Dènye Enfòmasyon sou Pledwaye pou Manm ASAP yo

Mizajou 16 Jen 2026

ASAP kontinye ap konteste frè azil pou peye chak ane a

Mwa sa a, ASAP kontinye ap defann kòz kont frè azil pou peye chak ane (annual asylum fee) ki enjis la. Men kèk mizajou enpòtan. 

ASAP mobilize 84 òganizasyon pou opoze ak yon nouvo règleman USCIS 

Nan dat 29 Avril 2026, USCIS te pibliye yon nouvo règleman konsènan frè azil pou peye chak ane a. 

Nouvo règleman an deklare si ou pa peye frè azil pou peye chak ane ou a nan yon delè 30 jou apre ou fin resevwa yon avi nan men USCIS, USCIS ap rejte aplikasyon azil ou a epi l ap anile pemi travay ou a imedyatman. Si ou pa gen yon lòt estati imigrasyon ki valid, USCIS kapa b kòmanse pwosedi pou depòte ou. Aprann kijan pou tcheke si ou dwe peye frè a. Nouvo règleman an pral rann li pi difisil tou pou moun ki gen Estati Pwoteksyon Tanporè (TPS) travay nan lavni. 

ASAP opoze ak règleman sa a ak tout fòs li. N ap travay an patenarya ak National TPS Alliance (NTPSA) pou nou konbat sa. NTPSA se yon òganizasyon ki gen plizyè milye manm ki gen TPS ak alye yo. ASAP ak NTPSA te soumèt yon kòmantè ofisyèl pou mande gouvènman an retire règleman an nèt. Nan kòmantè sa a, nou te pataje enkyetid manm yo konsènan frè anyèl la. Pa egzanp, nou te esplike gouvènman an echwe nan bay avi ki klè ak fyab sou ki lè frè yo dwe peye.

Plis pase 80 òganizasyon te rejwenn ASAP ak NTPSA epi yo te siyen kòmantè a! Malgre règleman an te antre an vigè nan dat 29 Me 2026, òganizasyon yo kapa b kontinye soumèt kòmantè pou eksprime enkyetid yo sou règleman sa a jiska 29 Jen 2026. ASAP ap kontinye mande lòt gwoup pou soumèt kòmantè mwa sa a, tankou gouvènman minisipal yo, sendika travayè yo, ak gwoup biznis yo.

Pwosè ASAP kont frè azil pou peye chak ane a ap kontinye 

ASAP ap kontinye pouswiv tribinal imigrasyon yo nan lajistis pou pwosesis enjis yo genyen pou frè azil pou peye chak ane a. Nan dat 8 Jen, ASAP te mande tribinal la pou l pran yon desizyon final nan ka a, nan depoze yon demann pou yon jijman san pwosè. Gouvènman an te mande tribinal la pou l anile ka a, epi ASAP ap opoze ak demann sa a.

ASAP pa ap pouswiv USCIS ankò pou pwosesis enjis li genyen pou frè azil pou peye chak ane a, men nou kapa b depoze yon nouvo pwosè kont USCIS. Okòmansman, pwosè ASAP la te konteste ni tribinal imigrasyon yo ni USCIS. Apre USCIS te prezante nouvo règleman li an nan dat 29 Avril, si nou te kontinye pouswiv USCIS sa t ap lakòz yon gwo reta pou yon desizyon final. Konsa, ASAP te chwazi konsantre pwosè aktyèl la sou tribinal imigrasyon yo, pou n eseye jwenn yon desizyon pi vit. 

Manm yo te deja vote pou konteste frè azil pou peye chak ane a nan USCIS, epi nou rete detèmine pou n goumen pou dwa manm ASAP yo. Nan yon nouvo pwosè kont USCIS, n ap kapab konteste ni nouvo règleman USCIS 29 Avril la ak lòt pwoblèm ki gen rapò ak frè azil pou peye chak ane a nan USCIS.

N ap kenbe ou o kouran sou paj entènèt an sa a. 

Pwosè sou ekstansyon otomatik pemi travay la rezoud pou kounye a 

Nan dat 30 oktòb 2025, gouvènman an te chanje politik li epi li te sispann bay nouvo ekstansyon otomatik pou pemi travay. Si ou te deja resevwa yon ekstansyon 540 jou pou pemi travay ou nan dat 29 oktòb oswa anvan sa, ekstansyon ou an toujou valid. Gras ak defans manm ASAP yo te fè anvan sa, chanjman sa a nan ekstansyon otomatik la poko afekte pifò moun k ap chèche azil yo, men sa ta kapab rive nan lavni. 

Mwa pase a, avoka ASAP yo te depoze yon pwosè ki rele Jane Doe v. USCIS, pou konteste règ oktòb 2025 la. (Jane Doe se pa non reyèl li.) Paske pwosè sa a te depoze nan non yon sèl moun sèlman — pa nan non manm ASAP yo — nou pa t mande manm yo pou yo vote sou sa. 

Nou te depoze ka sa a pou defann dwa Jane Doe. Nou te konnen tou nou t ap vin gen plis eksperyans nan konteste règ ekstansyon otomatik la. Apre Jane Doe te fin depoze pwosè a, gouvènman an te ba li yon nouvo pemi travay, epi ka li a fini kounye a. Sa se te yon viktwa pou Jane Doe! Se te yon viktwa tou pou ASAP, epi kounye a nou pi pare pou nou konbat règ la nan lavni si li kòmanse lakòz plis pwoblèm pou manm ASAP yo.

Mizajou 13 me 2026

ASAP ap goumen pou nouvo ekstansyon otomatik pemi travay nan tribinal ak nan Kongrè Ameriken an  

ASAP ap goumen pou nouvo ekstansyon pemi travay 540 jou! 

Pandan plizyè ane, manm ASAP yo di nou reta nan renouvèlman pemi travay yo se yon gwo pwoblèm. Nan ane 2022, manm yo te jwenn yon solisyon enpòtan: ekstansyon otomatik 540 jou pou pemi travay. Avèk ekstansyon otomatik la, si ou te aplike pou renouvle pemi travay ou alè, ansyen pemi travay ou a te pwolonje pou 540 jou apre dat ekspirasyon ki ekri sou li a. 

Malerezman, nan dat 30 oktòb 2025, gouvènman an te chanje politik li epi li te sispann bay nouvo ekstansyon otomatik pou pemi travay. Si ou te deja resevwa yon ekstansyon 540 jou pou pemi travay ou nan dat 29 oktòb oswa anvan sa, ekstansyon ou an toujou valid. Atout chanjman politik sa a poko afekte pifò moun k ap chèche azil yo, li deja kòmanse afekte lòt imigran.

Sa ASAP ap fè nan tribinal:

Objektif ASAP se pouse gouvènman an pou li bay nouvo ekstansyon otomatik pou pemi ankò – anvan pifò moun k ap chèche azil yo afekte. Nou konnen pemi travay yo enpòtan anpil pou manm yo. Nan yon sondaj resan sou pemi travay, manm yo te di nou pi gwo enkyetid yo se chanjman ak reta ki ka genyen nan pemi travay alavni. 

Mwa pase a, avoka ASAP yo te depoze yon nouvo pwosè pou konteste politik ki mete fen nan ekstansyon otomatik pemi travay yo. Pwosè sa a diferan de yon pwosè ki fèt nan non manm ASAP yo – paske li te depoze nan non yon sèl moun sèlman. Kòm rezilta, nou pa t mande manm yo vote sou pwosè a. Ou kapab li plis enfòmasyon sou pwosè ASAP yo isit la.

Nouvo pwosè a rele Jane Doe v. USCIS. Pwosè a diskite ke gouvènman an te aji yon fason ki ilegal lè li te sispann bay nouvo ekstansyon pemi travay 540 jou. 

Sa ASAP ap fè nan Kongrè a:

Anplis nouvo pwosè a, ASAP ap fè defans tou sou keksyon sa a nan Sena Ameriken an. Nan fen mwa avril la, Sena a te vote sou si gouvènman an ta dwe bay nouvo ekstansyon otomatik pou pemi travay. ASAP ak patnè nou yo te travay di pou eksplike anpil Senatè diferan enpòtans ekstansyon otomatik yo. 

Malerezman, menmsi anpil Senatè te vote pou sipòte nouvo ekstansyon yo, vòt la pa t reyisi. 47 Senatè te vote an favè pou remete ekstansyon pemi travay 540 jou a, epi 50 te vote kont sa. Senatè nan tou de pati politik yo te vote an favè ekstansyon otomatik 540 jou a – sa ki montre otorite eli nan tou de pati yo bay keksyon sa a enpòtans. ASAP ap kontinye edike manm Kongrè a sou enpòtans ekstansyon pemi travay 540 jou a.

N ap kenbe ou enfòme sou efò n ap fè pou nou jwenn nouvo ekstansyon otomatik pou pemi travay pou imigran Ozetazini.

Nouvo done montre gwo kontribisyon moun k ap chèche azil yo pote nan ekonomi an

ASAP (Pwojè ki an Defans pou Moun k ap Chèche Azil) konnen aksè ak pemi travay se youn nan pi gwo priyorite manm ASAP yo. Men manm ASAP yo pa kapab goumen pou aksè ak pemi travay pou kont yo. 

Avèk sa nan tèt nou, ASAP lanse yon nouvo pwojè ki rele WorkPermits.US pou fè patenarya ak kominote biznis la pou goumen pou yon aksè ki estab ak pemi travay. Atravè patenarya sa a, nou edike plis pase 200 biznis sou chanjman politik ki afekte moun k ap chèche azil yo epi nou rive mobilize biznis yo pou yo soumèt kòmantè piblik pou opoze ak règleman sou pemi travay ki ka fè mal. 

WorkPermits.US etidye tou kijan moun k ap chèche azil yo ede ekonomi ameriken an. Pa egzanp, yon nouvo rechèch Harvard Business School montre moun k ap chèche azil yo pa sèlman pran swen tèt yo — moun k ap chèche azil yo ogmante salè epi kreye travay pou sitwayen ameriken tou. WorkPermits.US pibliye yon rapò tou ki montre gen 2.3 milyon moun k ap chèche azil k ap fè travay ki enpòtan anpil nan chak rejyon ak eta Ozetazini.

Mèsi ak tout manm ASAP yo nou pa ka konte ki te pale sou kontribisyon moun k ap chèche azil yo Ozetazini. Nou te pwodui rechèch sa a kòm repons pou sijesyon nou yo, epi n ap kontinye kenbe ou enfòme sou WorkPermits.US!

Ou kapab li plis sou paj akèy WorkPermits.US la ak sou paj done yo a.

Mizajou 29 Avril 2026

Dè milye moun mete ansanm ak manm ASAP yo pou opoze ak pwojè règleman sou pemi travay la

Nan dènye mizajou sou defans enterè nou an, nou te pataje ke manm ASAP yo t ap mennen batay kont nouvo pwojè règleman sou pemi travay gouvènman an — yon règleman ki t ap rann li prèske enposib pou moun k ap chèche azil yo aplike pou yon premye pemi travay epi ki t ap rann renouvèlman yo pi difisil. Ou kapab li plis sou pwojè règleman sa a sou paj ASAP sa a.  

Gras ak defans enterè manm ASAP yo, dè milye moun ak òganizasyon te soumèt kòmantè pou opoze ak chanjman yo pwopoze yo. Peryòd kòmantè a te fèmen nan dat 24 avril 2026. Men sa ki te pase:

ASAP te soumèt yon kòmantè ki gen deklarasyon 512 manm ladan l

ASAP te soumèt yon kòmantè pou opoze ak pwojè règleman an. Kòmantè a te reflete lide ak enkyetid dè milye manm ASAP ki te pale sou pemi travay pandan plizyè ane. Nan kòmantè a, ASAP te opoze fòtman ak pwojè règleman an epi li te mande gouvènman an pou l retire pwopozisyon li an.

Kòmantè ASAP la te genyen espesyalman 512 deklarasyon anonim ki soti nan manm ASAP ki te ranpli sondaj mwa pase a. Mèsi ak manm ASAP ki te pran tan pou pataje panse nou sou pwojè règleman sa a! 

Gras ak defans enterè manm ASAP yo, dè milye lòt moun ak gwoup te opoze ak règleman an 

Anplwaye ASAP yo te pataje enkyetid manm yo ak dè santèn patnè enpòtan — tankou biznis, gouvènman vil ak eta, ak sendika travayè — epi anpil nan patnè sa yo te soumèt pwòp kòmantè pa yo pou sipòte sa manm ASAP yo te pataje. 

Antou, plis pase 7,100 moun, biznis, gouvènman lokal, sendika travayè, kote pou fè adorasyon, ak òganizasyon san bi likratif te soumèt kòmantè kòm repons pou pwojè règleman an. 

Men kèk nan gwoup ki te bay kòmantè kont pwojè règleman an:

• 19 eta Ozetazini ak Distri Columbia a (li sa a) 

• Plis pase 200 majistra ak responsab konte Ozetazini (li sa a)

• Yon ansyen Direktè USCIS ak lòt ansyen ofisyèl gouvènman ki te nan pòs sa yo sa pa gen lontan (li sa a)

• Chanm Komès Ozetazini, pi gwo òganizasyon biznis Ozetazini (li sa a)

• AFL-CIO, youn nan pi gwo sendika travayè Ozetazini (li sa a)

• Konferans Evèk Katolik Ozetazini (li sa a) 

• 30 Manm Kongrè Ameriken ak 12 Senatè Ameriken (li la a ak la a)

• Plizyè douzèn òganizasyon ki konsantre sou timoun ak fanmi (li sa a) 

• Konsèy Endistri IT a, ki reprezante konpayi tankou Amazon, Apple, Google, Microsoft, Nvidia, ak Visa (li sa a)

• Ak anpil lòt ankò – ou kapab li tout kòmantè yo te soumèt an repons a pwopozisyon règ la la a.

Kilè gouvènman an pral pibliye vèsyon final règ la? 

Nou pa konnen. Gouvènman an kapab deside pibliye yon règ final nan mwa k ap vini yo. Gouvènman an ta kapab deside tou pou li pa janm pibliye yon vèsyon final pou règ la ditou.

Anvan gouvènman an kapab rann yon règ final, gouvènman an oblije egzamine epi reponn kòmantè yo. Gras ak defans manm ASAP (Pwojè ki an Defans pou Moun k ap Chèche Azil) yo, DHS dwe egzamine plizyè milye kòmantè kounye a. Nou pa konnen konbyen tan sa pral pran DHS pou li egzamine kòmantè sa yo. 

Si DHS eseye rann règ la final san li pa reponn kòmsadwa a chak gwo enkyetid yo resevwa, yon gwoup oswa yon moun kapab depoze yon pwose nan tribinal federal. Si pwose a reyisi, yon tribinal kapab anpeche règ final la antre an vigè. 

ASAP pral kontinye suiv règ sa a de prè epi kenbe manm ASAP yo enfòme. 

Antretan, gen tan toujou pou fè demann pou yon premye pemi travay anvan pwopozisyon règ la vin final. Ou kapab fè demann pou yon premye pemi travay 150 jou apre ou fin fè demann azil ou. 

Dènye enfòmasyon sou tan tretman pou pemi travay

Mwa sa a, ASAP te resevwa enfòmasyon ajou sou tan tretman pemi travay pou moun k ap chèche azil yo.

USCIS ap trete 88% nan premye pemi travay yo nan 30 jou.

ASAP (Pwojè ki an Defans pou Moun k ap Chèche Azil) te jwenn enfòmasyon ajou konsènan tan tretman pou premye pemi travay yo atravè yon pwose ki rele Rosario v. USCIS. Done sa yo se done ki ajou depi 31 mas 2026. USCIS ap toujou trete pifò premye pemi travay yo nan yon delè 30 jou. 

Men detay yo:

• 88.2% nan moun k ap chèche azil yo te resevwa yon desizyon sou premye pemi travay yo nan delè 30 jou ki kòrèk la nan mwa mas. Sa yon ti jan pi bon pase nan mwa desanm, kote 82.8% nan premye aplikasyon pou pemi travay yo te trete nan 30 jou. 

• 94.5% nan moun k ap chèche azil yo te resevwa yon desizyon sou premye aplikasyon pou pemi travay yo nan yon delè 60 jou nan mwa mas. Sa yon ti jan pi bon pase mwa desanm, kote 90.8% nan premye aplikasyon pou pemi travay yo te trete nan 60 jou.

Malerezman, reta nan renouvèlman pemi travay yo se yon pwoblèm grav.

ASAP te resevwa done dènyèman nan men USCIS konsènan tretman renouvèlman pemi travay. Menmsi done sa yo deja demode, n ap pataje yo avèk ou nan lide pou nou transparan. 

Nan mwa desanm 2025, USCIS te pibliye yon “poz sou benefis pou 40 peyi” epi li te sispann trete tout renouvèlman pemi travay pou moun k ap chèche azil ki soti nan 40 peyi. Depi lè sa a, reta nan renouvèlman pemi travay yo ogmante anpil, epi gen plizyè santèn milye aplikasyon yo pa trete ditou. 

Done USCIS te bay dènyèman yo soti nan peryòd anvan yo te kòmanse aplike poz sou benefis la nan mwa desanm 2025. Kòm rezilta, done sa yo pa reprezante reyalite jodi a. Ou kapab gade done istorik septanm 2025 yo isit la. Nan epòk sa a, reta nan tretman renouvèlman yo te deja ap vin pi gwo — menm anvan yo te sispann tretman an nèt pou 40 peyi.

Kòm rapèl: Si ou te aplike pou renouvle pemi travay ou kòm yon moun k ap chèche azil anvan 30 oktòb 2025 epi anvan pemi travay ou a te ekspire, pemi travay ou a pwolonje otomatikman pou 540 jou apre dat ekspirasyon ki ekri sou kat la. 

Manm ASAP yo sipòte sitwayènte pa nesans nan Tribinal Siprèm

Nan dat 1ye avril, Tribinal Siprèm Ozetazini te tande agiman sou sitwayènte pa nesans (birthright citizenship): dwa tout timoun ki fèt Ozetazini genyen pou yo rekonèt yo kòm sitwayen ameriken. Nou espere Tribinal Siprèm nan ap pran yon desizyon nan ka sa a anvan kòmansman mwa jiyè 2026. Antretan, yo rekonèt tout bebe ki fèt Ozetazini kòm sitwayen ameriken.

Ka ki nan Tribinal Siprèm nan se pa yon ka ASAP, men manm ASAP yo kontinye defann sitwayènte pa nesans nan plizyè fason. Jan nou te pataje sa mwa pase a, ASAP te soumèt yon dokiman yo rele yon “amicus brief” bay Tribinal Siprèm nan, ki te pataje istwa manm yo epi prezante agiman legal pou sipòte sitwayènte pa nesans. Nou te ede lòt gwoup òganize yo tou pou yo soumèt amicus brief pa yo tou. 

Manm ASAP yo kontinye pale tou nan medya yo, tankou nan CNN, Time, The Washington Post, HuffPost, ak OSV News. Atravè travay sa a, ASAP ap bati pon ak gwoup relijye yo epi l ap travay pou edike piblik la sou rezon ki fè dwa sa a enpòtan.

Kèlkeswa sa Tribinal Siprèm nan deside, ASAP ap kontinye goumen pou fanmi imigran yo ak avni pitit yo. 

Pou plis enfòmasyon sou sitwayènte pa nesans (birthright citizenship) ak pwose ki gen rapò ak sa yo, klike sou lyen sa a.

Mizajou 4 Mas 2026

Mèsi ak plis pase 1,500 manm ki te pataje enkyetid nou konsènan pemi travay

An desanm, nou te mande manm yo pou yo di nou ki politik imigrasyon ki pi enpòtan pou yo, epi manm yo te di nou pemi travay kontinye rete pi gwo priyorite yo. 

Mwa pase a, nou te mande manm yo pou yo di nou plis sou enkyetid yo konsènan pemi travay. Plis pase 1,500 manm te reponn sondaj nou an sou pemi travay. Mèsi ak chak manm ki te pran tan pou pataje enkyetid yo! Gras ak nou menm, kounye a nou konnen sou ki pwoblèm pou nou konsantre nan travay nou an. 

Majorite manm yo te di yo enkyete pou chanjman ki ka fèt nan lavni nan règleman pemi travay yo.

Majorite manm ki te reponn sondaj la (53%) te di nou pemi travay yo an règle pou kounye a, men yo enkyete pou chanjman ki ka fèt nan lavni nan règleman pemi travay yo. Yon manm te di, “Pi gwo enkyetid mwen se pou yo pa sispann bay pemi travay oswa pou yo pa chanje règleman yo pou rann sa pi difisil, sa ki pral, kòm sa dwa, afekte kapasite m pou m kenbe travay mwen.”

Yon ti tan apre nou te fin fè sondaj la ak manm yo, gouvènman an te pwopoze nouvo chanjman ki ta pral rann li pi difisil pou moun resevwa pemi travay nan lavni. Dapre nivo enkyetid segondè manm yo genyen, kounye a n ap dirije yon gwo kanpay kont chanjman yo pwopoze pou pemi travay yo, epi manm ki enterese yo kapab ede lè yo pataje lide yo.

Anpil manm te di tou yo te enkyete pou yo pa pèdi travay yo ak reta ki genyen yo.

26% nan manm ki te reponn sondaj la te di nou yo te pèdi yon travay poutèt pemi travay yo, oswa yo ta ka pèdi yon travay talè konsa. 19% te di pemi travay yo genyen kounye a ka ekspire anvan yo resevwa yon nouvo pemi travay. 19% te di premye pemi travay yo a anreta. Yon manm te di, "Gen anpil moun tankou m ki pèdi travay yo paske pemi travay yo te ekspire oswa yo te refize l. Espwa mwen se pou chak imigran jwenn yon chans pou yo viv epi pou yo gen aksè pou yo travay lib."

ASAP trè enkyete pou manm k ap pèdi travay yo ak pou reta nan pemi travay yo. N ap travay pou nou bati patenarya ak biznis, sendika travayè, vil, ak lòt òganizasyon ki kapab ede fè presyon sou gouvènman an konsènan pwoblèm sa yo. Atravè patenarya sa yo, nou te deja defann ak siksè kapasite anpil moun k ap chèche azil pou yo rete nan fòs travay la. 

Nou te mobilize patnè yo pou mande gouvènman an bay nouvo ekstansyon otomatik 540 jou pou pemi travay si aplikasyon pou renouvèlman pemi travay yo rete annatant. N ap mobilize patwon yo ak lòt moun tou pou yo pale nan laprès sou domaj kominote lokal yo sibi lè imigran yo soti nan fòs travay la. 

Si ou se yon manm ASAP (Pwojè ki an Defans pou Moun k ap Chèche Azil) epi ou gen kesyon sou pemi travay ou, ou kapab voye kesyon ou yo nan [email protected] epi ekip avoka ekspè nou yo pral reponn ou. 

Trè pye manm te di yo pa t gen kè sote ditou konsènan pemi travay yo.  

Se sèlman 6% nan manm ki te reponn sondaj la ki te di yo pa t gen kè sote konsènan pemi travay yo. 

Nan ASAP, n ap kontinye travay di jan nou kapab pou nou pwoteje pemi travay pou moun k ap chèche azil yo. Mèsi ankò ak tout moun ki te ranpli sondaj la, epi ak nou tout paske nou fè pati kominote ASAP la.

Manm ASAP yo ap dirije batay kont nouvo pwojè règleman sou pemi travay la

ASAP ap goumen pou anpeche gouvènman an rann li pi difisil pou moun k ap chèche azil yo jwenn pemi travay. Nan dat 23 fevriye, Depatman Sekirite Enteryè (DHS) te pwopoze gwo chanjman nan pemi travay pou moun k ap chèche azil yo. Pwojè règleman sa a poko definitif, sa vle di li poko yon lwa kounye a. Règleman an pral vin definitif nan yon moman apre 24 avril 2026. ASAP opoze fòtman ak nouvo pwojè règleman sa a. 

ASAP ap lanse yon kanpay kont pwojè règleman sa a.

Mwa sa a, ASAP te lanse yon kanpay pou fè presyon sou DHS pou li pa rann pwojè règleman sa a definitif. Soti 23 fevriye rive 24 avril 2026, DHS ap aksepte “kòmantè” nan men moun ak gwoup ki vle pataje opinyon yo sou règleman an. 

Dapre lalwa, DHS dwe li epi reponn tout kòmantè sa yo anvan yo ka rann règleman an definitif. Li enpòtan pou anpil gwoup ak moun soumèt kòmantè pou rezon sa yo: 

1. Gouvènman an ka chwazi retire sèten pwopozisyon ki danjere si anpil gwoup eksprime menm kalite enkyetid yo.

2. Règleman definitif la ta ka pran reta si gouvènman an bezwen plis tan pou li reponn anpil enkyetid diferan.

3. Yon tribinal ta ka anpeche règleman definitif la antre an vigè si gouvènman an pa reponn chak enkyetid.

ASAP ap mande anpil gwoup pou yo fè kòmantè sou pwojè règleman an. Pa egzanp, semèn pase a, plis pase 120 moun ki soti nan plis pase 80 òganizasyon san bi likratif, sendika, ak biwo gouvènman lokal te reyini pou diskite sou fason pou yo fè kòmantè kont pwojè règleman sou pemi travay la. ASAP te esplike chanjman yo pwopoze yo epi li te mande tout moun pou yo fè kòmantè. Nou rekonesan dèske anpil gwoup ak moun ap planifye pou yo defann kòz la kont pwopozisyon sa a. 

ASAP ap bay pwopriyetè biznis yo enfòmasyon tou sou pwojè règleman an epi l ap mande yo pou yo fè kòmantè.  

ASAP pral enkli lide manm yo nan kòmantè pa nou kont pwojè règleman an.

ASAP pral ekri epi soumèt pwòp kòmantè pa l tou pou opoze ak pwojè règleman an. Kòmantè ASAP la pral mete aksan sou enkyetid manm ASAP yo genyen konsènan pwojè règleman sa a. Ou kapab enkli lide pa ou nan kòmantè ASAP la lè ou ranpli sondaj sa a. ASAP pral enkli lide manm yo anonimman (san non ou) nan kòmantè nou an.

Si ou pito pa rete anonim oswa ou ta renmen soumèt yon kòmantè bay DHS dirèkteman, ou kapab soumèt kòmantè ou sou entènèt nan paj entènèt an gouvènman sa a. Men sa ou dwe konnen: 

• Kòmantè yo se piblik. Pou pwoteje vi prive ou, ou kapab limite kantite enfòmasyon pèsonèl ou mete nan kòmantè ou a. 

• Kòmantè yo dwe soumèt an anglè oswa avèk yon tradiksyon an anglè. 

• Kòmantè yo dwe enkli kòd DHS Docket No. USCIS-2025–0370 nan tèks kòmantè a. 

• Dènye limit pou voye kòmantè yo se 24 avril 2026, anvan 11:59 nan aswè, lè nan zòn Lès (Eastern Time). 

ASAP prezante istwa moun k ap chèche azil yo devan Lakou Siprèm sou keksyon sitwayènte pa nesans la

Lakou Siprèm peyi Etazini ap egzamine kounye a si Dekrè Egzekitif ki ap eseye limite sitwayènte pa nesans (birthright citizenship) pou pitit imigran yo se yon bagay ki legal. Nou kwè li pa legal. 

Gen plizyè pwose ki ankou sou keksyon sitwayènte pa nesans la, epi ka Lakou Siprèm ap egzamine a rele Barbara v. Trump. Sa a se pa yon pwose ASAP, men n ap travay di toujou pou nou defann sitwayènte pa nesans. 

Nan mwa fevriye, ASAP ak anpil lòt gwoup te di Lakou Siprèm poukisa Dekrè Egzekitif sou Sitwayènte pa Nesans la ilegal, li kont Konstitisyon Etazini an, epi li pa bon. ASAP te soumèt agiman nou yo nan yon dokiman yo rele yon "amicus brief." Dokiman nou an eksplike kijan Dekrè Egzekitif sou Sitwayènte pa Nesans la ta pral afekte moun k ap chèche azil ak pitit yo si Tribinal la ta pèmèt li antre an vigè. Kounye a, Dekrè Egzekitif la pa an vigè, epi gouvènman an dwe rekonèt sitwayènte ameriken pou tout tibebe ki fèt Ozetazini. 

Dokiman ASAP la gen ladan l istwa manm ASAP yo, epi li eksplike kijan Dekrè Egzekitif sa a ta ka fè moun k ap chèche azil ak lòt imigran ki bati lavi yo Ozetazini mal. Nou vle pou Lakou Siprèm tande eksperyans ak pèspektiv manm ASAP yo epi montre sa ki anje pou fanmi k ap chèche sekirite ak estabilite. 

Lakou Siprèm pral tande agiman oral yo nan dat 1ye avril 2026, epi li pral pwobableman pran yon desizyon apre sa, anvan kòmansman mwa jiyè 2026. Ou kapab li plis enfòmasyon sou sitwayènte pa nesans isit la.

Mizajou 4 fevriye 2026

Yon jij mete fen nan poz sou frè azil pou peye chak ane a, men pwose ASAP la ap kontinye

Malerezman, nan dat 2 fevriye 2026, jij nan pwose manm ASAP yo te mete fen nan poz ki te genyen sou frè azil pou peye chak ane (annual asylum fee). Sa vle di USCIS ak tribinal imigrasyon yo kapab mande frè azil pou peye chak ane a ankò. 

Manm ASAP yo te genyen poz sou frè a nan mwa oktòb 2025 poutèt gwo pwoblèm ki te genyen nan fason gouvènman an t ap aplike frè azil pou peye chak ane a. Nan mwa janvye, gouvènman an te di yo ranje pwoblèm yo epi yo te mande jij la pou l fini ak poz sou frè a. Manm ASAP yo ap kontinye gen pwoblèm ak frè yo, donk ASAP te di jij la poz sou frè a ta dwe kontinye. Malerezman, jij la te dakò ak gouvènman an epi li te deside mete fen nan poz sou frè a nan dat 2 fevriye. 

Menmsi jij la mete fen nan poz sou frè a, pwose a pa fini. Pa egzanp, ASAP ap kontinye agimante ke menmsi frè azil pou peye chak ane a ta aplike pou demann azil, li pa ta dwe aplike pou demann pou sispansyon depòtasyon (withholding of removal), ki ta dwe enkli otomatikman chak fwa yon moun soumèt yon Fòm I-589, oswa pou demann pwoteksyon anba Konvansyon Kont Torti. Tanpri kontakte ASAP nan [email protected] si ou te gen yon ka nan tribinal imigrasyon epi ou te resevwa yon lòd depòtasyon (removal order) paske ou pa t peye frè azil pou peye chak ane a, san jij la pa t egzamine demann ou pou sispansyon depòtasyon oswa pwoteksyon anba Konvansyon Kont Torti a.

ASAP pral kontinye goumen nan pwose sa a, epi n ap kenbe paj pwose nou an ajou. Ou kapab li paj frè nou an tou pou w konnen si dat pou w peye frè azil pou peye chak ane w la rive ak kijan pou w peye.

Tanpri pataje enkyetid ou yo konsènan pemi travay

An desanm, ou te di nou pemi travay se pi gwo priyorite w. Kounye a, nou espere aprann plis sou pi gwo enkyetid ou yo konsènan pemi travay pou nou kapab konsantre travay nou nan domèn sa yo. 

Tanpri ranpli sondaj sa a anvan 10 fevriye.  Mèsi paske ou pran tan pou pataje lide ou avèk nou epi paske ou fè pati kominote ASAP la!

Mizajou 13 janvye 2026

Mèsi a plis pase 3,000 manm ki te pataje ki politik ki pi enpòtan pou yo

Mwa pase a, nou te mande manm yo pou yo di nou ki pwoblèm ki pi enpòtan pou yo, nan ranpli yon ti sondaj rapid. Plis pase 3,000 manm te reponn. Mèsi a tout moun ki te pataje opinyon yo! Nou pral sèvi ak enfòmasyon sa yo pou gide travay nou.

De pi gwo pwoblèm manm yo te idantifye yo se te (1) pemi travay ak (2) detasyon ak depòtasyon. 

Premyèman, 83.7% nan manm yo te di moun k ap chèche azil yo ta dwe kapab jwenn epi kenbe pemi travay. Sa a se te nimewo en priyorite nan sondaj la. Dapre pawòl yon manm, “Moun k ap chèche azil yo ta dwe kapab travay legalman pandan y ap tann aplikasyon ki annatant yo pou nou kapab viv, epi siviv isit la.” Pemi travay rete yon gwo priyorite pou manm yo depi plizyè ane, baze sou opinyon plis pase 100,000 moun k ap chèche azil. 

Dezyèmman, 83.3% nan manm yo te di moun k ap chèche azil yo pa ta dwe nan detasyon oswa depòte nan peyi tyè. Jan yon manm te di, “Moun k ap chèche azil yo ta dwe santi yo an sekirite pou yo ale nan entèvyou yo san yo pa pè pou yo ta mete yo nan detasyon.” 

Apre sa, ant 60% ak 70% nan manm yo te di kat pwoblèm sa yo te enpòtan pou yo: dosye azil yo ta dwe trete olye yo kanpe yo; li ta dwe posib pou genyen azil san kritè ki twò strik; peyi orijin espesifik ou pa ta dwe anpeche w genyen yon estati imigrasyon; epi si ou te genyen azil oswa yon lòt estati imigrasyon, yo pa ta dwe retire li nan men w.

ASAP (Pwojè ki an Defans pou Moun k ap Chèche Azil) pral sèvi ak repons sa yo pou gide travay nou. 

ASAP te konsantre sou aksè nan pemi travay depi yon bon bout tan, baze sou priyorite manm yo genyen depi lontan. Ou kapab jwenn plis pase 30 kesyon ak repons sou pemi travay, epi li enfòmasyon sou kèk nan defans nou fè dènyèman pou pemi travay anba a. Baze sou sondaj sa a, nou pral kontinye travay sa a epi n ap jwenn nouvo fason tou pou nou goumen pou pwoteje pemi travay yo.  

Baze sou rezilta sondaj la, nou pral bay priyorite tou ak pwoblèm ki gen rapò ak detasyon ak depòtasyon nan peyi tyè – ni nan kreye resous ni nan sipòte efò defans yo. Nou te deja ajoute enfòmasyon ajou sou depòtasyon nan peyi tyè ak detasyon sou paj entènèt an nou an. Epi nou pral kontinye pataje plis enfòmasyon sou politik ak efò defans ki gen rapò ak pwoblèm sa yo. 

Ankò, nou rekonesan anpil anvè chak manm ki te pran tan pou ranpli sondaj la. Mèsi a nou tout paske nou fè pati kominote ASAP la.

ASAP travay ak biznis yo pou pwoteje aksè ak pemi travay 

Kòm pati nan estrateji ASAP pou defann aksè ak pemi travay pou moun k ap chèche azil yo, ASAP travay ak biznis yo pou yo pale sou enpòtans pou kenbe moun k ap chèche azil yo nan fòs travay la. 

Pa egzanp, nan mwa desanm, ASAP te travay ak gwoup biznis yo pou di gouvènman Ameriken an pou l rann li pi fasil pou moun k ap chèche azil yo jwenn ak renouvle pemi travay yo. Gwoup biznis yo te mande gouvènman an pou tan tretman yo pi rapid ak yon aksè fiks ak pemi travay. Yo te pataje jan moun k ap chèche azil yo enpòtan pou ekonomi ak fòs travay Ozetazini. 

Nou te kontan wè kèk nan pi gwo gwoup biznis Ozetazini yo te chwazi pale: U.S. Chamber of Commerce (ki gen pi gwo kantite anplwayè kòm manm), Critical Labor Coalition, National Association of Manufacturers, ak National Association of Wholesaler-Distributors. Nou espere gouvènman an va koute gwoup biznis sa yo, epi defans yo va fè yon diferans. 

Epitou nan mwa desanm, ASAP te travay ak lidè biznis yo pou yo pale nan medya yo sou jan chanjman ki fèt dènyèman nan pemi travay yo prejidis pou biznis yo. Ou kapab li youn nan anpil atik nan medya yo ki te parèt apre travay sa a.

Nan mwa k ap vini yo, ASAP ap kontinye travay ak biznis yo ansanm ak koalisyon pou pemi travay la pou goumen pou aksè ak pemi travay, epi n ap kenbe ou o kouran sou paj entènèt an sa a.

Mizajou sou tan tretman pou premye pemi travay yo

Mwa sa a, ASAP te jwenn enfòmasyon ajou sou tan tretman pou premye pemi travay yo atravè yon pwosè ki rele Rosario v. USCIS. Done sa yo kòrèk depi nan dat 31 desanm 2025. 

Tan tretman pou premye pemi travay yo te amelyore anpil depi dènye rapò mwa oktòb la.  Men, USCIS te trete mwens aplikasyon pou premye pemi travay nan mwa novanm ak desanm pase nan mwa oktòb. 

Men detay yo: 

• 82.8% moun k ap chèche azil yo te resevwa yon desizyon sou premye pemi travay yo nan peryòd 30 jou ki kòrèk la nan mwa desanm, epi 81.6% te resevwa yon desizyon nan lespas 30 jou nan mwa novanm. De mwa sa yo te pi bon lontan pase nan mwa oktòb, kote 51.6% nan aplikasyon pou premye pemi travay yo te trete nan lespas 30 jou.

• 90.8% moun k ap chèche azil yo te resevwa yon desizyon sou aplikasyon pou premye pemi travay yo nan lespas 60 jou nan mwa desanm, epi 87.2% te resevwa yon desizyon nan lespas 60 jou nan mwa novanm. De mwa sa yo te pi bon lontan pase mwa oktòb, kote 64.1% nan aplikasyon pou premye pemi travay yo te trete nan lespas 60 jou. 

• Menmsi reta nan tretman yo te amelyore nan mwa novanm ak desanm 2025, mwens moun k ap chèche azil an total te resevwa desizyon sou aplikasyon yo konpare ak mwa anvan yo. Nan mwa desanm, sèlman 50,410 moun k ap chèche azil te resevwa yon desizyon sou aplikasyon pou premye pemi travay yo, epi 89,148 moun k ap chèche azil te resevwa yon desizyon nan mwa novanm. Sa se yon gwo diminisyon parapò ak 121,341 moun k ap chèche azil ki te resevwa yon desizyon nan mwa oktòb. 

ASAP ap kontinye defann pou USCIS ranje reta nan tretman yo epi pou yo trete plis aplikasyon pou pemi travay.