Ekri pa avoka imigrasyon ekspè ASAP yo · Mizajou nan dat
Avi sa a ki soti nan tribinal imigrasyon an fè konnen ou te peye yon frè pou depoze yon aplikasyon azil sou sit entènèt sa a. Ou ta dwe mete yon kopi lèt resevwa sa a ansanm ak aplikasyon azil ou a (Fòm I-589) lè w ap soumèt li nan tribinal imigrasyon. Si ou pa mete lèt resevwa a, tribinal imigrasyon an ka rejte aplikasyon azil ou a. Jwenn plis enstriksyon isit la.
Si ou pa t anrejistre yon kopi lèt resevwa w la, ou ka jwenn li pita lè w antre nimewo alyen (A number) ou ak Nimewo Idantifikasyon pou Swiv Peman (Payment Tracking ID) ou sou paj entènèt an pou lèt resevwa sa a. Si ou pa konnen Payment Tracking ID ou a, ou ka jwenn li pandan 20 jou apre ou fin fè peman an lè w tounen sou paj entènèt peman sa a, antre nimewo alyen ou, epi chwazi ankò “Court - I-589, Application for Asylum (Initial Fee)” pou kalite dokiman w ap depoze a. Si plis pase 20 jou pase, tribinal imigrasyon an di ou ka eseye kontakte tribinal imigrasyon w lan pou mande Payment Tracking ID a.
Avi a di ou dwe soumèt tou yon frè azil pou peye chak ane (annual asylum fee), kòmanse yon ane apre dat ou te soumèt aplikasyon azil ou a. Ou ka jwenn enfòmasyon ki pi resan sou frè azil pou peye chak ane nan tribinal imigrasyon isit la. Manm ASAP yo te depoze yon pouswit lajistis konsènan frè azil pou peye chak ane a epi enfòmasyon yo ap chanje rapidman.
ASAP (Pwojè ki an Defans pou Moun k ap Chèche Azil) gen pou objektif pou bay enfòmasyon ki baze sou reyalite konsènan lwa imigrasyon aktyèl yo. Enfòmasyon sa yo se pa konsèy legal.
Tout kontni legal se ekip avoka imigrasyon ekspè ASAP yo ki ekri li epi ki revize li legalman. Avoka ekspè ASAP yo gen plizyè dizèn ane eksperyans nan lwa imigrasyon ak nan litij. Ansanm, yo genyen plizyè santèn ka. Avoka nou yo gen lisans pou pratike (Bar) nan plizyè eta Ozetazini, yo gen diplòm nan dwa ki soti nan inivèsite tankou Harvard, Yale, ak UCLA, epi yo genyen plizyè pri pou travay legal yo fè.