w kite Etazini pandan TPS ou a valid, ou kapab aplike pou yon pemi travay, epi ou kapab aplike pou pèmisyon pou vwayaje andeyò Etazini epi apre sa pou w tounen. Men, TPS pa mennen nan rezidans pèmanan (kat rezidan pèmanan).
Ou kapab aplike pou azil ak TPS anmenmtan. Si ou deside aplike, ou kapab tcheke paj entènèt USCIS sa a epi chwazi fòm imigrasyon w lan pou w jwenn enfòmasyon sou frè yo. Li plis enfòmasyon sou TPS isit la.
Si yo refize aplikasyon TPS ou a, gouvènman an kapab kòmanse yon ka nan tribinal imigrasyon kont ou epi voye yon dokiman ba ou yo rele Avi pou paret nan tribinal (Notice to Appear).
Estati Espesyal pou Jèn Imigran (SIJS) pou timoun yon paran abandone, maltrete, oswa neglije
SIJS se yon estati imigrasyon pou minè yon sèl paran oswa tou de paran te maltrete, abandone, oswa neglije. Ou kapab aplike pou azil ak SIJS anmenmtan.
Men, si ou soti nan youn nan 40 peyi sa yo, USCIS te sispann pran desizyon sou prèske tout benefis imigrasyon, sa gen ladan azil ak SIJS.
Li ka toujou yon bon lide pou w soumèt yon aplikasyon SIJS kounye a si ou elijib, paske w ap pèdi elijiblite w apre w fin gen 18 oswa 21 an, sa depann de nan ki eta w ap viv.
Se tribinal eta kote w ap viv la ki pran premye desizyon pou SIJS la. Paske SIJS disponib sèlman pou aplikan ki gen mwens pase 18 oswa 21 an, li trè enpòtan pou w pale ak yon avoka pi vit posib. Apre tribinal eta a fin pran desizyon sa a, ou kapab soumèt demann SIJS ou a bay USCIS.
Gen yon nouvo frè $250 pou aplike pou SIJS ki pa kapab gen egzansyon. Si ou deside aplike, ou kapab tcheke paj entènèt USCIS sa a pou plis enfòmasyon sou frè a.
Pou plis enfòmasyon sou fason pou w aplike pou SIJS, li gid sa a oswa paj entènèt USCIS sa a. Si ou gen mwens pase 18 an, li enfòmasyon sou resous legal yo.
Si USCIS akòde SIJS, ou ka elijib pou rezidans pèmanan (kat rezidan pèmanan). Sa depann de peyi kote w soti a, ou ka oblije tann yon ti tan anvan ou kapab aplike pou oswa resevwa kat rezidan pèmanan ou.
Si ou te aplike pou SIJS anvan 10 me 2026, USCIS sipoze konsidere ka w la otomatikman pou "aksyon difere" (deferred action). Aksyon difere pwoteje w kont depòtasyon epi li pèmèt ou aplike pou yon pemi travay. Men, sanble USCIS ap refize aksyon difere pou anpil aplikan SIJS.
Si ou aplike pou SIJS nan dat 10 me 2026 oswa apre sa, yo p ap konsidere w otomatikman ankò pou aksyon difere. Okontrè, w ap gen pou w soumèt yon demann separe, men yo ka pa akòde l. Gade memorandòm politik (policy memorandum) USCIS sa a.
Si ou gen yon pemi travay kounye a ki baze sou aksyon difere SIJS, pemi travay ou a rete valid, sof si ou resevwa yon avi nan men USCIS ki mete fen nan aksyon difere w la. Gen kèk rapò ki fè konnen USCIS ap mete fen nan aksyon difere SIJS pou moun ki te deja resevwa l.
Si USCIS refize aplikasyon SIJS ou a, li mete fen nan aksyon difere ou a, oswa li refize demann ou pou aksyon difere, gouvènman an kapa b kòmanse yon ka nan tribinal imigrasyon kont ou epi voye yon dokiman ba ou yo rele Avi pou paret nan tribinal (Notice to Appear).
Si ou gen mwens pase 18 lane, ou kapa b aprann plis sou lòt opsyon imigrasyon.
Viza U pou moun ki viktim krim
Yon Viza U se yon estati imigrasyon pou viktim sèten krim grav nan peyi Etazini ki ede ofisye lapolis yo mennen ankèt oswa pouswiv krim sa a devan lajistis. USCIS pran anpil ane pou trete aplikasyon Viza U yo. Anplis de sa, si ou soti nan youn nan 40 peyi yo, USCIS te fè yon poz nan pran desizyon sou prèske tout benefis imigrasyon, sa gen ladan l viza U yo. Pou plis enfòmasyo, klike sou lyen sa. Si ou pa soti nan youn nan 40 peyi sa yo, yo ta dwe trete aplikasyon Viza U ou a nòmalman.
Pandan aplikasyon Viza U ou a ap tann yon desizyon, ou kapa b aplike pou yon pemi travay.
Si ou resevwa yon Viza U, an jeneral w ap pwoteje kont depòtasyon epi ou kapa b kapab mennen kèk manm fanmi ou Ozetazini. Apre ou fin gen Viza U a pandan twazan, ou kapa b aplike tou pou w vin yon rezidan pèmanan (lawful permanent resident) (kat rezidan pèmanan).
Si yo refize aplikasyon Viza U ou a, gouvènman an kapa b kòmanse yon ka nan tribinal imigrasyon kont ou epi voye yon dokiman ba ou yo rele Avi pou paret nan tribinal.
Ou kapa b aplike pou azil ak yon viza U anmenmtan.
Ou kapa b li gid sa a, gid sa a, oswa paj entènèt an USCIS sa a, pou plis enfòmasyon.
Viza T pou moun ki viktim trafik moun
Yon Viza T se yon estati imigrasyon pou moun ki viktim trafik moun. Trafik moun kapa b gen ladan l lè yo fòse yon moun travay oswa bay sèvis seksyèl.
Si ou deside aplike: Si ou soti nan youn nan 40 peyi yo, USCIS te fè yon poz nan pran desizyon sou prèske tout benefis imigrasyon, sa gen ladan l viza T yo. Pou plis enfòmasyo, klike sou lyen sa. Si ou pa soti nan youn nan 40 peyi sa yo, yo ta dwe trete aplikasyon Viza T ou a nòmalman.
Pandan aplikasyon Viza T ou a ap tann yon desizyon, ou kapa b aplike pou yon pemi travay.
Si ou resevwa yon Viza T, an jeneral w ap pwoteje kont depòtasyon epi ou kapa b kapab mennen kèk manm fanmi ou Ozetazini. Apre ou fin gen Viza T a pandan twazan, ou kapa b aplike tou pou w vin yon rezidan pèmanan (kat rezidan pèmanan).
Si yo refize aplikasyon T-Visa ou a, gouvènman an kapa b kòmanse yon ka nan tribinal imigrasyon kont ou epi voye yon dokiman ba ou yo rele Avi pou paret nan tribinal (Notice to Appear).
Ou kapa b aplike pou azil ak yon T-visa anmenmtan.
Jwenn plis enfòmasyon sou T-Visa sou paj entènèt an sa a (li espesifik pou vil New York men li gen enfòmasyon itil), nan gid sa a pou avoka yo, oswa sou paj entènèt USCIS sa a.
Lwa sou Vyolans kont Fanm (VAWA) pou moun ki siviv abi
VAWA bay estati imigrasyon pou yon mari oswa madanm, paran, oswa pitit yon sitwayen Ameriken oswa yon rezidan pèmanan (lawful permanent resident) (moun ki gen kat rezidan pèmanan) ki te viktim abi. Abi kapa b gen ladan l vyolans fizik oswa lòt mechanste ekstrèm, tankou abi emosyonèl ak seksyèl.
VAWA pèmèt sivivan sa yo fè demann pou tèt yo san èd yon sitwayen Ameriken oswa yon rezidan pèmanan. Yo rele sa yon “oto-petisyon VAWA.” Pou plis enfòmasyon sou oto-petisyon VAWA, ou kapa b li gid sa a sou fason pou rasanble dokiman pou yon petisyon oswa gid sa a pou avoka yo. Ou kapa b li plis enfòmasyon tou sou paj entènèt USCIS sa a.
Men, si ou soti nan youn nan 40 peyi yo, USCIS te sispann pran desizyon sou prèske tout benefis imigrasyon, tankou oto-petisyon VAWA yo. Pou plis enfòmasyo, klike sou lyen sa. Si ou pa soti nan youn nan 40 peyi sa yo, yo ta dwe trete oto-petisyon VAWA ou a nòmalman.
Yon oto-petisyon VAWA ki apwouve kapa b yon chemen pou vin yon rezidan pèmanan (yon moun ki gen “kat rezidan pèmanan”). Men, nan dat 21 me 2026, USCIS te anonse ke li pral sèlman bay rezidans pèmanan Ozetazini nan ka ki “ekstraòdinè” nan sèten kategori, sa ki kapa b gen ladan rezidans pèmanan ki baze sou VAWA.
Si yo refize petisyon VAWA ou a, gouvènman an kapa b kòmanse yon ka nan tribinal imigrasyon kont ou epi voye yon dokiman ba ou yo rele Avi pou paret nan tribinal.
Si ou gen yon ka nan tribinal imigrasyon deja, VAWA pèmèt sèten moun mande yon jij imigrasyon pou “anile” depòtasyon yo pou yo kapa b rete Ozetazini. Pou plis enfòmasyon sou fason pou anile depòtasyon ou anba VAWA, tanpri li gid sa a.
Ou kapa b aplike pou azil ak soulajman anba VAWA anmenmtan.
Opsyon imigrasyon ki baze sou yon relasyon fanmi
Viza imigran ki baze sou fanmi se yon fason pou mennen yon manm fanmi k ap viv andeyò Etazini pou li vin viv Ozetazini. Pwosesis sa a rele “tretman nan konsila.” Nòt: Men, apati 21 janvye 2026, gouvènman ameriken an ap sispann trete viza imigran pou 75 peyi.
Sitwayen ameriken ka fè demann viza pou mari oswa madanm yo, pitit yo, paran yo, oswa frè ak sè yo ki aletranje.
Rezidan pèmanan (lawful permanent resident) (moun ki gen kat rezidan pèmanan) ka fè demann viza pou mari oswa madanm yo oswa pitit yo ki pa marye ki aletranje.
Si demann lan reyisi, manm fanmi an ka antre Ozetazini kòm yon rezidan pèmanan.
Pou plis enfòmasyon sou viza imigran ki baze sou fanmi, vizite paj entènèt gouvènman sa a.
“Ajisteman estati” (adjustment of status) ki baze sou fanmi se yon fason pou mande rezidans pèmanan (permanent residence) pou kèk manm fanmi ki deja Ozetazini. Nan pifò ka, manm fanmi an dwe te antre Ozetazini avèk pèmisyon, tankou yon viza oswa pawòl (“parole”), menmsi pèmisyon sa a ekspire kounye a. Nòt: Si ou soti nan youn nan 40 peyi, USCIS sispann pran desizyon sou prèske tout benefis imigrasyon, enkli ajisteman estati. Pou plis enfòmasyon, klike sou lyen sa. Si ou pa soti nan youn nan 40 peyi sa yo, yo ta dwe trete aplikasyon w lan nòmalman.
Sitwayen ameriken ka kapab ede mari oswa madanm yo, pitit yo, paran yo, oswa kèk frè ak sè ki Ozetazini pou yo fè “ajisteman estati” epi vin rezidan pèmanan.
Nan kèk ka, yon rezidan pèmanan ka ede yon manm fanmi tou pou li fè ajisteman estati, men li pi difisil.
Nan dat 21 me 2026, USCIS te anonse li pral sèlman bay kat rezidan pèmanan Ozetazini nan ka ki “ekstraòdinè”. Yo ka rejte aplikan pou kat rezidan pèmanan ki baze sou fanmi yo selon diskresyon yo, menmsi yo ranpli tout lòt kondisyon legal yo.
Ajisteman estati kapab yon pwosesis konplike, sitou si manm fanmi an te antre Ozetazini san pèmisyon oswa si li gen yon lòd depòtasyon (removal order). Yo ka bezwen tounen nan peyi orijin yo, mande yon “egzansyon” (waiver) pou sèten penalite, epi pase nan yon pwosesis separe ki rele “tretman nan konsila.” Pwosesis sa a ka pran anpil tan, epi pa gen garanti y ap pèmèt manm fanmi an tounen Ozetazini.
Yon aplikasyon ajisteman estati ki baze sou fanmi pa bay estati imigrasyon toutotan yo pa apwouve li. Si manm fanmi an pa gen yon lòt estati imigrasyon, gouvènman an ka kòmanse yon ka nan tribinal imigrasyon kont li epi voye yon dokiman ba li ki rele Avi pou paret nan tribinal (Notice to Appear) pandan aplikasyon an ap tann desizyon oswa si yo rejte li. Gen yon aplikasyon ajisteman estati k ap tann desizyon pa anpeche yo mete yon moun nan detansyon tou.
Pou plis enfòmasyon sou ajisteman estati, li gid sa a. Ou ka li tou sou mezi sekirite yo isit la.
Si w ap konsidere youn nan posiblite sa yo, sa ka ede w diskite sou opsyon w yo ak yon avoka imigrasyon. Chèche yon avoka toupre w. Si w deside aplike, ou ka tcheke paj entènèt USCIS sa a epi chwazi fòm imigrasyon w lan pou w jwenn enfòmasyon sou frè yo.
Opsyon imigrasyon ki baze sou travay
Gen diferan kalite viza ki disponib pou moun yon anplwayè Ozetazini ap patwone. Viza ki baze sou travay yo kapab yon pwosesis konplike epi se pa tout moun ki elijib, sa depann de istwa imigrasyon ou. Nan dat 21 me 2026, USCIS te anonse li pral sèlman bay kat rezidan pèmanan Ozetazini nan ka ki “ekstraòdinè”. Yo ka refize aplikan pou kat rezidan pèmanan ki baze sou travay yo selon diskresyon yo, menm si yo ranpli tout lòt kondisyon legal yo.
Pou plis enfòmasyon sou viza imigran ki baze sou travay, ou menm ak yon anplwayè k ap patwone w ka vle konsilte yon avoka imigrasyon anvan ou aplike. Ou kapab li plis tou sou viza travay sou sit entènèt sa a.
Viza travay tanporè: Gen kèk viza yon anplwayè patwone ki tanporè. Yon viza travay tanporè ki komen se viza H-1B pou “moun ki gen yon espesyalite nan yon pwofesyion,” ki anjeneral mande pou pi piti yon diplòm bakaloreya. Lòt viza travay tanporè gen ladan viza L-1, ki baze sou transfè nan menm konpayi an soti andeyò peyi Etazini pou vini anndan peyi Etazini; yon viza O-1, ki baze sou kapasite ekstraòdinè nan domèn espesifik; yon viza E-1 oswa E-2, ki baze sou komès ak envestisman ki soti nan peyi espesifik; ak viza H-2, ki baze sou travay sezonye tankou nan agrikilti oswa nan endistri touris. Ou kapab li plis sou sit entènèt USCIS sa a ak sou sit entènèt Depatman Deta Ameriken sa a.
Nòt: Men, si ou soti nan youn nan 40 peyi sa yo, USCIS te sispann trete prèske tout benefis imigrasyon, epi ou ka te afekte pa sa. Pou plis enfòmasyon, klike sou lyen sa.
Viza EB: Lòt viza yon anplwayè patwone ka bay yon chemen alontèm pou jwenn yon kat rezidan pèmanan (permanent residence) pou anplwaye a, mari oswa madanm li, ak pitit li ki pa marye ki gen mwens pase 21 an. Gen 5 kategori preferans ki baze sou travay. Chak kategori gen yon seri kondisyon pou edikasyon ak eksperyans travay. Pwosesis la gen plizyè etap, ladan yo anplwayè Ozetazini an dwe pwouve pa gen travayè ameriken ki kalifye ki disponib epi anplwaye imigran an p ap resevwa yon salè ki pi ba pase sa yon travayè ameriken ta resevwa. Ou kapab li plis sou sit entènèt USCIS sa a ak sou sit entènèt Depatman Deta Ameriken sa a.
Nòt: Men, apati 21 janvye 2026, gouvènman Ameriken an ap sispann trete viza imigran pou 75 peyi.
Lwa sou Ajisteman Kiben (CAA)
Lwa sou Ajisteman Kiben (CAA) se yon kalite estati imigrasyon pou kèk moun ki soti Kiba. Dapre CAA, sèten imigran ki soti Kiba kapab aplike pou yo vin rezidan pèmanan (lawful permanent resident) (moun ki gen kat rezidan pèmanan) Ozetazini. Yo rele sa tou “ajisteman estati (adjustment of status).” Men, kòmanse nan ane 2026, USCIS te sispann pran desizyon sou prèske tout benefis imigrasyon, enkli ajisteman estati, pou moun ki soti Kiba ak 39 lòt peyi. Pou plis enfòmasyon, klike sou lyen sa. Ou kapab toujou soumèt yon aplikasyon, men ou ka pa resevwa yon desizyon jiskaske USCIS leve poz la nèt.
Si ou soti Kiba, ou kapab elijib pou CAA si ou:
Te resevwa yon pawol (“parole”) oswa ou te antre Ozetazini ak yon viza, epi
Ou gen omwen yon ane depi w ap viv Ozetazini.
Menm si ou menm ou pa soti Kiba, ou ta kapab elijib pou CAA si ou se mari/madanm oswa pitit ki gen mwens pase 21 an yon imigran ki soti Kiba ki elijib. Mari/madanm ak pitit yo dwe ranpli de kondisyon ki nan lis anlè a tou.
Ou kapab montre ou te resevwa yon pawòl si ou gen yon dokiman gouvènman Ameriken an ba ou ki di “212(d)(5) parole.” Ou kapab wè egzanp diferan kalite dokiman pawòl isit la, isit la, isit la, ak isit la.
Si ou pa t resevwa yon dokiman pawòl, men ou te resevwa yon Fòm I-220A, Lòd yon jij ba y pou lage yon moun pwovizwaman pandan dosye l ap kontinye (Order of Release on Recognizance), ou ka swete pale ak yon avoka sou opsyon ou genyen yo. Ou kapab jwenn èd legal isit la.
Pou plis enfòmasyon sou Lwa sou Ajisteman Kiben an, ou kapab li paj entènèt sa a ki soti nan gouvènman Etazini an. Si ou deside aplike, ou kapab tcheke paj entènèt USCIS sa a epi chwazi fòm imigrasyon w lan pou w jwenn enfòmasyon sou frè yo.
Si yo refize aplikasyon w lan, gouvènman an kapab kòmanse yon ka nan tribinal imigrasyon kont ou epi voye yon dokiman ba ou yo rele yon Avi pou paret nan tribinal (Notice to Appear).
Anilasyon Depòtasyon pou imigran ki san papye ki gen plis pase 10 ane Ozetazini
Kèk moun ki pa gen estati imigrasyon ki te viv Ozetazini pandan plis pase dizan kapab mande yon jij imigrasyon pou anile depòtasyon yo pou yo ka rete Ozetazini, men se sèlman si yo gen yon paran, mari/madanm, oswa pitit ki se sitwayen Ameriken oswa rezidan pèmanan epi depòtasyon yo a ta lakòz paran, mari/madanm, oswa pitit sa a yon “soufrans eksepsyonèl ak trè etranj.” Sa se yon estanda ki trè wo, epi li difisil pou yon moun ranpli l.
Pou plis enfòmasyon sou anilasyon depòtasyon pou moun ki gen dizan yo, tanpri li gid sa a. Si ou deside aplike, ou kapab tcheke paj entènèt USCIS sa a epi chwazi fòm imigrasyon w lan pou w jwenn enfòmasyon sou frè yo.
Anilasyon Depòtasyon pou sèten rezidan pèmanan (moun ki gen kat rezidan pèmanan)
Gen kèk rezidan pèmanan (lawful permanent resident) (moun ki gen kat rezidan pèmanan) ki kapa b mande yon jij imigrasyon pou anile depòtasyon yo pou yo ka rete Ozetazini si: (1) yo gen estati rezidan pèmanan depi omwen 5 an, (2) yo te viv san rete Ozetazini pandan omwen 7 an, epi (3) yo pa t janm kondane pou yon “krim grav anpil” (aggravated felony).
Pou plis enfòmasyon sou anilasyon depòtasyon pou sèten rezidan pèmanan, tanpri li gid sa a oswa gid sa a. Si ou deside aplike, ou kapa b tcheke sit entènèt USCIS sa a epi chwazi fòm imigrasyon w lan pou w jwenn enfòmasyon sou frè yo.
Estati refijye
Estati refijye se yon fòm estati imigrasyon pou moun ki pè tounen nan peyi orijin yo paske yo fè fas ak menas oswa danje la. Nan sans sa a, li sanble ak azil. Men, refijye yo aplike pou estati imigrasyon anvan yo vini Ozetazini, epi moun k ap chèche azil yo aplike apre yo fin rive Ozetazini. Si yo apwouve yon moun k ap aplike pou estati refijye, li antre Ozetazini avèk estati refijye. Li pa posib pou w aplike pou estati refijye yon fwa ou deja Ozetazini.
Si ou andeyò peyi Etazini, li trè posib ke li pa posib pou w vini Ozetazini kòm refijye nan moman sa a. Nan mwa janvye 2025, gouvènman ameriken an te sispann aksepte prèske tout nouvo refijye Ozetazini. Gouvènman an pa di ki lè y ap kòmanse aksepte refijye ankò. Imigran yo depoze yon demann lajistis kont politik sa a. Si ou andeyò peyi Etazini epi ou gen kesyon sou estati refijye, ou kapa b kontakte òganizasyon tankou International Refugee Assistance Project (IRAP), UNHCR (Ajans Refijye Nasyonzini an), HIAS, ak CWS.
Si ou deja Ozetazini avèk estati refijye, anba a se enfòmasyon enpòtan pou w konnen.
Pemi travay ak benefis piblik: Si ou te antre Ozetazini ak estati refijye, ou gen otorizasyon pou travay epi ou ta dwe resevwa pemi travay ou yon ti tan apre ou fin rive nan peyi Etazini. Ou elijib tou pou sèten benefis piblik. Pou plis enfòmasyon, klike sou lyen sa.
Aplike pou yon kat rezidan pèmanan apre yon ane: Apre ou fin pase yon ane Ozetazini kòm refijye, ou oblije ranpli Fòm I-485 nan USCIS pou mande rezidans pèmanan (lawful permanent resident) (yon kat rezidan pèmanan). Ou kapa b jwenn plis enfòmasyon sou paj entènèt USCIS sa a. Pandan entèvyou pou kat rezidan pèmanan an, gouvènman an kapa b poze anpil kesyon sou fason ou te jwenn estati refijye ou a.
Poz sou apwobasyon kat rezidan pèmanan: Gouvènman an mete yon poz sou apwobasyon final Fòm I-485 pou vin yon rezidan pèmanan (moun ki gen kat rezidan pèmanan) pou refijye ki te antre Ozetazini ant 20 janvye 2021 ak 20 fevriye 2025. Refijye ki te antre nan dat sa yo kapa b toujou ranpli Fòm I-485 epi yo kapa b planifye yon randevou pou yo pou yon entèvyou, men yo p ap ba yo rezidans pèmanan pou kounye a.
Detasyon: Nan dat 18 fevriye 2026, gouvènman an te anonse li planifye pou l mete nan detasyon nenpòt refijye ki poko vin yon rezidan pèmanan. Men, refijye yo te depoze yon pwose nan tout peyi a pou konteste politik sa a, epi nan dat 23 mas 2026, yon tribinal te bloke gouvènman an pou l pa mete refijye nan detasyon pou kounye a. Ranpli Fòm I-485 ASAP kapa b toujou diminye risk pou yo mete w nan detasyon si gouvènman an ta vin gen dwa mete refijye nan detasyon pi devan.
Re-entèvyou: Gouvènman an kapa b refè entèvyou pou refijye ki te antre Ozetazini ant 20 janvye 2021 ak 20 fevriye 2025. Sa gen ladan l moun ki deja vin rezidan pèmanan. Gouvènman an ap revize dosye rezidan pèmanan yo tou pou yon posib depòtasyon si yo te arete yo oswa si yo te kondane yo pou sèten krim, oswa si gouvènman an sispèk yo nan fwod. Pou plis enfòmasyon, klike sou lyen sa.
Ou kapa b vle chèche èd nan men yon avoka pou diskite sou opsyon ou yo.
ASAP (Pwojè ki an Defans pou Moun k ap Chèche Azil) vize bay enfòmasyon ki baze sou reyalite konsènan lwa imigrasyon aktyèl yo. Enfòmasyon sa yo se pa konsèy legal.
Tout kontni legal yo ekri epi yo revize legalman pa ekip avoka ekspè nan imigrasyon ASAP yo. Avoka ekspè ASAP yo gen plizyè dizèn ane eksperyans nan lwa imigrasyon ak nan litij. Kolektifman, yo genyen plizyè santèn ka. Avoka nou yo admèt nan Baro nan plizyè eta Ozetazini, yo gen diplòm nan lwa nan inivèsite tankou Harvard, Yale, ak UCLA, epi yo genyen plizyè prim pou travay legal yo.