ASAP (Pwojè ki an Defans pou Moun k ap Chèche Azil) se pi gwo kolektif moun k ap chèche azil nan istwa Etazini. Lè manm yo rantre, nou mande yo: “Ki yon sèl bagay ou ta chanje nan pwosesis azil la?” Rezilta yo – ki rasanble plis pase 100,000 lide – gide travay ASAP pou bati yon Etazini ki pi akeyan. Avèk rezilta sa yo nan tèt yo, manm ASAP yo travay pou fè vizyon kolektif yo vin yon reyalite – nan pataje istwa yo, lanse kanpay defans, epi depoze pouswit lajistis.
Desann anba pou li 5 pi gwo fason gouvènman ameriken an ta dwe chanje pwosesis azil la, dapre 140,759 moun k ap chèche azil ki soti nan plis pase 175 peyi atravè mond lan.
1. Gouvènman an ta dwe akselere tan tretman pou pèmi travay ak entèvyou azil yo.
“Kounye a, gen yon datant plizyè ane pou nou kapab fè entèvyou azil nou an. Tan datant lan ak ensètitid la lakòz mwen gen gwo kè sere ak enkyetid.” – Manm ASAP ki soti Meksik
“Mwen vle travay epi peye taks, men akòz reta nan USCIS mwen pa gen posiblite sa a.” – Manm ASAP ki soti Ikrèn
“Sa fè yon tan vrèman long depi m ap tann. Mwen wè tout biznis sa yo ki bezwen anplwaye, epi mwen ta renmen travay men mwen pa kapab.” – Manm ASAP ki soti Ouganda
2. Pèmi travay ak nimewo social security (SSN) ta dwe pi fasil pou moun jwenn.
“Nou tout gen pitit, epi yo depann sou nou pou manje, lojman, ak lòt bezwen debaz. San yon pèmi travay, nou pa kapab pran swen yo.” – Manm ASAP ki soti Ayiti
“San yon nimewo social security ki vini ak yon pèmi travay, li enposib pou achte asirans sante epi resevwa tretman medikal.” – Manm ASAP ki soti Larisi
3. Pwosesis azil la ta dwe pi aksesib epi transparan.
“Pwosesis la long epi li trennen. Li ta bon pou nou jwenn nouvèl olye pou nou rete nan fènwa pandan tout ane sa yo”. – Manm ASAP ki soti Trinidad ak Tobago
“Mwen ta renmen kapab fè tout bagay sou entènèt.” – Manm ASAP ki soti Venezyela
“USCIS kominike ak aplikan azil yo nan yon langaj ki vag epi ki difisil pou entèprete. Yo ta dwe itilize yon langaj ki pi senp pou plis moun ka konprann sa yo dwe fè apre.” – Manm ASAP ki soti Lend
4. Yo ta dwe akòde plis moun estati azil (asylee status), epi li ta dwe pi fasil pou moun jwenn estati imigrasyon Ozetazini.
“Etazini ta dwe akeyi moun k ap chèche azil k ap kouri pou vyolans, li pa ta dwe kreye règ ak lwa ki trè di pou anpeche yo chèche azil.” – Manm ASAP (Pwojè ki an Defans pou Moun k ap Chèche Azil) ki soti nan peyi Afganistan
“Sa fè mal lè yo pa kwè pawòl ou. Moun tankou mwen dwe defann tèt nou epi nou dwe kapab genyen ka azil nou devan yon jij.” – Manm ASAP ki soti nan peyi Kiba
“Yon ka azil pa pi enpòtan pase yon lòt. Pitit nou yo merite gen yon lavi san laperèz.” – Manm ASAP ki soti nan peyi Kolonbi
5. Yo ta dwe trete moun k ap chèche azil yo ak plis limanite.
“Gouvènman an bezwen sispann entimide moun k ap chèche azil ak lòt imigran.” – Manm ASAP ki soti nan peyi Brezil
“Moun nwa k ap chèche azil merite yon tretman ki jis epi ki egal.” – Manm ASAP ki soti nan peyi Kamewoun
“Mwen kwè pwosesis azil la ta dwe fèt yon fason ki gen plis limanite. Moun k ap chèche azil yo pa yon nimewo, nou se èt imen.” – Manm ASAP ki soti nan peyi Venezyela
Kijan priyorite sa yo gide travay ASAP la?
Antanke yon òganizasyon manm, nou konnen manm ASAP yo se ekspè sou pi gwo pwoblèm ki genyen nan pwosesis azil la, ak fason pou ranje yo. Pou rezon sa a, travay defans ASAP ap fè kounye a konsantre sou abòde de premye priyorite manm nou yo: diminye reta nan dosye yo epi fè li pi fasil pou moun k ap chèche azil resevwa pèmi travay yo.
Nou kwè manm nou yo se fòs nou. Kidonk, lè manm yo di nou sa ki enpòtan pou yo, nou koute. Dapre pawòl yon manm ASAP ki soti nan peyi Meksik, “Pa janm sispann goumen! Chonje ke ansanm, nou akonpli anpil bagay.”
Kijan ASAP te fè detèmine 5 pi gwo priyorite sa yo?
ASAP te rive jwenn lis priyorite sa yo konsa: dabò, nou te li yon echantiyon 1,000 repons manm yo pou nou te idantifye 12 priyorite ki pi komen yo. Depi lè sa a, nou li repons chak manm, nou konekte repons lan ak youn oswa plis nan 12 priyorite ki pi komen yo, epi nou konte rezilta yo pou detèmine 5 pi gwo yo. Lòt priyorite manm ASAP yo souvan soulve gen ladan reyini fanmi yo ak diminye frè nan pwosesis azil la.
Kijan priyorite manm ASAP yo chanje avèk letan?
Depi lè nou te premye kalkile rezilta yo an 2021, akselere tan tretman pou pemi travay ak entèvyou azil rete priyorite nimewo 1 manm yo depase tout lòt, epi apre sa se rann pemi travay yo pi fasil pou jwenn.
Men, avèk letan, twazyèm ak katriyèm priyorite yo chanje plas. Priyorite nimewo 3 manm yo te okòmansman pou plis moun ta dwe jwenn estati imigrasyon. Men, konpare ak 150,000 premye manm ASAP (Pwojè ki an Defans pou Moun k ap Chèche Azil) yo, 550,000 pwochen manm ASAP yo te plis gen tandans ekri ke pwosesis azil la ta dwe aksesib, transparan, epi pi fasil pou moun k ap chèche azil yo jere poukont yo. Sa vin tounen priyorite nimewo 3 a kounye a, epi kòm rezilta, ASAP ogmante travay defans nou an konsènan aksesibilite ak transparans nan pwosesis azil la.