Ekri pa avoka imigrasyon ekspè ASAP yo · Mizajou
Depi nan kòmansman ane 2025, USCIS anile kèk dosye azil lè li voye yon lèt. Men yon egzanp, ak yon lòt egzanp, men gen lòt vèsyon lèt la tou. Nan lèt sa yo, USCIS di ke yo anile dosye azil ou a, ke USCIS p ap pran yon desizyon sou dosye azil ou a, epi ou nan yon lòt pwosesis yo rele “depòtasyon rapid.”
Kiyès ki resevwa lèt sa yo?
ASAP (Pwojè ki an Defans pou Moun k ap Chèche Azil) te pale ak anpil moun k ap chèche azil ak avoka yo ki te resevwa lèt sa yo. Tout moun sa yo k ap chèche azil te nan pwosesis pou chèche azil ak USCIS. (Chèche azil ak USCIS rele tou pwosesis azil “afirmatif”.) Jiskaprezan, pa gen okenn modèl klè nou wè sou kiyès ki resevwa lèt sa yo. Pa egzanp, nou tande pale de moun ki te rive Ozetazini pandan plizyè ane diferan, epi ki te resevwa oswa ki pa t resevwa pawòl (“parole”) nan fwontyè a.
Kisa lèt la di sou dosye azil mwen ak USCIS?
Si ou resevwa kalite lèt sa a pa lapòs oswa nan kont USCIS ou sou entènèt, li di aplikasyon azil ou a pa annatant ankò ak USCIS epi ou p ap resevwa yon entèvyou azil ak USCIS. Sa vle di tou ke ou menm ak manm fanmi ou te mete nan dosye azil ou a pa pwoteje kont depòtasyon ankò – sof si ou deja gen yon lòt estati imigrasyon.
Èske lèt la di mwen kapab aplike pou azil yon lòt fason?
Lèt la di ou nan yon pwosesis yo rele “depòtasyon rapid.” Nan pwosesis depòtasyon rapid la, gouvènman an eseye depòte kèk imigran pi vit, san chans pou yo prezante yon dosye pou esplike poukisa yo ta dwe kapab rete Ozetazini.
Nan anpil ka, moun k ap chèche azil ki resevwa lèt sa yo pa t janm resevwa yon fòm tout bon ki mete yo nan depòtasyon rapid (Fòm I-860), oswa si yo te resevwa fòm sa a, li pa t janm siyen kòrèkteman.
Menm si yo mete w nan depòtasyon rapid, ou ka toujou kapab aplike pou azil. Lè yon moun nan “depòtasyon rapid” yo sipoze kapab di ofisyèl imigrasyon yo ke yo pè tounen nan peyi orijin yo epi mande yon Entèvyou sou Krent ki Fondé. Sa a se “pwosesis tès depistaj krent ki fonde” yo mansyone nan lèt la. Si yo pase Entèvyou sou Krent ki Fondé a, yo kapab chèche azil nan tribinal imigrasyon apre sa. Moun ka nan detansyon pandan tout pwosesis sa a. Li resous sa a pou plis enfòmasyon.
Kisa lèt la di konsènan pèmi travay mwen?
Lèt la pa di kisa k ap rive pèmi travay ou a. Men, nan kontèks ki sanble ak sa a, yon pèmi travay ki baze sou yon demann azil rete valid jiskaske dat ekspirasyon an rive. Sa a se vre lè USCIS pa akòde azil epi li voye dosye azil la nan tribinal imigrasyon, oswa lè tribinal imigrasyon an anile yon dosye.
(Gade paj entènèt an USCIS sa a, anba seksyon “Permission to Work in the United States” epi paj entènèt an USCIS sa a, anba “Special Instructions.)
Èske y ap mete m nan detansyon apre m fin resevwa lèt sa a?
Nou tande kèk rapò konsènan moun yo mete nan detansyon lè yo te ale nan yon Randevou pou prezante nan yon biwo ICE apre yo te fin resevwa yon lèt ki anile dosye azil yo nan USCIS. Men, li difisil pou konnen kisa k ap rive nan chak ka endividyèl.
Si yo mete w nan detansyon epi ou pè tounen nan peyi orijin ou, ou kapab di ofisye imigrasyon yo ou pè epi mande yon Entèvyou sou Krent ki Gen Fondman (Credible Fear Interview). Si ou pase Entèvyou sou Krent ki Gen Fondman an, apre sa ou kapab chèche azil nan tribinal imigrasyon. Yo kapab kenbe w nan detansyon pandan tout pwosesis sa a. Li resous sa a pou plis enfòmasyon.
Kisa mwen kapab fè si mwen resevwa lèt sa a?
Chèche yon avoka: Si ou resevwa yon lèt anilasyon, sa kapab itil anpil pou w jwenn yon avoka, si sa posib. Ou kapab chèche asistans legal nan zòn kote w rete a.
Kontakte ASAP: Si ou santi w alèz, ou menm oswa avoka w kapab voye yon imèl bay ASAP nan [email protected] avèk kesyon ou genyen, epi n ap fè tout sa n kapab pou nou reponn ou.
Mande dokiman w yo: Ou menm oswa avoka w kapab mande gouvènman an yon kopi tout dokiman imigrasyon w yo, nan sèvi ak yon pwosesis yo rele yon demann FOIA. Si ou pa t janm resevwa yon Fòm I-860 kòrèk ki mete w nan pwosesis depòtasyon rapid, yon demann FOIA kapab ede w pwouve sa. Ou kapab gade videyo sa a sou demann FOIA epi aprann kijan pou w soumèt yon demann FOIA bay USCIS isit la. Tanpri konnen pwosesis FOIA a kapab pran tan.
Ou kapab li tou mezi sekirite ak lòt enfòmasyon pou moun k ap chèche azil.
Kijan mwen kapab tcheke estati aplikasyon azil mwen an nan USCIS?
Ou kapab tcheke estati aplikasyon w lan nan USCIS lè w antre nimewo resi w la nan zouti sou entènèt pou tcheke estati dosye nan USCIS la. Nimewo resi w la nan kwen anwo sou bò gòch nan lèt USCIS voye ba ou pou fè w konnen yo te resevwa aplikasyon w lan (receipt notice). Nimewo resi a anjeneral kòmanse ak twa lèt.
Pou enstriksyon detaye sou kijan pou tcheke estati dosye USCIS ou sou entènèt, gade fliyè sa a.
ASAP (Pwojè ki an Defans pou Moun k ap Chèche Azil) gen kòm objektif pou bay enfòmasyon ki baze sou reyalite konsènan lwa imigrasyon aktyèl yo. Enfòmasyon sa yo pa konsèy legal.
Tout kontni legal se ekip avoka ekspè nan imigrasyon ASAP yo ki ekri yo epi revize yo legalman. Avoka ekspè ASAP yo gen plizyè dizèn ane eksperyans nan lwa imigrasyon ak nan litij. Ansanm, yo genyen plizyè santèn ka. Avoka nou yo gen lisans pou pratike nan plizyè eta Ozetazini, yo gen diplòm nan dwa nan inivèsite tankou Harvard, Yale, ak UCLA, epi yo genyen plizyè pri pou travay legal yo fè.