Aplikasyon pou Azil ak Prèv

Kouman pou mwen depoze aplikasyon azil mwen an nan tribinal imigrasyon?

Ou kapab swiv etap ki anba yo pou aplike pou azil nan tribinal imigrasyon epi gade videyo sa a pou jwenn enstriksyon etap pa etap sou fason pou ranpli fòm I-589 la. 

1. Ranpli Fòm I-589 ou a.

• Telechaje oswa enprime Fòm I-589 la. Telechaje fòm nan dirèkteman sou paj entènèt an USCIS sa a pou asire w ou jwenn dènye vèsyon fòm nan. Klike sou onglet ki di “Forms and Document Downloads” epi klike sou “Form I-589.”

• Fòm I-589 la an Anglè. Ou kapab jwenn vèsyon tradui Fòm I-589 la ak enstriksyon yo nan kèk lòt lang lè w klike sou onglet ki di “Forms in Other Languages” ki toupre anba paj la. Men, ou dwe ranpli vèsyon Anglè fòm nan.

• Revize kondisyon pou azil yo epi gade videyo sa a pou ede w òganize lide w.

• Fòm nan long. Men, pa kite sa dekouraje w! Ou kapab gade videyo sa a pou jwenn enstriksyon etap pa etap sou fason pou ranpli aplikasyon azil la.

• Repons ou yo dwe ekri an Anglè.

• Li chak kesyon avèk atansyon. Tout repons ou yo dwe konplè, egzat, epi sensè. Gen kèk jij imigrasyon k ap fèmen dosye azil san yo pa fè yon odyans konplè si yo deside dosye azil la pa ase solid oswa si repons ki nan aplikasyon azil la pa gen ase detay. Reponn chak kesyon osi konplè ke posib.

• Anpil aplikan koche kaz ki anlè Paj 1 an ki di, “Check this box if you also want to apply for withholding of removal under the Convention Against Torture.” Koche kaz sa a kapab enpòtan pou ou pa pèdi opòtinite pou mande tout fòm pwoteksyon ki ta ka aplikab pou ou. Pafwa moun kapab genyen sispansyon depòtasyon (withholding of removal) oswa pwoteksyon anba Konvansyon Kont Torti, menmsi yo pa genyen azil.

• Apre ou fin ranpli l, revize tout aplikasyon an nèt pou w wè si gen erè.

• Si w ap ranpli aplikasyon an sou papye epi w ap ekri ak men, asire w ekriti w la klè epi li fasil pou moun li. Sèvi ak yon plim nwa.

• Chonje siyen epi mete dat sou aplikasyon w lan.

• Fè yon kopi paspò w. Asire w ou mete tout paj paspò a, san wete kouvèti yo. Sa obligatwa, si w gen youn. Si w pa gen paspò, mete yon lèt ki esplike ou pa gen paspò.

• Ou kapab gen dwa mete mamb fanmi ki kalifye nan dosye azil ou a. Si w ap mete manm fanmi, ou ta dwe mete yon kopi yon sètifika maryaj oswa yon sètifika nesans ki pwouve relasyon fanmi yo genyen avèk ou, epi yon kopi paspò chak manm fanmi (tout paj yo, san wete kouvèti yo). Sa obligatwa, si w ap mete yon manm fanmi. 

• Si yon moun te ede w prepare fòm nan oswa li te sèvi w entèprèt, li dwe ranpli seksyon pou preparatè oswa entèprèt la.

2. Peye frè depoze $100 la.

• Peye frè $100 la sou sit entènèt tribinal imigrasyon sa a. Antre nimewo alyen (A number) ou. Pou “Filing Type,” chwazi “Court - I-589, Application for Asylum (Initial Filing).” 

• Ou kapab peye ak yon kat debi oswa kredi, yon kont PayPal, Amazon pay, oswa yon kont labank. Ou kapab achte yon kat pre-peye tou nan anpil gwo magazen epi sèvi avè l pou peye frè a. Asire w ou kite ase lajan sou kat la pou kouvri frè depoze a. 

• Telechaje epi enprime resi a. W ap bezwen mete resi a ansanm ak aplikasyon azil ou a. Kenbe yon kopi resi a ak Nimewo Suivi Peman (Payment Tracking ID) ou pou dosye w.

• Ou kapab gade videyo sa a tou sou fason pou peye frè azil inisyal la nan tribinal imigrasyon.

3. Prepare pakè aplikasyon w lan.

• Rasanble pakè aplikasyon an nan lòd sa a:

  • Fòm I-589 (tout repons yo ranpli, siyen, epi ak dat)  

  • Resi peman frè depoze dosye a

  • Kopi paspò (tout paj yo) 

  • Si w ap mete yon manm fanmi, yon kopi sètifika maryaj oswa batistè ki montre relasyon fanmi an, ak yon kopi paspò yo (tout paj yo)

  • Si nenpòt dokiman pa nan lang Anglè, ou ta dwe mete tou yon tradiksyon Anglè ak yon sètifika tradiksyon. 

• Fè 2 kopi pakè aplikasyon an:

  • Pakè aplikasyon orijinal la pou jij la.

  • Yon kopi pou avoka gouvènman an.

  • Yon kopi pou ou kenbe nan dosye w.

• Si w ap soumèt aplikasyon azil ou a pa lapòs oswa nan fenèt kote yo depoze dosye nan tribinal imigrasyon an, ou ta dwe mete tou yon sètifika sèvis (certificate of service). (Si w ap soumèt aplikasyon azil ou a pandan yon odyans nan tribinal imigrasyon, ou pa bezwen mete yon sètifika sèvis.)

  • Yon sètifika sèvis se yon dokiman ki deklare ou te voye yon dokiman bay avoka gouvènman an. Ou kapab telechaje epi ranpli sètifika sèvis sa a.

  • Ou kapab jwenn adrès avoka gouvènman an (OPLA) pou tribinal imigrasyon w lan sou tablo sa a. Ou kapab voye kopi avoka gouvènman an tou sou entènèt atravè ICE eService. Nòt: ICE eService pa voye aplikasyon w lan bay tribinal imigrasyon an.

• Si w ap soumèt aplikasyon azil ou a pa lapòs, ou ta dwe mete tou yon anvlòp ki gen adrès ou ak yon tenm, pou tribinal imigrasyon an kapab voye yon kopi ki gen yon sèl (stamped copy) tounen ba ou pa lapòs.

• Ou kapab mete lòt prèv sipò.

4. Soumèt pakè aplikasyon w lan. Ou gen twa opsyon pou fason pou w fè sa. Nan kèk ka limite, ka gen yon katriyèm opsyon tou.

• Opsyon 1. Ou kapab soumèt dosye aplikasyon w lan an pèsòn pandan odyans ou a.

  • Ou kapab bay jij la orijinal aplikasyon azil ou a ak de kopi ou te prepare yo. Jij la ta dwe mete yon tenm sou yo ak dat ou te depoze aplikasyon azil ou a. Jij la ta dwe kenbe orijinal la, epi remèt ou de kopi yo.

  • Bay avoka gouvènman an youn nan kopi yo, epi kenbe lòt kopi a pou achiv ou. Kopi sa a se resi w ki pwouve ou te soumèt aplikasyon azil ou a.

• Opsyon 2. Ou kapab soumèt dosye aplikasyon azil ou a an pèsòn nan fenèt depo nan tribinal imigrasyon.

  • Pote orijinal aplikasyon azil la, de kopi, ak yon sètifika sèvis nan fenèt depo nan tribinal imigrasyon w lan. Grefye a ta dwe kenbe orijinal la ak sètifika sèvis la. Grefye a ta dwe mete yon tenm sou kopi yo ak dat ou te depoze aplikasyon azil ou a, epi remèt ou yo.

  • Kenbe yon kopi pou achiv ou. Kopi a se resi w ki pwouve ou te soumèt aplikasyon azil ou a.

  • Lòt kopi a dwe voye bay avoka gouvènman an. Ou kapab fè sa lè ou:

    • Pote kopi a nan biwo avoka gouvènman an, ki pafwa sitiye nan menm bilding ak tribinal imigrasyon an.

    • Voye l pa lapòs bay avoka gouvènman an. Ou kapab jwenn adrès avoka gouvènman an (OPLA) pou tribinal imigrasyon w lan sou tablo sa a.

    • Voye l sou entènèt nan sèvi ak ICE eService.

• Opsyon 3. Ou kapab voye dosye aplikasyon azil ou yo pa lapòs bay tribinal imigrasyon ak avoka gouvènman an.

  • Asire w ou sèvi ak yon sèvis lapòs ki ofri swivi. Ou kapab gade videyo sa a pou aprann sou diferan fason pou voye dokiman w yo pa lapòs.

  • Voye orijinal aplikasyon azil la, yon kopi aplikasyon an, ak sètifika sèvis la bay tribinal imigrasyon an. Mete tou yon anvlòp vid ki gen adrès ou ak yon tenm sou li. Tribinal imigrasyon an ta dwe mete yon tenm sou kopi aplikasyon azil ou a ak dat ou te depoze aplikasyon azil ou a, epi answit voye l tounen ba ou nan anvlòp la. Kopi a se resi w ki pwouve ou te soumèt aplikasyon azil ou a epi jeneralman y ap sèvi avè l pou detèmine ki lè ou kapab aplike pou yon pemi travay. Ou kapab sèvi ak jwenn adrès tribinal imigrasyon yo isit la oswa isit la.

  • Voye yon lòt kopi bay avoka gouvènman an. Ou kapab jwenn adrès avoka gouvènman an (OPLA) pou tribinal imigrasyon w lan sou tablo sa a. Ou kapab voye kopi avoka gouvènman an tou sou entènèt atravè ICE eService. Remak: ICE eService pa voye aplikasyon w lan bay tribinal imigrasyon an.

• Opsyon 4. Nan kèk ka, ou kapab soumèt aplikasyon azil ou a sou entènèt.

  • Si ou gen yon avoka, avoka w la kapab soumèt aplikasyon azil ou a sou entènèt. 

  • Si ou pa gen avoka, ou kapab soumèt aplikasyon azil ou a sou entènèt si ou te anrejistre pou yon kont sou sit entènèt tribinal imigrasyon (Respondent Access Portal).

  • Aplikasyon azil ou a ap resevwa yon tenm elektwonik ak dat ou te soumèt li a.

5. Ale nan yon randevou byometrik, si sa nesesè.

• Gen kèk moun ki aplike pou azil nan tribinal imigrasyon ki oblije ale nan yon randevou byometrik (biometrics appointment) (randevou pou pran anprent). Si ou oblije fè sa, w ap resevwa yon lèt randevou pou al fe byometrik (biometrics notice) pa lapòs.

6. Kontinye ak dosye azil ou nan tribinal imigrasyon.

• Sitiyasyon pou moun k ap chèche azil nan tribinal imigrasyon ap chanje rapidman epi li vin pi difisil. Pa egzanp, anpil dosye azil ap fini anvan moun k ap chèche azil la gen chans pou l prezante dosye l nan tribinal imigrasyon, epi gen plis moun k ap chèche azil ki gen dosye k ap tann ki nan detansyon (detention). Pou plis enfòmasyon, klike sou lyen sa a konsènan pwosesis tribinal imigrasyon an. Ou kapab jwenn enfòmasyon ki ajou tou sou jan lwa yo ap chanje pou moun k ap chèche azil yo.

• Ou kapab soumèt plis prèv anvan randevou devan jij (individual or merits hearing) ou a.

• Tcheke bwat lèt ou pou w wè si w resevwa avi pou randevou nan tribinal epi tcheke estati dosye w regilyèman.

• Ou kapab aplike pou yon pemi travay 150 jou apre ou fin soumèt aplikasyon azil ou a. Li enfòmasyon sou kijan pou w aplike pou premye pemi travay ou.

• Si dosye w la rete ap tann pandan 1 an oswa plis, tribinal imigrasyon an mande pou w peye yon frè azil pou peye chak ane (annual asylum fee) chak ane.

• Li enfòmasyon sou mezi sekirite pou moun k ap chèche azil yo.

Kouman pou mwen voye aplikasyon azil mwen an bay USCIS pa lapòs?

Gen de fason ou kapab soumèt aplikasyon azil ou a bay USCIS: pa lapòs oswa sou entènèt. Ou kapab swiv etap ki anba yo pou w aplike pa lapòs epi gade videyo sa a pou w jwenn enstriksyon etap pa etap sou fason pou w ranpli fòm I-589 la. Si ou prefere aplike sou entènèt, jwenn enstriksyon pou aplike sou entènèt isit la.

1. Ranpli Fòm I-589 ou a.

• Telechaje oswa enprime Fòm I-589 la. Telechaje fòm nan dirèkteman sou paj entènèt an USCIS sa a pou w sèten ou gen dènye vèsyon fòm nan. Klike sou onglet ki di “Forms and Document Downloads” epi klike sou “Form I-589.”

• Fòm I-589 la an anglè. Ou kapab jwenn vèsyon Fòm I-589 ki tradui ak enstriksyon yo nan kèk lòt lang lè ou klike sou onglet ki di “Forms in Other Languages” ki toupre anba paj la. Men, ou dwe ranpli vèsyon anglè fòm nan.

• Revize kondisyon pou azil yo epi gade videyo sa a pou ede w òganize lide w.

• Fòm nan long. Men, pa kite sa dekouraje w! Ou kapab gade videyo sa a pou jwenn enstriksyon etap pa etap sou fason pou w ranpli aplikasyon azil la.

• Repons ou yo dwe ekri an anglè.

• Li chak kesyon avèk atansyon. Tout repons ou yo dwe konplè, egzat, epi sensè. Si gen yon kesyon ki pa konsène w oswa si w pa konnen yon repons, ou kapab reponn "none," "not applicable," oswa "unknown."


• Anpil aplikan koche kaz ki anlè nan Paj 1 an ki di, “Check this box if you also want to apply for withholding of removal under the Convention Against Torture.” Li kapab enpòtan pou w koche kaz sa a pou w pa pèdi opòtinite pou w mande tout fòm pwoteksyon ki ta kapab aplikab pou ou. Malgre USCIS pa kapab akòde sispyansyon depòtasyon (withholding of removal) oswa pwoteksyon anba Konvansyon kont Torti (CAT), si USCIS pa akòde w azil, li kapab posib pou w genyen fòm pwoteksyon sa yo pita nan tribinal imigrasyon.

• Ou kapab gen posiblite pou w enkli manm fanmi ki kalifye nan dosye azil ou a.

• Apre w fin fini, revize tout aplikasyon an nèt pou w sèten ou reponn chak kesyon epi pou w korije nenpòt erè.

• Si w ap ranpli aplikasyon an sou papye epi w ap ekri ak men, asire w ekriti w la klè epi li fasil pou moun li. Sèvi ak yon plim nwa.

• Chonje siyen epi mete dat sou aplikasyon w lan.

• Si yon moun te ede w prepare fòm nan oswa li te sèvi w entèprèt, yo dwe ranpli seksyon pou preparatè oswa entèprèt la.

2. Rasanble dokiman sipò yo 

Nan dat 28 jiyè 2026, USCIS te anonse yon nouvo règleman ki pèmèt ofisye azil yo transfere kèk dosye dirèkteman nan tribinal imigrasyon san yo pa fè entèvyou, donk ou kapab gen yon sèl chans sèlman pou w bay prèv nan dosye w la ak USCIS. Ou ta dwe eseye enkli nenpòt dokiman sipò ou genyen ansanm ak aplikasyon w lan. Ou kapab jwenn egzanp dokiman sipò ki kapab itil pou montre USCIS ou elijib pou azil.

3. Prepare dosye aplikasyon w lan.

Ou kapab enkli dokiman ki anba yo, nan lòd sa a. Pa agrafe paj yo – ou kapab sèvi ak yon kranpon (paperclip), yon gwo kranpon (binder clip), oswa elastik pito pou kenbe tout paj yo ansanm.

• Fòm G-1145 (si ou vle). Si ou vle, ou kapa b mete Fòm G-1145 pou resevwa avi sou aplikasyon w lan pa mesaj tèks oswa pa imèl.

• Fòm I-589 ou a ki byen ranpli.

• Yon kopi paspò w, si ou genyen youn. Si sa posib, mete yon kopi chak paj, san w pa bliye kouvèti devan ak dèyè yo.

• Yon kopi Fòm I-94 ou a, si ou genyen youn. Li ka sanble ak sa a, sa a, oswa sa a.

• Si w ap mete mari/madanm ou oswa pitit ou nan dosye azil ou a, ou ta dwe mete tou:

  • Yon kopi yon dokiman ki pwouve relasyon fanmi nou – pa egzanp, yon kopi ak de nesans pou yon pitit oswa yon kopi ak de maryaj pou yon mari/madanm.

  • Yon kopi paspò manm fanmi w lan (tout paj yo, san w pa bliye kouvèti yo) ak Fòm I-94, si yo genyen youn.

• Si w ap aplike pou azil plis pase 1 an apre w fin antre Ozetazini, ou kapa b mete prèv sou rezon ki fè w ap aplike apre 1 an. Pa egzanp, si ou te nan yon estati legal, tankou Estati Pwoteksyon Tanporè (TPS) oswa pawol (“parole”), ou kapa b bay kopi dokiman sa yo.

• Si ou te gen yon dosye nan tribinal imigrasyon nan tan pase men yo te anile li, ou kapa b mete prèv ki montre yo te anile dosye w la (tankou yon kopi lòd jij imigrasyon an) ak prèv ki montre ou te aplike pou azil nan tan pase, si ou te deja soumèt yon aplikasyon azil nan tribinal imigrasyon.

• Tache prèv sipò w yo ak aplikasyon azil ou a. Pou plis enfòmasyo, klike sou lyen sa a sou lòt prèv isit la.

• Si yon dokiman pa nan lang Anglè, ou ta dwe mete tou yon tradiksyon an Anglè ak yon sètifika tradiksyon.

4. Ajoute peman an.

Li koute $100 pou aplike pou azil ak USCIS. Gen kèk fason diferan pou peye frè depozisyon an:

• Kat Kredi oswa Kat Debi. Pou peye ak yon kat kredi oswa yon kat debi, ranpli Fòm G-1450. Mete fòm nan anlè aplikasyon azil ou a. Si ou pa gen yon kat kredi oswa debi, ou kapa b sèvi ak kach pou achte yon kat pre-peye nan anpil gwo magazen. Asire w ou kite ase lajan sou kat la pou kouvri frè depozisyon an.

• Kont Bankè. Pou peye pa debi elektwonik (ACH) apati yon kont bankè Ozetazini, ranpli Fòm G-1650. Mete fòm nan anlè aplikasyon azil ou a.

• Chèk. Pou peye pa chèk si ou pa gen aksè ak yon kat kredi oswa yon kont bankè, ou dwe siyen epi mete tou Fòm G-1651, Egzansyon pou Peman Frè sou Papye, anlè Fòm I-589 la ansanm ak chèk ou a. Fè chèk la nan non “U.S. Department of Homeland Security”. Ekri nimewo alyen (A number) ou a (pa egzanp, A# 000-000-000) yon kote sou chèk la. 

• Moni odè. Pou peye pa moni odè si ou pa gen aksè ak yon kat kredi oswa yon kont bankè, ou dwe siyen epi mete tou yon Fòm G-1651, Egzansyon pou Peman Frè sou Papye anlè Fòm I-589 la ansanm ak moni odè ou a. Ou kapa b achte yon moni odè nan yon biwo lapòs, yon bank, ak nan kèk magazen. Fè moni odè a nan non “U.S. Department of Homeland Security”. Ekri nimewo alyen ou a (pa egzanp, A# 000-000-000) yon kote sou moni odè a.  

5. Fè yon kopi tout dosye a epi kenbe l pou achiv ou.

6. Voye dosye aplikasyon orijinal la bay USCIS pa lapòs.

• Asire w ou sèvi ak yon sèvis lapòs ki bay yon nimewo swivi. Ou kapab gade videyo sa a pou w aprann sou diferan fason ou ka voye dokiman w yo pa lapòs.

• Adrès USCIS kote ou dwe voye dosye aplikasyon w lan depann de kote w ap viv. Ou ka jwenn bon adrès la lè w ale sou paj entènèt an USCIS sa a, epi gade anba seksyon “Where To File.”

• Men, si ou nan youn nan sitiyasyon espesyal ki dekri nan onglet “Special Instructions” sou paj entènèt an USCIS sa a, ou dwe soumèt aplikasyon azil ou a nan yon sant tretman espesyal yo rele Asylum Intake Unit.

7. Kontinye ak dosye azil ou nan USCIS.

• Sitiyasyon an pou moun k ap chèche azil nan USCIS ap vin pi difisil. Li enfòmasyon sou pwosesis azil nan USCIS. Ou ka jwenn enfòmasyon ajou tou sou jan lwa yo ap chanje pou moun k ap chèche azil.

• Apre yo fin resevwa aplikasyon w lan, ou ta dwe resevwa yon lèt USCIS voye ba ou pou fè w konnen yo te resevwa aplikasyon w lan (receipt notice) nan lapòs.

• Li enfòmasyon sou sa ou kapab fè pandan dosye azil ou a ap tann desizyon nan USCIS.

• Ou kapab aplike pou yon pemi travay 150 jou apre ou fin soumèt aplikasyon azil ou a. Li enfòmasyon sou fason pou w aplike pou premye pemi travay ou.

• Si dosye w la rete ap tann desizyon pandan 1 an oswa plis, USCIS mande pou w peye yon frè azil pou peye chak ane (annual asylum fee) chak ane.

• Li enfòmasyon sou mezi sekirite pou moun k ap chèche azil.

Kouman pou mwen ranpli aplikasyon azil mwen an sou entènèt ak USCIS?

Gen de fason ou kapab soumèt aplikasyon azil ou a bay USCIS: pa lapòs oswa sou entènèt. Se sèlman kèk moun k ap chèche azil ki kapab aplike sou entènèt. Si ou pa sèten, li kesyon sa a pou w konprann si ou kapab ranpli l sou entènèt.

Si ou elijib pou w ranpli l sou entènèt, ou ka swiv etap ki anba yo pou w aplike sou entènèt. Si ou pito aplike pa lapòs, jwenn enstriksyon pou aplike pa lapòs isit la.

1. Konekte oswa kreye kont USCIS ou sou entènèt.

• Ale sou sit entènèt kont USCIS sou entènèt sa a. Sit entènèt sa a disponib an anglè sèlman.

• Apre sa, konekte nan kont USCIS ou si ou deja gen yon kont. Si ou pa gen yon kont, klike sou bouton ble ki di “sign up” la pou w kreye yon kont. Ou kapab gade videyo USCIS sa a sou fason pou w kreye yon kont sou entènèt.

2. Kòmanse aplikasyon azil la.

• Si w ap sèvi ak yon telefòn, klike sou “Menu” nan kwen anwo adwat la, klike sou “Account actions,” epi klike sou “File a form online.” Si w sou yon òdinatè, klike sou “My Account” nan kwen anwo adwat la, epi klike sou “File a form online.”

• Apre sa, chwazi “I-589, Application for Asylum and for Withholding of Removal” nan meni dewoulan an.

• Klike sou “Start form.”

3. Ranpli aplikasyon azil la.

• Revize kondisyon pou azil yo epi gade videyo sa a pou ede w òganize lide w.

• Pifò nan kesyon ki nan aplikasyon azil sou entènèt la se menm ak sa ki nan aplikasyon azil sou papye a. Ou kapab gade videyo sa a pou jwenn enstriksyon detaye, etap pa etap, sou fason pou w ranpli aplikasyon azil sou papye a.

• Aplikasyon azil sou entènèt la disponib an anglè sèlman. Ou kapab jwenn Fòm I-589 sou papye a ak vèsyon fòm nan ki tradui nan kèk lòt lang sou paj entènèt an USCIS sa a. Men, ou dwe ranpli aplikasyon azil sou entènèt la an anglè.

Anba la a gen kèk bagay itil pou w konnen lè w ap ranpli aplikasyon azil sou entènèt la:

• Fenèt k ap parèt (Pop-Up Window):

  Lè w ap ranpli aplikasyon an sou entènèt, ou pral pwobableman wè yon fenèt k ap parèt ki sanble ak sa a:

Si ou ta renmen kontinye, chwazi “Allow” paske gouvènman an sèlman aksepte aplikasyon azil nan men moun ki Ozetazini. Si ou chwazi “Block”, sit entènèt la p ap pèmèt ou kontinye.

• Ki lè dènye fwa ou te antre Ozetazini?:
  
  Anba kesyon sa a, y ap mande w “Status when last admitted” (Estati w lè yo te admèt ou dènye fwa). Ou pral gen pou w chwazi nan yon lis chwa ki long.
  
  

  • Si ou te antre Ozetazini ak yon pawol (“parole”) oswa yon kalite viza espesifik (tankou yon viza touris B2 oswa yon viza etidyan F1), chwazi sa nan lis la.

  • Si ou se yon moun k ap chèche azil ki pa t antre Ozetazini ak yon pawòl oswa yon viza, ou kapab chwazi “999 – Alien awaiting decision of asylum.” Apre sa, ou kapab kite pati “Date this status expires” la vid.

  • Si ou pa sèten kisa pou w chwazi, ou kapab chwazi “ZN – Unknown.” Apre sa, ou kapab kite pati “Date this status expires” la vid.
    
    

• Kesyon ki rete vid:

  Si ou pa reponn yon kesyon ki obligatwa, w ap resevwa yon alèt lè w rive nan seksyon “Review and Submit” (Revize epi Soumèt). Apre sa, ou kapab tounen dèyè pou w reponn li. Si ou pa konnen yon repons, ou kapab ekri “unknown.”
  
  

• “Do you also want to apply for Withholding of Removal under the Convention Against Torture?”:
  
  Anpil moun reponn “Yes” (Wi) nan kesyon sa a. Malgre USCIS pa kapab bay sispyansyon depòtasyon (withholding of removal) oswa pwoteksyon anba Konvansyon kont Torti (CAT), reponn “Yes” kapab enpòtan pou w pa pèdi opòtinite pou w mande tout fòm pwoteksyon ki ta ka aplikab pou ou. Si USCIS pa ba ou azil, li ka posib pou w genyen fòm pwoteksyon sa yo pita nan tribinal imigrasyon.

4. Telechaje prèv yo.

• Ou kapab chaje prèv yo sou fòm sou entènèt la. Gen limit pou gwosè fichye yo, donk ou ka oblije separe gwo fichye yo an plizyè pati.

• Nou rekòmande pou w soumèt yon kopi paspò w ak Fòm I-94, si w genyen yo.

• Si w ap mete mari/madanm ou oswa pitit ou nan aplikasyon azil ou a, nou rekòmande pou w mete:

  • Yon kopi yon dokiman ki pwouve relasyon fanmi nou – pa egzanp, yon kopi batistè pou yon timoun oswa yon kopi ak maryaj pou yon mari oswa madanm.

  • Yon kopi paspò manm fanmi w lan ak Fòm I-94, si yo genyen yo.

• Si yon dokiman pa nan lang Anglè, ou ta dwe mete tou yon tradiksyon Anglè ansanm ak yon sètifika tradiksyon.

• Gen kèk kategori prèv ki ka pa konsène w. Nan sitiyasyon sa a, ou pa oblije mete prèv pou kategori sa a, menm si w resevwa yon alèt ki di ou ta dwe bay prèv. Pa egzanp, si w pa gen yon Lèt Kouvèti (Cover Letter), ou pa oblije soumèt youn. Oubyen, si w pa gen mari/madanm oswa pitit, ou pa oblije soumèt prèv pou Idantifikasyon Fanmi.

• Si w ap aplike pou azil plis pase 1 an apre w fin antre Ozetazini, ou kapab mete prèv sou rezon ki fè w ap aplike apre 1 an. Pa egzanp, si w te nan yon estati legal, tankou TPS oswa pawòl (“parole”), ou kapab bay kopi dokiman sa yo. 

• Ou ta dwe eseye soumèt prèv sipò yo anmenmtan w ap soumèt aplikasyon azil ou a sou entènèt. Nan dat 28 jiyè 2026, USCIS te anonse yon nouvo règleman ki pèmèt ofisye azil yo transfere kèk dosye dirèkteman nan tribinal imigrasyon san yo pa fè entèvyou, donk ou ka gen yon sèl chans sèlman pou w bay prèv nan dosye w la ak USCIS.

• Si w jwenn lòt prèv anplis apre sa, ou kapab chaje nouvo prèv ou yo sou entènèt nan onglet “Unsolicited Evidence” la. Si yo planifye yon entèvyou pou ou, ou ta dwe resevwa yon avi pou entèvyou azil. L ap gen ladan l enstriksyon sou ki kote pou w voye prèv anplis yo. Pou plis enfòmasyon, klike sou lyen sa a konsènan prèv anplis isit la.

5. Soumèt aplikasyon w lan epi resevwa lèt konfimasyon w lan.

• Revize aplikasyon w lan ak prèv ou yo byen anvan w soumèt yo.

• Sa koute $100 pou soumèt yon nouvo aplikasyon azil bay USCIS. Frè sa a se menm bagay la kit w ap aplike sou entènèt oswa pa lapòs. Nan fen aplikasyon an sou entènèt, USCIS ap mande w pou w peye frè a lè w bay enfòmasyon sou kont bankè w oswa kat kredi w.

• Apre w fin soumèt aplikasyon azil ou a, tcheke kont USCIS ou souvan. Ou p ap resevwa lèt USCIS voye ba ou pou fè w konnen yo te resevwa aplikasyon w lan (receipt notice) oswa lòt avi enpòtan pa lapòs. Gen kèk moun ki resevwa lèt konfimasyon yo a sou entènèt nan sèlman 1 a 2 jou.

• Ou ta dwe kapab wè epi telechaje yon kopi aplikasyon azil ou a nan kont ou sou entènèt.

6. Kontinye ak dosye azil ou a ak USCIS.

• Sitiyasyon an pou moun k ap chèche azil nan USCIS ap vin pi difisil. Pou plis enfòmasyon, klike sou lyen sa a konsènan pwosesis USCIS la. Ou kapab jwenn enfòmasyon ajou tou sou jan lwa yo ap chanje pou moun k ap chèche azil.

• Apre yo fin resevwa aplikasyon w lan, ou ta dwe resevwa yon receipt notice nan kont USCIS ou sou entènèt nan kèk jou.

• Pou plis enfòmasyon, klike sou lyen sa a konsènan sa ou kapab fè pandan dosye azil ou a ap tann nan USCIS.

• Ou kapab aplike pou yon pemi travay 150 jou apre w fin soumèt aplikasyon azil ou a. Pou plis enfòmasyon, klike sou lyen sa a konsènan aplikasyon pou premye pemi travay ou.

• Si dosye w la rete ap tann pandan 1 an oswa plis, USCIS mande pou w peye yon frè azil pou peye chak ane (annual asylum fee) chak ane.

• Pou plis enfòmasyon, klike sou lyen sa a konsènan mezi sekirite pou moun k ap chèche azil.

Èske mwen dwe mete non mari/madanm mwen oswa pitit mwen yo nan aplikasyon azil mwen an?

Wi. Si ou gen yon mari/madanm oswa pitit epi ou deside chèche azil, ou sipoze mete non yo nan aplikasyon azil ou a. Gen 3 bagay ou dwe konnen sou pwosesis sa a.

1. Mete non nenpòt mari/madanm oswa pitit ou genyen.

• Si ou gen yon mari/madanm oswa pitit, kèlkeswa kote y ap viv oswa laj yo, gouvènman an mande pou ou mete non yo sou aplikasyon azil ou a. Ou kapab bay enfòmasyon sou yo nan Pati A.II. sou fòm aplikasyon azil sou papye a (Fòm I-589) oswa nan seksyon “Your Family” (Fanmi Ou) si w ap ranpli l sou entènèt.

2. Ou kapab enkli manm fanmi ki kalifye yo nan dosye azil ou a.

• Si ou gen yon mari/madanm oswa pitit ki pa marye ki gen mwens pase 21 an k ap viv Ozetazini, ou ka kapab enkli yo tou nan dosye azil ou a, si ou vle fè sa. Si ou fè sa, mari/madanm ou oswa pitit ou yo kapab jeneralman aplike pou yon pemi travay anmenmtan avèk ou. Epi si ou genyen azil la, y ap genyen azil la tou – menmsi pitit ou a ta gen tan gen 21 an lè sa a. Etap pou enkli manm fanmi w yo nan dosye azil ou a diferan selon si w ap aplike pou azil nan USCIS oswa nan tribinal imigrasyon. Li plis pi ba a.
  
  

• USCIS:
  
  Si w ap depoze aplikasyon azil ou a nan USCIS epi ou vle enkli manm fanmi w nan dosye w la, reponn “Yes” (Wi) pou kesyon “If in the U.S., is your spouse/this child to be included in this application?” (Si yo Ozetazini, èske mari/madanm ou/pitit sa a dwe enkli nan aplikasyon sa a?). Kare pou koche sa a nan Pati A.II. sou fòm aplikasyon azil sou papye a oswa nan seksyon “Your Family” si w ap ranpli l sou entènèt. Tout manm fanmi ou enkli yo dwe prezan nan entèvyou azil ou a.
  
  Remak: Si ou depoze aplikasyon azil ou a nan USCIS, men pita yo voye dosye w la nan tribinal imigrasyon, manm fanmi w yo ka pa enkli nan dosye azil ou a ankò. Li pi ba a pou w konnen kijan pou w tcheke si dosye nou yo ansanm nan tribinal imigrasyon.
  
  

• Tribinal imigrasyon:
  
  Pwosesis la nan tribinal imigrasyon pi konplike. Pou enkli manm fanmi w nan dosye azil ou a, dosye nou yo dwe ansanm nan tribinal imigrasyon. Sa vle di nou gen menm jij imigrasyon, menm dat tribinal, epi non nou parèt ansanm sou dokiman tribinal yo tankou Avi pou paret nan tribinal (Notice to Appear) oswa Avi pou Randevou (Hearing Notice).

  • Si dosye nou yo deja ansanm nan tribinal imigrasyon, manm fanmi w lan kapab enkli otomatikman nan dosye azil ou a. Lè w ap ranpli aplikasyon azil ou a, reponn “Yes” (Wi) pou kesyon nan Pati A.II a, “If in the U.S., is your spouse/this child to be included in this application?”. Chak manm fanmi kapab depoze pwòp Fòm I-589 separe pa yo tou, pou yo aplike pou azil ansanm ak lòt pwoteksyon kont depòtasyon.

  • Si oumenm ak manm fanmi w yo gen dosye separe nan tribinal imigrasyon, chak moun kapab aplike pou azil separeman lè yo soumèt yon Fòm I-589 separe. Si oumenm ak manm fanmi w yo vle aplike pou azil ansanm pito, ou kapab soumèt yon demann bay jij imigrasyon an pou mete dosye nou yo ansanm. Ou kapab chèche konsèy nan men yon avoka imigrasyon pou ede w detèmine pi bon opsyon pou fanmi w.

  • Si manm fanmi w lan pa gen yon dosye ditou nan tribinal imigrasyon, li p ap enkli nan dosye azil ou a.
    
    

3. Si ou genyen azil la, ou kapab fè demann pou manm fanmi ki kalifye yo.

• Si ou pa kapab mete mari/madanm ou oswa pitit ou nan dosye azil ou a men ou vin genyen azil la apre sa, ou ka toujou kapab mande estati imigrasyon pou yo.

• Si ou genyen azil, ou ka depoze yon demann ki rele Fòm I-730 pou mande azil pou mari/madanm ou oswa pitit ki pa marye ki gen mwens pase 21 an ki pa t enkli nan dosye azil ou a. Ou ka mande azil pou manm fanmi sa yo menmsi yo andeyò Etazini oswa y ap viv Ozetazini san estati imigrasyon. Pa gen okenn frè pou depoze Fòm I-730, men ou dwe depoze l nan yon delè 2 an apre ou fin genyen azil la. Si yo apwouve l, manm fanmi w yo ap resevwa estati azil (asylee status). Yon “asylee” se yon moun ki genyen azil.

• Epitou, si ou genyen azil, ou ka vin yon rezidan pèmanan (lawful permanent resident) apre yon ane. Rive yon lè, ou ka fè demann pou vin yon sitwayen Etazini. Rezidan pèmanan ak sitwayen ameriken gen lòt opsyon anplis pou mande estati imigrasyon pou plis manm fanmi yo.

Kisa yon sètifika sèvis (certificate of service) ye? Kilè mwen bezwen mete youn?

Yon sètifika sèvis se yon deklarasyon siyen ou dwe mete lè w ap soumèt dokiman (tankou yon aplikasyon oswa yon mosyon) nan yon tribinal imigrasyon oswa nan Komisyon Apèl Imigrasyon (BIA). Li deklare ke ou te bay avoka gouvènman an yon kopi dokiman an. Si ou pa mete yon sètifika sèvis, tribinal imigrasyon an oswa BIA a ap pwobableman rejte dokiman w lan.

Swiv etap sa yo:

1. Telechaje modèl sètifika sèvis sa a. 

2. Non pati ki resevwa dokiman an: ou ka ekri “ICE OPLA.” 

3. Adrès pati ki resevwa dokiman an: ou ka ekri adrès biwo avoka gouvènman an (OPLA). Ou ka jwenn adrès la sou paj entènèt an sa a.

4. Metòd sèvis la: 

   • Premyèman, deside ki jan ou vle voye kopi dokiman w yo bay avoka gouvènman an - an pèsòn, pa lapòs, oswa sou entènèt nan sèvi ak ICE eService. 

   • Apre sa, ekri metòd ou te chwazi a. Pa egzanp, ou ka ekri “hand-delivery” (remèt an pèsòn), “mail” (lapòs) oswa “ICE e-service.”

5. Asire w tout espas vid yo ranpli, san bliye siyati ak dat la.  

6. Tache sètifika sèvis ki ranpli a nan pake dokiman w ap soumèt nan tribinal imigrasyon an oswa nan BIA a. 

7. Soumèt pake dokiman an nan tribinal imigrasyon an (oswa nan BIA a), ak nan biwo avoka gouvènman an. Asire w ou kenbe yon kopi pou dosye w.

Ki prèv sipò mwen kapab soumèt?

Ou ka soumèt diferan kalite prèv pou sipòte dosye azil ou a. Prèv ou soumèt yo ta dwe reponn senk kesyon kle sa yo:

1. Ki mal ou te sibi nan peyi orijin ou, oswa ki mal ou pè ou ka sibi si ou dwe tounen nan peyi orijin ou?

2. Ki moun ki te fè w mal, oswa ki moun ki ta vle fè w mal? Si ou pa konnen sèten, ki moun ou panse sa te ye?

3. Poukisa ou te yon sib, oswa poukisa ou pral yon sib pou yo fè w mal nan peyi orijin ou?

4. Poukisa ou pa kapab chèche èd oswa pwoteksyon nan men lapolis oswa gouvènman peyi orijin ou?

5. Èske gen yon kote ki an sekirite anndan peyi orijin ou kote ou ka viv?

Ou ka gade videyo sa a ki ka ede w reflechi sou kesyon sa yo epi prepare dosye azil ou a.

Men kèk egzanp sou kalite prèv ou ka soumèt:

Lis sa a pa vle di li konplè epi egzanp yo p ap aplikab nan tout dosye – chak dosye diferan.

Deklarasyon ekri:

• Pwòp deklarasyon ekri pa ou, k ap dekri nenpòt mal ou te sibi nan tan pase, ki moun ki te fè ou mal, poukisa yo te fè ou mal, si ou te eseye jwenn èd nan men lapolis oswa gouvènman peyi orijin ou, si gen yon kote ki an sekirite anndan peyi orijin ou kote ou kapa b deplase ale, ak sa ou panse ki ta ka rive ou si ou ta tounen nan peyi orijin ou.

• Lèt oswa deklarasyon moun ki konnen sa ki te rive ou nan peyi orijin ou.

• Yon deklarasyon yon moun ki se yon ekspè sou peyi orijin ou ekri, pa egzanp yon pwofesè oswa yon chèchè. Ekspè a kapa b dekri sa k ap pase nan peyi orijin ou ak poukisa li pa an sekirite pou yon moun nan sitiyasyon ou tounen la.

Dokiman idantite: 

• Dokiman idantite, tankou paspò ou, batistè ou, ak sètifika maryaj ou.

• Prèv ki montre fen nenpòt maryaj anvan.

Rapò lapolis ak rapò medikal: 

• Rapò lapolis, si ou te fè yon rapò bay lapolis sou mal ou te sibi a.

• Rapò medikal, ki montre nenpòt blesi fizik ou te ka sibi.

• Evalyasyon sante mantal, ki montre nenpòt domaj mantal ou te ka sibi.

Kondisyon peyi a: 

• Atik jounal oswa magazin sou pwoblèm ki fè ou pè tounen nan peyi orijin ou, oswa atik sou move bagay ki te rive moun ki sanble ak ou nan peyi orijin ou.

• Atik nouvèl oswa rapò ki soti nan òganizasyon dwa moun nasyonal oswa entènasyonal sou sitiyasyon kote ou te sove a.

Dat limit yon ane: 

• Si w ap aplike pou azil plis pase yon ane apre ou fin rive nan peyi Etazini, ou kapa b soumèt prèv tou sou si ou ranpli kondisyon pou yon egzansyon pou dat limit yon ane a.

Lòt prèv:

• Foto ki montre pati nan istwa ou. Pa egzanp, foto kapa b montre nenpòt mal ou te sibi, oswa patisipasyon ou nan yon gwoup oswa yon aktivite, si ou kwè patisipasyon ou nan gwoup oswa aktivite sa a fè yo vize ou pou fè ou mal.

• Mesaj tèks, mesaj Facebook, oswa nenpòt lòt kominikasyon ekri ki gen menas yo te fè kont ou.

• Kat manm oswa lòt dokiman ofisyèl ki soti nan yon gwoup, si ou kwè lefètke ou se manm nan gwoup la fè yo vize ou pou fè ou mal.

Ou kapa b jwenn plis lide tou kòmanse nan paj 13 nan gid sa a, paj 8 nan gid sa a, paj 15 nan gid sa a, oswa nan gid sa a (spesyalman pou moun ki pè tounen nan peyi orijin yo poutèt oryantasyon seksyèl yo, idantite sèks yo, oswa estati VIH yo). Ou kapa b jwenn aksè ak lòt resous tou lè ou kreye yon kont isit la.

Lòt konsèy:

• Ou kapa b soumèt prèv nan yon lang ki pa anglè, men w ap bezwen mete yon tradiksyon an anglè tou ansanm ak yon sètifika tradiksyon.

• Ou pa oblije soumèt dokiman orijinal ou yo. Ou kapa b soumèt kopi dokiman ou yo pito. Men, ou ta dwe pote dokiman orijinal ou yo nan randevou devan jij (individual or merits hearing) ou oswa nan entèvyou azil ou.

• Pa soumèt okenn dokiman ki fo oswa ki foje.

• Si ou pa kapa b jwenn sèten prèv, oswa si chèche jwenn yo ap mete ou oswa yon lòt moun an danje, alò ou kapa b mete yon deklarasyon k ap esplike jij imigrasyon an oswa ofisye azil la poukisa ou pa t kapa b jwenn prèv sa a.

Ki lè mwen bezwen soumèt prèv pou sipòte dosye m?

Ou ta dwe eseye soumèt nenpòt prèv pou sipòte dosye w anmenmtan ak aplikasyon azil ou a (Fòm I-589) si ou kapab. Sa ka ede montre dosye azil ou a solid epi gouvènman an ta dwe kontinye trete li. USCIS ak tribinal imigrasyon yo ap deside sou kèk dosye azil kounye a san yo pa fè yon odyans konplè oswa yon entèvyou, donk li pi bon pou ou soumèt prèv ou yo pi vit posib.  

Si ou pa t soumèt tout prèv ou yo lè ou te depoze aplikasyon azil ou a, ou ka eseye soumèt yo kounye a. Fason pou fè sa depann de si dosye w la nan tribinal imigrasyon oswa nan USCIS. 

• Si ou gen yon dosye nan tribinal imigrasyon, soumèt nenpòt nouvo prèv pi vit posib, swiv enstriksyon sa yo. Jij la ka ba ou dat limit espesifik tou pou ou depoze prèv ou yo, an jeneral omwen 30 jou anvan randevou devan jij (individual or merits hearing) ou a, men ou ka soumèt li pi bonè. Li plis enfòmasyon sou fason pou mande azil nan tribinal imigrasyon isit la.

• Si ou mande azil nan USCIS, soumèt nenpòt nouvo prèv pi vit posib, swiv enstriksyon sa yo. Si yo planifye yon entèvyou azil pou ou, ou ta dwe soumèt nenpòt lòt prèv anplis omwen 14 jou anvan entèvyou a, men li pi bon si ou fè sa pi bonè. Li plis enfòmasyon sou fason pou mande azil nan USCIS isit la.