Yon nouvo règ ekstansyon otomatik pa afekte renouvèlman pemi travay ki te depoze anvan 30 oktòb 2025

Nan dènye ane sa yo, anpil moun te resevwa yon ekstansyon otomatik pou pemi travay yo genyen kounye a apre yo te fin aplike pou renouvle pemi travay yo. Nan dat 30 oktòb 2025, gouvènman an te sispann bay nouvo ekstansyon otomatik pou pemi travay. Men, si ou te resevwa yon ekstansyon otomatik pou pemi travay ou nan dat 29 oktòb 2025 oswa anvan sa, ekstansyon ou an toujou valab!

Kouman pou mwen fè konnen si mwen te deja resevwa yon ekstansyon otomatik pou pemi travay mwen? 

Pemi travay ou te deja pwolonje otomatikman pou 540 jou si:

• Pemi travay ou an baze sou yon aplikasyon azil ki annatant, EPI 

• Ou te aplike pou renouvle pemi travay ou anvan dat ekspirasyon ki ekri sou kat la, EPI 

• Ou te aplike pou renouvle pemi ou nan dat 29 oktòb 2025 oswa anvan sa.

Si ou te deja resevwa yon ekstansyon otomatik pou pemi travay ou, ekstansyon ou an toujou valab jodi a. Nouvo règleman an pa konsène ou. Gen kèk lòt kalite pemi travay ki te deja resevwa ekstansyon otomatik tou, anplis de pemi travay ki baze sou yon aplikasyon azil ki annatant. Pou plis enfòmasyon sou ekstansyon otomatik la.

Kisa k ap pase si mwen aplike pou renouvle pemi travay mwen nan dat 30 oktòb 2025 oswa apre sa? 

Si ou aplike pou renouvle pemi travay ou nan dat 30 oktòb 2025 oswa apre sa, pemi travay ou ap ekspire nan dat ekspirasyon an, san okenn ekstansyon. 

Ou kapa b soumèt aplikasyon pou renouvèlman pemi travay ou omwen yon ane anvan dat ekspirasyon an, pou ogmante chans pou ou resevwa nouvo pemi travay ou anvan sa ou genyen kounye a ekspire. Aprann kijan pou renouvle pemi travay ou.

Poukisa pemi travay ki baze sou demann azil yo pa afekte imedyatman pa règleman sa a? 

Gras ak defans manm ASAP (Pwojè ki an Defans pou Moun k ap Chèche Azil) yo, soti 1ye oktòb 2023 rive 4 desanm 2025, Sèvis Sitwayènte ak Imigrasyon Etazini (USCIS) te bay moun k ap chèche azil yo pemi travay ki bon pou 5 an. Moun k ap chèche azil ki gen pemi travay 5 an ta dwe gen anviwon 3 ane oswa plis ki rete sou pemi travay yo epi yo pa ta dwe bezwen renouvle yo ankò.

Anvan 1ye oktòb 2023, moun k ap chèche azil yo te resevwa pemi travay pou 2 zan. Sa vle di dènye pemi travay 2 zan pou moun k ap chèche azil yo te deja ekspire nan mwa septanm 2025. Yon moun k ap chèche azil ta dwe soumèt aplikasyon renouvèlman li anvan dat ekspirasyon an pou l te ka resevwa ekstansyon otomatik la. 

Ki lè règ sa a pral gen efè sou moun k ap chèche azil yo?

Si ou te resevwa yon pemi travay pou 5 an nan dat 4 desanm 2025 oswa anvan sa, ou ta dwe gen kèk ane ki rete toujou anvan pemi travay ou a ekspire. Si nouvo règ la kontinye pandan plizyè ane, moun k ap chèche azil yo pral santi efè a pandan pemi travay 5 an yo a ap pwoche dat ekspirasyon yo an 2028 oswa apre sa. Nan moman sa a, si yo renouvle pemi travay yo, yo p ap resevwa yon ekstansyon otomatik. 

Si ou resevwa yon pemi travay pou 18 mwa apre 4 desanm 2025, nouvo règ sa a ka gen efè sou ou pi vit. Paske pa gen ekstansyon otomatik, ou ka vle renouvle pemi travay ou yon ane oswa plis anvan dat ekspirasyon an. Kounye a, USCIS di y ap trete pifò renouvèlman pemi travay nan anviwon 7 mwa, men pafwa sa pran plis tan. Ou kapa b aplike yon ane davans pou ogmante chans pou ou resevwa yon nouvo pemi travay anvan sa ou genyen kounye a ekspire. Sa ta vle di renouvle pemi travay ou 6 mwa apre ou fin resevwa l pou premye fwa.

Ki lòt kalite pemi travay ki pa gen efè imedyat anba règ sa a? 

Premyèman, nouvo règ la pa gen efè sou pemi travay ki baze sou Estati Pwoteksyon Tanporè (TPS) (kategori A12 ak C19). Pemi travay sa yo swiv yon règ diferan lè se pou ekstansyon. Aprann sou ekstansyon pou pemi travay ki baze sou TPS. 

Dezyèmman, menm jan ak moun k ap chèche azil yo, gen kèk lòt imigran ki pa ta dwe bezwen renouvle pemi travay yo ankò. Men yon lis kalite pemi travay ki pa ta dwe gen efè imedyat anba règ sa a: 

• Moun k ap chèche azil (kategori C08)

• Moun ki gen estati azil (asylee status) (kategori A05)

• Moun ki gen sispansyon depòtasyon (withholding of removal) (kategori A10)

• Refijye (kategori A03)

• Moun k ap aplike pou rezidans pèmanan (permanent residence) (kat rezidan pèmanan) (kategori C09)

• Moun k ap aplike pou anilasyon depòtasyon (kategori C10)

• Moun k ap aplike pou soulajman anba NACARA (kategori C10)

Menm jan ak moun k ap chèche azil yo, imigran nan kategori sa yo te resevwa pemi travay pou 5 an tou ant 1ye oktòb 2023 ak 4 desanm 2025. Imigran nan kategori sa yo ki gen pemi travay pou 5 an ta dwe gen anviwon 3 ane oswa plis ki rete sou pemi travay yo epi konsa yo pa ta dwe bezwen renouvle ankò.

Anvan 1ye oktòb 2023, imigran nan kategori sa yo te resevwa pemi travay pou 1 oswa 2 an. Sa vle di dènye pemi travay pou imigran nan kategori sa yo te deja ekspire nan mwa septanm 2025 si se pa t anvan sa. Yon imigran nan youn nan kategori sa yo ta dwe soumèt aplikasyon renouvèlman li anvan dat ekspirasyon an pou l te ka resevwa ekstansyon otomatik la. 

Apre 4 desanm 2025, imigran nan kategori sa yo pral resevwa pemi travay ki valab pou 18 mwa.

Ki kalite pemi travay ki ta kapab afekte imedyatman pa règ sa a?

Gen kèk lòt kalite pemi travay ki ta kapab afekte imedyatman pa règ sa a, paske yo te elijib pou ekstansyon otomatik la anvan sa. ASAP pa ekspè nan kalite pemi travay sa yo, donk nou pa konnen ki jan règ la pral afekte yo. Pa egzanp, nou pa konnen istwa ki lè ak pou ki peryòd validite yo te konn bay pemi travay nan kategori sa yo. 

• Moun k ap fè pwòp demann pa yo anba lwa VAWA (kategori C31)

• Mari oswa madanm moun ki gen viza H1B (kategori C26)

• Moun ki gen viza N-8 ak N-9 (kategori A07)

• Sitwayen Mikwonezi, Zile Machal, oswa Palawou (kategori A08)

• Mari oswa madanm moun ki gen viza E (kategori A17)

• Mari oswa madanm moun ki gen viza L (kategori A18)

• Moun k ap viv Ozetazini depi 1ye janvye 1972 (kategori C16)

• Moun ki soumèt Fòm I-799 (kategori C20)

• Moun ki soumèt Fòm I-687 (kategori C22)

• Moun k ap aplike pou rezidans pèmanan (permanent residence) anba lwa LIFE Act (kategori C24)

Gen lòt kategori pemi travay tou, men lòt kategori pemi travay sa yo pa t kalifye pou ekstansyon otomatik.