Se avoka imigrasyon ekspè ASAP yo ki ekri sa · Mizajou nan dat
"Gouvènman an ap rann bagay yo difisil pou imigran ki, menm jan avè m, ap eseye fè tout bagay kòrèkteman.” - Manm ASAP
Nan dat 1ye jiyè 2026, manm ASAP yo te depoze yon pouswit lajistis pou konteste fason USCIS ap aplike frè azil pou peye chak ane (annual asylum fee) ak atak sou pemi travay pou moun k ap chèche azil ak moun ki gen TPS yo. Yon lòt pouswit lajistis ASAP, ASAP v. EOIR, ap konteste separeman fason tribinal imigrasyon an ap aplike frè azil pou peye chak ane a.
Ete sa a, manm ASAP yo te genyen 3 gwo viktwa! Premyèman, jij la deside USCIS pa kapab bay penalite pou peman frè azil pou peye chak ane ki rate pandan ka nou an ap tann desizyon. Anvan desizyon sa a, USCIS te pare pou l rejte 227,186 aplikasyon azil epi anile plizyè santèn milye pemi travay. Dezyèmman, USCIS pwolonje otorizasyon travay pou plizyè santèn milye moun ki gen Estati Pwoteksyon Tanporè (TPS) ki soti El Salvador, Soudan, ak Ikrèn. Epi twazyèmman, USCIS remete an plas delè 30 jou pou trete premye aplikasyon pemi travay pou moun k ap chèche azil.
Li toujou enpòtan pou ou tcheke chak semèn pou w konnen si dat pou w peye frè azil pou peye chak ane w la rive. Li paj entènèt an sou frè azil pou peye chak ane nou an pou plis detay sou fason pou w peye frè a.
Rezime Ka a:
Nan dat 1ye jiyè 2026, manm ASAP yo te depoze yon pouswit lajistis pou konteste fason USCIS ap aplike frè azil pou peye chak ane a ak atak sou pemi travay pou moun k ap chèche azil ak imigran ki gen TPS.
Nou te depoze pouswit lajistis sa a ansanm ak manm National TPS Alliance (NTPSA), Venezuelan Association of Massachusetts (VAM), Service Employees International Union (SEIU), ak SEIU Local 32BJ (32BJ). Avoka ki sou ka sa a soti nan ASAP (Pwojè ki an Defans pou Moun k ap Chèche Azil), Democracy Forward, ak National Day Laborer Organizing Network (NDLON).
Manm ASAP yo te eksprime gwo enkyetid konsènan frè azil pou peye chak ane a ak pemi travay yo, epi nou te depoze pouswit lajistis sa a kòm repons pou enkyetid yo.
Kat pwen prensipal ki nan pouswit lajistis la anba la a, ansanm ak estati yo aktyèlman.
Chaje frè azil pou peye chak ane a: Manm ASAP (Pwojè ki an Defans pou Moun k ap Chèche Azil) yo te diskite ke USCIS ap chaje frè azil pou peye chak ane (annual asylum fee) nan yon fason ki ilegal, tankou lè yo bay avi ki pa fyab epi lè yo chaje frè a yon fason retroaktif.
Malerezman, USCIS kapa b kontinye chaje frè azil pou peye chak ane a. Moun k ap chèche azil yo ta dwe kontinye tcheke chak semèn pou wè si dat pou yo peye frè a rive epi peye l pi vit posib. Pou plis enfòmasyon, klike sou lyen sa a.
Sanksyon ki gen rapò ak frè azil pou peye chak ane a: Manm ASAP yo te diskite ke USCIS ap enpoze sanksyon sevè pou moun ki pa peye frè azil pou peye chak ane a, tankou anile pemi travay yo imedyatman epi rejte aplikasyon azil yo.
Jij la te dakò ak manm ASAP yo epi li te di ke USCIS pa kapa b enpoze sanksyon kounye a pou moun ki te rate dat limit peman an – menmsi USCIS kapa b toujou chaje frè a. Jij la te sispann sanksyon sa yo pou premye fwa nan dat 21 jiyè epi apre sa li te kontinye sispansyon an nan yon dezyèm desizyon nan dat 5 out. USCIS te pare pou l te rejte 227,186 aplikasyon azil ki annatant epi anile dè santèn milye pemi travay paske moun yo pa t peye frè a.
Apre sa, nan dat 13 out, gouvènman an te reouvri peryòd peman ki te ekspire yo poutèt pwose manm ASAP yo te entante a. Si ou te rate dat limit USCIS la anvan sa, tcheke kounye a pou wè si ou kapa b peye, epi peye rapidman si ou kapa b!
Validite pemi travay ki baze sou TPS: Manm ASAP yo te diskite ke USCIS t ap eseye fini kèk pemi travay ki baze sou Estati Pwoteksyon Tanporè (TPS) anvan lè yon fason ki ilegal, nan dat 22 jiyè. Gras ak efò sa yo, pemi travay ki baze sou TPS pou El Salvador, Soudan, ak Ikrèn pwolonje!
El Salvador: Nan dat 9 septanm 2026, USCIS te anonse ke si ou te resevwa TPS pou El Salvador, pwoteksyon ou ak pemi travay ou rete valid pou kounye a, jiskaske yo fè nenpòt lòt nouvo anons. Gade paj entènèt an USCIS la. Si sa nesesè, ou kapa b montre patwon ou tou lèt sa a ki soti nan National TPS Alliance.
Soudan ak Ikrèn: Pemi travay ou pwolonje otomatikman jiska 19 oktòb si ou te aplike pou renouvle pemi travay ou pandan peryòd re-enskripsyon an, epi w ap tann toujou pou w resevwa nouvo kat pemi travay ou a. Pemi travay ou pwolonje otomatikman tou jiska 19 oktòb si ou te resevwa yon nouvo kat pemi travay ki gen yon dat ekspirasyon ki ekri sou li anvan 19 oktòb 2026. USCIS ta dwe voye yon lèt pwolongasyon ba ou pa lapòs oswa nan kont USCIS (USCIS account) ou.
Pwosesis pemi travay ki baze sou azil: Manm ASAP yo te diskite ke USCIS te retire yon fason ilegal yon ansyen règ ki te mande pou premye pemi travay pou moun k ap chèche azil yo te trete nan yon delè 30 jou — epi yo te fè chanjman sa a san yo pa enfòme piblik la.
Nan dat 21 jiyè, USCIS te remete egzijans pou trete premye pemi travay pou moun k ap chèche azil yo nan 30 jou a. USCIS te fè chanjman sa a apre manm ASAP yo te poze pwoblèm sa a nan pwose a. Sa se te yon gwo viktwa!
Kwonoloji Pwosè a:
1ye jiyè 2026: Manm ASAP yo te depoze yon pwosè nan tribinal federal distrik (district court) nan Massachusetts, ansanm ak manm National TPS Alliance (NTPSA), Venezuelan Association of Massachusetts (VAM), Service Employees International Union (SEIU), ak SEIU Local 32BJ (32BJ).
2 jiyè 2026: Òganizasyon yo te depoze yon Demann pou kanpe Aksyon Ajans lan.
13 jiyè 2026: ASAP te depoze yon deklarasyon siplemantè konsènan pwoblèm ak frè azil pou peye chak ane (annual asylum fee) ak pwosesis pemi travay.
15 jiyè 2026: Òganizasyon yo te depoze yon Demann Ijan pou yon Sispansyon Administratif, pou mande jij la fè yon poz nan politik USCIS yo jiskaske li gen tan pou l pran yon desizyon.
21 jiyè 2026: USCIS te pibliye yon “amannman koreksyon” pou Règleman Final Pwovizwa avril 2026 la. Koreksyon an remete egzijans pou USCIS trete premye pemi travay pou moun k ap chèche azil yo nan yon delè 30 jou! Sa se yon viktwa pou manm ASAP yo.
21 jiyè 2026: Jij la te aksepte yon pati nan Demann Ijan nou an pou yon Sispansyon Administratif.
30 jiyè 2026: Yon odyans an pèsòn te fèt nan tribinal federal distrik nan Boston, Massachusetts.
5 out 2026: Jij la te aksepte yon pati epi li te refize yon pati nan Demann nou an pou kanpe Aksyon Ajans lan. Jij la te bloke USCIS tanporèman pou yo pa bay penalite si yon moun pa peye frè azil pou peye chak ane a. Men, jij la te pèmèt USCIS fini kèk pemi travay ki baze sou Estati Pwoteksyon Tanporè (TPS) pi bonè.
6 out 2026: Òganizasyon yo te depoze yon Avi Apèl, ak yon Demann Ijan pou yon Sispansyon Pandan Apèl la nan Tribinal Apèl Premye Sikwi a.
7 out 2026: Premye Sikwi a te refize Demann Ijan pou yon Sispansyon Pandan Apèl la san prejije, epi li te mande òganizasyon yo pou yo depoze l nan Tribinal Distrik la. Apre sa, òganizasyon yo te depoze yon Demann Ijan pou yon Sispansyon nan Tribinal Distrik la.
10 out 2026: Tribinal Distrik la te refize Demann Ijan pou yon Sispansyon an. Apre sa, òganizasyon yo te depoze yon Nouvo Demann Ijan pou yon Sispansyon ak yon Sispansyon Administratif Imedya nan Tribinal Apèl Premye Sikwi a. Premye Sikwi a te refize Demann nou an pou yon Sispansyon Administratif Imedya, epi li te bay lòd pou prepare orè tribinal (briefing schedule) sou Demann Ijan pou yon Sispansyon an.
12 out 2026: Gouvènman an te depoze yon Opizisyon kont Demann Ijan nou an pou yon Sispansyon.
20 out 2026: Apre gouvènman an te pwolonje pemi travay pou moun ki gen TPS ki soti nan peyi El Salvador, Soudan, ak Ikrèn, òganizasyon yo te retire Demann Ijan nou an pou yon Sispansyon.
Kèk Dokiman Chwazi:
Anba la a gen yon seleksyon dokiman ki gen rapò ak pwosè a.
Pwosè sa a konteste plizyè politik DHS, ladan yo gen yon Règleman Final Pwovizwa avril 2026 (IFR) konsènan frè azil pou peye chak ane a, TPS, ak pemi travay.
Premye Kòmantè ASAP pou Opone IFR la, ki te soumèt ansanm ak NTPSA, SEIU, ak 81 lòt òganizasyon (29 me 2026)
Dezyèm Kòmantè ASAP pou Opone IFR la (29 jen 2026)
Plent (1ye jiyè 2026)
Demann pou kanpe Aksyon Ajans lan (2 jiyè 2026)
Amannman Koreksyon DHS la pou Règleman Final Pwovizwa avril 2026 la (21 jiyè 2026)
Lòd ki Aksepte yon Pati nan Demann Ijan pou yon Sispansyon Administratif (21 jiyè 2026)
Lòd ki Aksepte yon Pati epi ki Refize yon Pati nan Demann pou kanpe Aksyon Ajans lan (5 out 2026)
Nouvo Demann Ijan pou yon Sispansyon Pandan Apèl la (10 out 2026)
ASAP (Pwojè ki an Defans pou Moun k ap Chèche Azil) gen kòm objektif pou bay enfòmasyon ki baze sou reyalite konsènan lwa imigrasyon aktyèl yo. Enfòmasyon sa yo pa reprezante konsèy legal.
Tout kontni legal yo ekri epi revize legalman pa ekip avoka ekspè nan imigrasyon ASAP yo. Avoka ekspè ASAP yo gen plizyè dizèn ane eksperyans nan lwa imigrasyon ak nan litij. Ansanm, yo genyen plizyè santèn ka. Avoka nou yo admèt nan Bawo nan plizyè eta Ozetazini, yo gen diplòm nan lwa nan inivèsite tankou Harvard, Yale, ak UCLA, epi yo genyen plizyè pri pou travay legal yo fè.