Se avoka imigrasyon ekspè ASAP yo ki ekri sa · Mizajou nan dat
Gen kèk moun k ap chèche azil ki kapab soumèt yon aplikasyon azil sou entènèt nan Sèvis Sitwayènte ak Imigrasyon Etazini (USCIS). Men, se pa tout moun k ap aplike pou azil ki kapab sèvi ak opsyon depoze sou entènèt sa a. Si ou gen yon dosye nan tribinal imigrasyon, an jeneral ou dwe toujou sèvi ak fòm papye a. Gen lòt kategori moun k ap chèche azil ki pa kapab aplike sou entènèt tou pou kounye a. Tanpri kontinye li pou plis detay.
Èske mwen kapa b depoze aplikasyon azil mwen an (Fòm I-589) sou entènèt?
Petèt. Repons lan depann de si w ap aplike pou azil nan USCIS oswa nan tribinal imigrasyon, ansanm ak kèk lòt faktè.
1. Si w ap aplike pou azil nan USCIS, ou ka kapab ranpli epi soumèt aplikasyon azil ou a sou entènèt, atravè yon kont USCIS (USCIS account) sou entènèt!
Men, gen eksepsyon:
Ou pa kapab aplike sou entènèt si yo te ba ou yon Avi pou paret nan tribinal (Notice to Appear).
Si ofisyèl imigrasyon yo te di w ke ou pral gen yon dosye nan tribinal imigrasyon men ou poko parèt nan sistèm tribinal imigrasyon an, ou kapab voye yon aplikasyon azil sou papye pa lapòs nan USCIS.
Ou pa kapab aplike sou entènèt si ou te gen yon dosye nan tribinal imigrasyon nan tan pase epi jij la te anile (oswa fèmen) dosye w la.
Si ou deside aplike pou azil ankò nan USCIS, ou bezwen voye aplikasyon azil ou a pa lapòs. Pou plis enfòmasyon sou opsyon ou genyen apre yo fin anile dosye w la, klike sou lyen sa.
Ou pa kapab aplike sou entènèt si ou se yon timoun ki pa akonpaye.
Ou kapab voye yon aplikasyon azil sou papye pa lapòs nan USCIS pito.
Ou pa kapab aplike sou entènèt si ou nan youn nan lòt sitiyasyon ki dekri anba onglet “Special Instructions” sou paj entènèt an (webpage) USCIS sa a.
Si ou nan youn nan sitiyasyon sa yo, ou kapab voye yon aplikasyon azil sou papye pa lapòs nan USCIS.
2. Si ou gen yon dosye nan tribinal imigrasyon, ou PA KAPAB depoze aplikasyon azil ou a atravè yon kont USCIS sou entènèt.
Ou bezwen soumèt yon aplikasyon azil nan tribinal imigrasyon an pito. An jeneral, ou bezwen soumèt yon kopi papye Fòm I-589 ou a nan tribinal imigrasyon pa lapòs oswa an pèsòn.
Si oumenm oswa avoka w gen yon kont sou entènèt nan tribinal imigrasyon (ki diferan de yon kont USCIS sou entènèt), ou kapab soumèt aplikasyon azil ou a sou entènèt. Pou fè sa, ou bezwen ranpli yon Fòm I-589 epi telechaje yon vèsyon PDF fòm nan sou kont sou entènèt tribinal imigrasyon ou a. (Remak: depi mwa oktòb 2024, se sèlman kèk moun ki gen aksè ak kont sou entènèt tribinal imigrasyon).
3. Si ou toujou pa sèten si ou kapab depoze aplikasyon azil ou a sou entènèt nan USCIS, ou kapab sèvi ak Zouti Enstriksyon pou Depoze Fòm I-589 USCIS la.
Zouti sa a kapab di w si ou elijib pou depoze yon aplikasyon azil nan USCIS ak kijan pou w depoze aplikasyon azil ou a. Si ou pa sèten si ou gen yon dosye nan tribinal imigrasyon, li plis nan lyen sa a.
Ki etap pou mwen ranpli yon aplikasyon pou azil atravè yon kont USCIS (USCIS account), si mwen elijib?
1. Konekte ou oswa kreye kont USCIS ou sou entènèt.
Ale sou sit entènèt kont USCIS sou entènèt sa a. Sit entènèt sa a disponib an anglè sèlman.
Apre sa, konekte nan kont USCIS ou si ou deja gen yon kont. Si ou pa gen yon kont, klike sou bouton ble ki di "sign up" la pou ou kreye yon kont. Ou kapa b gade videyo USCIS sa a sou fason pou ou kreye yon kont sou entènèt.
2. Kòmanse aplikasyon pou azil la.
Si w ap itilize yon telefòn, klike sou “Menu” nan kwen anwo adwat la, klike sou “Account actions,” epi klike sou “File a form online.” Si ou sou yon òdinatè, klike sou “My Account” nan kwen anwo adwat la, epi klike sou “File a form online.”
Apre sa, chwazi “I-589, Application for Asylum and for Withholding of Removal” nan meni dewoulan an.
Klike sou “Start form.”
3. Ranpli aplikasyon pou azil la.
Pifò nan kesyon ki nan aplikasyon azil sou entènèt la se menm ak sa ki nan aplikasyon azil sou papye a. Ou kapa b gade videyo sa a pou jwenn enstriksyon detaye, etap pa etap, sou fason pou ou ranpli aplikasyon azil sou papye a. Ou kapa b jwenn aplikasyon azil sou papye a tou ak vèsyon tradui fòm nan nan kèk lòt lang sou paj entènèt an USCIS sa a. Men, ou dwe ranpli aplikasyon azil sou entènèt la an anglè.
Anba la a gen kèk bagay ki itil pou ou konnen lè w ap ranpli aplikasyon azil sou entènèt la:
Fenèt k ap parèt (Pop-Up Window): Lè w ap ranpli aplikasyon an sou entènèt, ou kapa b wè yon fenèt k ap parèt ki sanble ak sa a:
Si ou ta renmen kontinye, chwazi “Allow” paske gouvènman an sèlman aksepte aplikasyon azil moun ki Ozetazini. Si ou chwazi “Block”, sit entènèt la p ap pèmèt ou kontinye.
Ki lè dènye fwa ou te antre Ozetazini?: Anba kesyon sa a, y ap mande w “Status when last admitted.” W ap gen pou ou chwazi nan yon lis meni dewoulan ki long.
Si ou te antre Ozetazini ak yon pawol (“parole”) oswa yon kalite viza espesifik (tankou yon viza touris B2 oswa viza etidyan F1), chwazi sa nan lis la.
Si ou se yon moun k ap chèche azil ki pa t antre Ozetazini ak yon pawòl oswa yon viza, ou kapa b chwazi “999 – Alien awaiting decision of asylum.” Apre sa, ou kapa b kite pati “Date this status expires” la vid.
Si ou pa sèten kisa pou ou chwazi, ou kapa b chwazi “ZN – Unknown.” Apre sa, ou kapa b kite pati “Date this status expires” la vid.
Kesyon ki vid: Si ou pa reponn yon kesyon ki obligatwa, w ap resevwa yon alèt lè ou rive nan seksyon “Review and Submit” la. Apre sa, ou kapa b tounen dèyè pou ou reponn li. Si ou pa konnen yon repons, ou kapa b ekri “unknown” oswa kite l vid.
4. Telechaje prèv yo.
Ou kapab telechaje prèv nan fòm anliy lan. Gen limit sou gwosè fichye yo, donk ou ka bezwen separe gwo fichye yo an plis pase yon sèl fichye.
Nou rekòmande pou w soumèt yon kopi paspò w ak Fòm I-94, si w genyen yo.
Si w ap enkli mari/madanm ou oswa pitit ou nan aplikasyon azil ou a, nou rekòmande pou w enkli:
Yon kopi yon dokiman ki pwouve relasyon fanmi nou – pa egzanp, yon kopi batistè pou yon timoun oswa yon kopi ak maryaj pou yon mari/madanm.
Yon kopi paspò manm fanmi w lan ak Fòm I-94, si yo genyen yo.
Si yon dokiman pa an anglè, ou ta dwe enkli tou yon tradiksyon anglè ak yon sètifika tradiksyon (certificate of translation).
Gen kèk nan kategori prèv yo ki ka pa konsène w. Nan sitiyasyon sa a, ou pa oblije enkli prèv pou kategori sa a, menm si w resevwa yon alèt ki di ou ta dwe bay prèv. Pa egzanp, si w pa gen yon Lèt Kouvèti (Cover Letter), ou pa oblije soumèt youn. Oswa, si w pa gen yon mari/madanm oswa pitit w ap enkli kòm depandan nan aplikasyon w lan, ou pa oblije soumèt prèv pou Idantifikasyon Fanmi.
Ou pa oblije soumèt tout prèv yo anmenmtan w ap soumèt aplikasyon azil anliy ou a. Ou kapab soumèt plis prèv pita, anvan oswa pandan entèvyou azil ou a. Li plis enfòmasyon sou lòt prèv isit la.
5. Peye frè a, soumèt aplikasyon w lan epi resevwa lèt USCIS voye ba ou pou fè w konnen yo te resevwa aplikasyon w lan (receipt notice).
Revize aplikasyon w lan ak prèv ou yo avèk swen anvan w peye epi soumèt li.
Apati 22 jiyè 2025, sa ap koute $100 pou soumèt yon aplikasyon azil bay USCIS. Frè sa a se menm bagay la kit w ap aplike anliy oswa pa lapòs. Nan fen aplikasyon anliy lan, USCIS ap mande w pou w peye frè a lè w bay enfòmasyon sou kont bankè w oswa kat kredi w.
Apre w fin soumèt aplikasyon azil ou a, tcheke kont USCIS ou souvan. Ou ka pa resevwa receipt notice ou a oswa lòt avi enpòtan pa lapòs. Gen kèk moun ki resevwa receipt notice yo anliy nan sèlman 1 a 2 jou.
Ou ta dwe kapab wè epi telechaje yon kopi aplikasyon azil ou a nan kont anliy ou a.
6. Kontinye ak dosye azil ou a ak USCIS.
Ou kapab soumèt plis prèv anvan entèvyou w la lè w sèvi ak onglè “Add Unsolicited Evidence” nan kont USCIS ou a, oswa an pèsòn pandan entèvyou azil ou a.
Li enfòmasyon sou pwosesis USCIS la.
Li enfòmasyon sou fason pou w aplike pou premye pemi travay ou.
ASAP (Pwojè ki an Defans pou Moun k ap Chèche Azil) vize bay enfòmasyon reyèl sou lwa imigrasyon aktyèl yo. Enfòmasyon sa yo se pa konsèy legal.
Tout kontni legal se ekip avoka ekspè nan imigrasyon ASAP yo ki ekri l epi ki revize l legalman. Avoka ekspè ASAP yo gen plizyè dizèn lane eksperyans nan lwa imigrasyon ak nan litij. Kolektivman, yo genyen plizyè santèn ka. Avoka nou yo admèt nan Baro nan plizyè eta Ozetazini, yo gen diplòm lalwa nan inivèsite tankou Harvard, Yale, ak UCLA, epi yo genyen plizyè pri pou travay legal yo.