Randevou byometrik (biometrics appointment) pou anprent dwèt

Nan yon randevou byometrik (biometrics appointment), yo rele tou randevou pou pran anprent, Sèvis Sitwayènte ak Imigrasyon Etazini (USCIS) pral pran anprent ou, foto w, ak siyati w. Randevou byometrik yo se yon pati nòmal nan pwosesis azil la ak lòt pwosesis imigrasyon. Si ou vle kontinye ak dosye azil ou a, li enpòtan pou ou ale nan randevou byometrik ou a. Ou kapa b gade videyo sa a tou sou randevou byometrik pou moun k ap chèche azil.

Depi ane 2026, gen rapò ki fè konnen gen kèk arestasyon ki fèt nan randevou byometrik, sitou pou moun ki te resevwa lòd depòtasyon (removal order) nan tan pase, oswa ki gen dosye kriminèl anvan sa. Men, pifò moun ap toujou ale nan randevou byometrik yo san pwoblèm. Li plis enfòmasyon anba a, epi tanpri konnen sitiyasyon an ap chanje rapidman. Ou kapa b jwenn plis chanjman resan isit la.

• Kisa yon randevou byometrik ye?

• Kouman pou yo planifye yon randevou byometrik pou mwen?

• Ki lè randevou byometrik mwen an ye?

• Èske y ap mete m nan detansyon nan randevou byometrik mwen an?

• Kisa k ap rive si mwen pa ale nan randevou byometrik mwen an?

• Kisa mwen bezwen pote avè m nan randevou byometrik mwen an?

• Kisa pou m fè si mwen pa resevwa yon lèt randevou pou al fe byometrik (biometrics notice)?

• Èske mwen kapa b toujou aplike pou yon pemi travay menmsi mwen poko fè yon randevou byometrik?

• Kisa pou m fè si mwen pa kapa b ale nan randevou byometrik mwen an nan dat ki te planifye a?

• Kisa pou m fè si mwen te deja rate randevou byometrik mwen an?

• Kisa k ap rive nan dosye m nan si mwen rate randevou byometrik mwen an epi USCIS pa replanifye li?

• Kisa dokiman sa a mwen resevwa nan men gouvènman an ye?

• Gade lòt kesyon.

• Jwenn èd legal.

Kisa yon randevou byometrik ye?

Yon randevou byometrik (yo rele tou randevou pou pran anprent) se yon randevou avèk USCIS. Pandan randevou a, USCIS pran anprent ou, foto w, ak siyati w.

Si ou aplike pou azil oswa pou yon pemi travay, yo kapa b mande w pou ale nan yon randevou byometrik. Se yon pati nòmal nan pwosesis azil la ak lòt pwosesis imigrasyon. Enfòmasyon USCIS ap kolekte nan men w nan randevou byometrik ou a pral sèvi pou konfime idantite w, epi tou pou tcheke istwa imigrasyon w ak nenpòt istwa kriminèl ou ta genyen.

Si ou resevwa yon lèt randevou pou al fe byometrik epi ou vle kontinye ak dosye azil ou a, li trè enpòtan pou ou ale nan randevou byometrik ou a. Si ou pa ale nan randevou byometrik ou a, yo kapa b refize aplikasyon azil ou a. Sa kapa b lakòz tou reta oswa refi nan aplikasyon pemi travay ou a lè ou aplike pou pemi travay ou.

Gen kèk rapò ki fè konnen gen moun yo mete nan detansyon nan randevou byometrik, sitou pou moun ki te resevwa lòd depòtasyon nan tan pase. Men, pifò moun ap toujou ale nan randevou byometrik yo san pwoblèm. Li enfòmasyon sou risk detansyon. Ou kapa b li sou mezi sekirite isit la tou.

Si USCIS planifye yon randevou byometrik (biometrics appointment) pou ou, USCIS dwe voye yon lèt randevou pou al fe byometrik (biometrics notice) ba ou ki gen dat, lè, ak kote randevou a ap ye.

• Anjeneral, USCIS voye lèt randevou pou al fe byometrik la ba ou pa lapòs. Tcheke bwat lèt ou regilyèman epi kenbe adrès ou ajou.

• Si ou te depoze aplikasyon azil ou a sou entènèt ak USCIS, USCIS dwe mete lèt randevou pou al fe byometrik ou a sou kont USCIS (USCIS account) ou a sou entènèt. Tcheke kont USCIS ou a regilyèman.

Ou dwe pote lèt randevou pou al fe byometrik ou a nan randevou a. Pandan randevou a, yon ajan gouvènman an ap mete yon tenm sou lèt la kòm prèv ki montre ou te fè randevou byometrik ou a. Ou dwe kenbe lèt ki gen tenm nan yon kote ki an sekirite.

Li pi ba a pou w asire w ou te fè tout etap ki nesesè yo pou USCIS planifye randevou byometrik ou a. Ou kapa b gade videyo sa a tou sou randevou byometrik pou moun k ap chèche azil.

Kijan pou m fè jwenn yon randevou byometrik?

Fason yo planifye yon randevou byometrik pou ou depann de si w ap mande azil ak USCIS, si w ap mande azil nan tribinal imigrasyon, oswa si w ap mande yon pemi travay.

• Si w ap mande azil ak USCIS, ou pral soumèt yon aplikasyon azil (Fòm I-589) bay USCIS. Apre sa, USCIS dwe planifye yon randevou byometrik pou ou otomatikman epi voye yon lèt randevou pou al fe byometrik ba ou.

• Si w ap mande azil nan tribinal imigrasyon, ou pral soumèt yon aplikasyon azil (Fòm I-589) nan tribinal imigrasyon. Gouvènman an ka pa mande w pou w ale nan yon randevou byometrik. Nan anpil ka, gouvènman an deja gen anprent dwèt ou epi li pa bezwen pran yo ankò. Si gouvènman an bezwen pran anprent dwèt ou, USCIS dwe planifye yon randevou byometrik pou ou otomatikman epi voye yon lèt randevou pou al fe byometrik ba ou.
  
  Nòt: Depi mwa desanm 2024, moun k ap chèche azil nan tribinal imigrasyon yo pa oblije voye yon kopi Fòm I-589 bay USCIS ankò pou mande yon randevou byometrik.
  
  

• Si w ap mande yon pemi travay, gouvènman an ka voye yon lèt randevou pou al fe byometrik ba ou menmsi ou te deja ale nan yon randevou byometrik anvan pou azil. Gouvènman an ka refize pemi travay ou a si ou pa ale nan nouvo randevou byometrik sa a.

• E mari/madanm mwen ak pitit mwen yo? Si mari/madanm ou oswa pitit ou yo enkli nan dosye azil ou a, yo dwe resevwa lèt randevou tou si ou resevwa pa w. Si y ap mande pemi travay, yo dwe resevwa pwòp lèt randevou pa yo tou. Pafwa, yo pa planifye randevou byometrik pou timoun ki gen mwens pase 14 an. 

Si ou deplase, ou kapa b ajou adrès ou pou ou ka resevwa avi yo tankou lèt randevou pou al fe byometrik la. 

Si ou panse ou te dwe resevwa yon lèt randevou pou al fe byometrik, men ou pa t resevwa l, pou plis enfòmasyo sou sa ou kapa b fè apre sa, klike sou lyen sa.

Ki lè randevou byometrik mwen an ap ye?

Lè USCIS fin planifye yon randevou byometrik (biometrics appointment) pou ou, USCIS dwe voye yon lèt randevou pou al fe byometrik (biometrics notice) ba ou.

• Si ou te fè demann azil ou nan tribinal imigrasyon, oswa si ou te voye demann azil ou bay USCIS pa lapòs, USCIS dwe voye lèt randevou pou al fè byometrik la ba ou pa lapòs. Tcheke bwat lèt ou regilyèman epi toujou kenbe adrès ou ajou.

• Si ou te fè demann azil ou ak USCIS sou entènèt, USCIS dwe mete lèt randevou pou al fè byometrik ou a nan kont USCIS (USCIS account) ou sou entènèt. Li bon pou ou tcheke kont ou yon fwa pa senmenn. Pafwa USCIS pa voye notifikasyon lè yo mete yon lèt randevou nan yon kont USCIS sou entènèt.

Lèt randevou pou al fè byometrik ou a ap di ou dat, lè, ak kote randevou a ap ye. Ou dwe pote lèt randevou pou al fè byometrik la epi planifye pou ou rive 15 minit anvan lè randevou ou a.

Èske y ap arete m pou mete m nan detansyon nan randevou byometrik mwen an? 

Petèt. Depi nan ane 2026, gen rapò ki fè konnen yo arete kèk moun nan randevou byometrik, sitou moun ki te resevwa lòd depòtasyon (removal order) nan tan pase, oswa ki gen dosye kriminèl. Men, pifò moun toujou ale nan randevou byometrik yo san pwoblèm. 

Pou tcheke si ou te resevwa yon lòd depòtasyon, ou kapab antre nimewo alyen (A number) ou ak peyi kote ou soti a sou paj entènèt sa a. Si li di yon jij te bay lòd pou “ordered removal” ak yon dat, sa vle di ou gen yon lòd depòtasyon. Ou kapab tcheke tou nan telefòn: rele 1-800-898-7180, peze opsyon 1 pou Angle epi antre nimewo alyen ou an. Peze 1 pou konfime nimewo alyen ou an, peze 1 pou konfime non ou, epi apre sa peze 3 pou tcheke estati dosye ou. Si li di yon jij te bay lòd pou “ordered removal” ak yon dat, sa vle di ou gen yon lòd depòtasyon.

Men kèk lòt gwoup moun ki kapab plis nan risk pou yo arete yo pou mete yo nan detansyon nan yon randevou byometrik: 

• Imigran ki genyen sispansyon depòtasyon (withholding of removal) oswa Pwoteksyon anba Konvansyon Kont Torti (CAT). 

• Imigran ki gen dosye kriminèl. 

• Imigran yo akize kòmkwa yo te prezante fo enfòmasyon oswa fo dokiman. 

Si ou enkyete w, pale ak yon avoka anvan ou ale nan randevou byometrik ou a. Jwenn èd legal isit la. 

Ou kapab aprann plis tou sou detansyon imigrasyon.

Kisa k ap rive si mwen pa ale nan randevou byometrik mwen an? 

Si ou rate randevou byometrik ou a, yo kapab rejte aplikasyon azil ou a. Rate randevou ou a kapab lakòz tou reta oswa rejè nan aplikasyon pemi travay ou a. Si dosye azil ou a nan USCIS, gouvènman an kapab voye dosye ou a nan tribinal imigrasyon tou.

Si ou pa kapab ale nan randevou byometrik ou a, ou kapab chanje dat randevou ou a. Si ou te deja rate randevou byometrik ou a, aprann sou opsyon ou genyen yo.

Kisa mwen dwe pote avè m nan randevou byometrik mwen an?

Lè ou ale nan randevou w la, ou ta dwe pote lèt randevou pou al fe byometrik (biometrics notice) ou a avèk ou. Pandan randevou a, yon ofisye gouvènman pral mete yon tenm sou lèt la kòm prèv ke ou te fè randevou byometrik ou a. Ou ta dwe kenbe lèt ki gen tenm nan yon kote ki an sekirite.

Ou bezwen tou yon dokiman idantite, tankou paspò ou, pou randevou byometrik la. Si ou pa gen yon pyès idantite valid gouvènman bay, ou kapab eseye pote plis nan dokiman sa yo ou genyen:

• Akt de nesans

• Kat idantite lekòl

• Pyès idantite ki ekspire

• Yon kopi oswa yon foto yon pyès idantite

• Yon dokiman imigrasyon, sitou youn ki gen foto w sou li, tankou rejis Randevou pou prezante nan yon biwo ICE (ICE check-in) sa a.

Ou kapab gade videyo sa a sou randevou byometrik pou moun k ap chèche azil.

Kisa mwen ta dwe fè si mwen pa resevwa yon lèt randevou pou al fè byometrik?

Si ou pa resevwa yon biometrics notice, pwochen etap ou yo depann de si w ap aplike pou azil nan USCIS oswa nan tribinal imigrasyon. Menm si ou poko fè yon randevou byometrik, ou kapab toujou aplike pou yon pemi travay.

Si w ap aplike nan USCIS: 

1. Tcheke dokiman w yo pou w wè si w te resevwa yon lèt USCIS voye ba ou pou fè w konnen yo te resevwa aplikasyon w lan (receipt notice) pou soumèt aplikasyon azil ou a (Fòm I-589). Malerezman, kounye a li nòmal pou w oblije tann yon bon bout tan anvan USCIS voye yon receipt notice ba ou.

2. Si ou pa resevwa yon receipt notice apre twa mwa, ou kapab rele Sant Sèvis USCIS (Contact Center) nan 1-800-375-5283. Lè yo mande w pou w eksplike pou kisa w ap rele, ou kapab di “InfoPass” pou w ka pale ak yon reprezantan. Apre sa, ou kapab eksplike ke ou te soumèt aplikasyon azil ou a sa gen twa mwa men ou pa resevwa yon receipt notice. Asire w ou gen nimewo alyen (A number) ou pare (si w gen youn), ansanm ak nenpòt enfòmasyon sou kote w te voye l pa lapòs, tankou dat ou te poste dokiman w yo ak nimewo swivi (tracking number) lapòs la.

3. Si ou te resevwa yon receipt notice, sèvi ak nimewo resi a pou tcheke estati dosye w sou paj entènèt an USCIS sa a. Si w aprann ke USCIS te voye yon biometrics notice ba ou men ou pa t resevwa l nan lapòs, ou kapab rele Contact Center USCIS la nan 1-800-375-5283. Si w aprann ke w te rate randevou byometrik ou deja, ou kapab rele epi eksplike ke w pa t resevwa lèt la epi mande pou yo replanifye randevou a.

4. Si USCIS poko voye yon biometrics notice ba ou, ou kapab kontinye tcheke estati dosye w chak semèn. Li nòmal pou w oblije tann yon ti tan anvan yo planifye yon randevou byometrik pou ou. Tcheke lapòs ou ak kont USCIS (USCIS account) sou entènèt ou (si w te aplike pou azil sou entènèt) epi toujou mete adrès ou ajou.

Si w ap aplike nan tribinal imigrasyon: 

Pifò moun k ap chèche azil nan tribinal imigrasyon pa oblije ale nan yon randevou byometrik. Sa se paske, nan pifò ka, gouvènman an gen anprent dwèt ou deja epi li pa bezwen pran yo ankò.

Men, si yon jij imigrasyon te di w ke w bezwen yon randevou byometrik epi ou pa resevwa yon biometrics notice, ou kapab swiv etap sa yo anba a: 

1. Tcheke si sa fè plis pase 3 mwa depi ou te soumèt aplikasyon azil ou a (Fòm I-589) OSWA si ou gen mwens pase 6 mwa ki rete anvan randevou devan jij (individual or merits hearing) ou a. Si repons lan se non, kontinye tann epi tcheke bwat lèt ou pou w wè si ou resevwa yon lèt randevou pou al fe byometrik (biometrics notice). 

2. Si repons lan se wi, ou kapa b rele Sant Sèvis USCIS (Contact Center) nan 800-375-5283. Lè yo mande w pou w esplike poukisa w ap rele, ou kapa b di “InfoPass” pou w ka pale ak yon reprezantan. Apre sa, ou kapa b esplike w ap aplike pou azil nan tribinal imigrasyon epi jij la te di w ou bezwen yon randevou byometrik (biometrics appointment), men ou pa t janm resevwa yon lèt randevou pou al fe byometrik. Gen yon kopi aplikasyon azil ou a (Fòm I-589) bò kote w si reprezantan an ta bezwen plis enfòmasyon sou dosye w la.   

Èske mwen kapa b toujou aplike pou yon pemi travay menmsi mwen poko fè randevou byometrik mwen an?

Wi, ou kapa b toujou aplike pou yon pemi travay! Moun k ap chèche azil yo ka jeneralman aplike pou yon pemi travay 150 jou apre yo fin soumèt yon aplikasyon azil. Si 150 jou fin pase deja men ou poko fè randevou byometrik ou a, ou kapa b toujou soumèt yon aplikasyon pou pemi travay. Men, yo ka ba w yon randevou byometrik pita anvan gouvènman an apwouve pemi travay ou a. Ou kapa b jwenn plis enfòmasyon sou fason pou w aplike pou premye pemi travay ou kòm yon moun k ap chèche azil isit la.

Kisa pou m fè si m pa kapa b ale nan randevou byometrik mwen an nan dat ki te prevwa a?

Ou kapa b mande pou yo chanje dat randevou byometrik ou a anvan dat ki te prevwa a, men li posib pou USCIS pa aksepte demann ou an. Si USCIS pa aksepte demann ou an, ou t ap bezwen ale nan randevou byometrik ki te prevwa a si ou vle kontinye ak aplikasyon azil ak pemi travay ou yo. 

Menmsi USCIS dakò pou l chanje dat randevou byometrik ou a, chanje dat randevou byometrik la kapa b tou retade aplikasyon pou premye pemi travay ou a. Si ou rate randevou byometrik ou a epi USCIS pa chanje dat la, yo kapa b refize aplikasyon azil ou a oswa aplikasyon pemi travay ou a. 

Depi ane 2026, gen rapò ki fè konnen yo arete kèk moun nan randevou byometrik, sitou moun ki te resevwa lòd depòtasyon (removal order) nan tan pase. Men, pifò moun toujou ale nan randevou byometrik yo san pwoblèm. Pou plis enfòmasyon, klike sou lyen sa. 

Kijan pou w mande pou yo chanje dat randevou byometrik ou a: 

Si ou deside eseye chanje dat randevou byometrik ou a, ou kapa b fè demann lan nan telefòn oswa sou Entènèt. Li pi bon pou w fè demann pou chanje dat randevou byometrik ou a pi vit posib anvan dat randevou w la. 

Opsyon 1: Telefòn

• Rele USCIS nan 1-800-375-5283.

• Lè sistèm òdinatè a mande w pou w esplike poukisa w ap rele, ou kapa b di “Reschedule biometrics appointment.” Apre sa, ou ta dwe kapa b pale ak yon reprezantan USCIS pou w chanje dat randevou w la. Pare pou w esplike rezon presi ki fè w dwe chanje dat randevou w la epi ki fè w pa kapa b ale. Si USCIS panse rezon w lan pa sifizan, yo kapa b refize chanje dat randevou w la. 

• Apre apèl la, si USCIS apwouve demann ou an, ou ta dwe resevwa yon nouvo lèt randevou pou al fe byometrik nan lapòs. Pote nouvo lèt la avèk ou nan randevou a.

Opsyon 2: Sou Entènèt

• Kreye oswa konekte nan kont USCIS (USCIS account) an liy ou an. Ou kapab gade videyo USCIS sa a sou fason pou kreye yon kont an liy.

• Apre ou fin konekte, si yo mande w pou chwazi ant plizyè opsyon paj entènèt an, ou kapab chwazi “myUSCIS” pou rive nan kont an liy ou an.

• Yon fwa ou nan paj kont myUSCIS ou a, ou kapab kòmanse demann ou an pou yon nouvo randevou byometrik (biometrics appointment). Si w ap itilize yon telefòn, klike sou “Menu” nan kwen anwo adwat la, klike sou “Account actions,” epi klike sou “Reschedule Biometrics.” Si w sou yon òdinatè, klike sou “My Account” nan kwen anwo adwat la, epi klike sou “Reschedule Biometrics.”

• Swiv enstriksyon yo pou mande yon nouvo randevou byometrik. Chwazi rezon presi ki fè w pa kapab ale nan randevou w la, oswa chwazi “Other” epi ekri rezon detaye yo. Si USCIS kwè rezon w lan pa sifizan, yo kapab refize chanje dat randevou w la. 

• Si USCIS apwouve demann ou an pou chanje dat la, ou ta dwe resevwa yon nouvo lèt randevou pou al fe byometrik (biometrics notice) nan kont an liy ou an. Enprime epi pote nouvo lèt la nan randevou w la.

• Remak: Ou pa kapab itilize opsyon an liy lan si randevou w la se nan mwens pase 12 èdtan oswa si w te deja chanje dat randevou w la de fwa. Rele USCIS nan 1-800-375-5283 pito.

Si w te deja rate randevou byometrik ou a, li enfòmasyon sou pwochen etap yo isit la.

Kisa mwen dwe fè si mwen te deja rate randevou byometrik mwen an?

Si w te deja rate randevou byometrik ou a, li enpòtan pou w fè demann ou pou chanje dat la kou sa posib si w vle kontinye ak dosye w la. Swiv etap ki anba yo pou mande chanje dat randevou byometrik ou a. 

Si w te aplike pou azil nan USCIS: USCIS di ou dwe soumèt yon demann pou chanje dat randevou byometrik ou a nan yon delè 10 jou, epi montre yon rezon “eksepsyonèl” ki fè w te rate randevou a. 

Swiv etap sa yo pou mande chanje dat randevou byometrik ou a: 

1. Rele USCIS nan 1-800-375-5283.

2. Lè sistèm òdinatè a mande w pou esplike pou kisa w ap rele, ou kapab di “Reschedule biometrics appointment.” Apre sa, ou ta dwe kapab pale ak yon reprezantan USCIS pou chanje dat randevou w la. Pare pou w bay rezon presi ki fè w dwe chanje dat randevou w la epi ou pa kapab ale. Si USCIS kwè rezon w lan pa sifizan, yo kapab refize chanje dat randevou w la. 

3. Apre apèl la, si USCIS apwouve demann ou an, ou ta dwe resevwa yon nouvo lèt randevou pou al fe byometrik nan lapòs. Pote nouvo lèt la nan randevou w la. Si USCIS rejte demann ou an, aprann plis sou konsekans posib yo. 

Anplis rele USCIS, ou kapab eseye ale tou nan biwo USCIS ki make sou lèt randevou pou al fe byometrik ou a. Ale ak lèt la. Ou kapab esplike ofisye yo sitiyasyon w epi mande yo pou yo pran anprent ak foto w nan moman sa a. Gen kèk biwo USCIS ki kapab pèmèt sa. Li enpòtan tou pou w pare pou w esplike espesyalman pou kisa w te rate randevou w la. Si w kapab, pote dokiman pou montre rezon ki fè w te rate randevou a.  

Si w rate randevou byometrik ou a, epi USCIS pa chanje dat la, sa pral pwobableman gen konsekans negatif pou dosye w la. Pou plis enfòmasyo, klike sou lyen sa.

Sa kapab itil tou pou w chèche asistans legal pou w konprann opsyon w yo.

Kisa k pral rive nan dosye m nan si m rate randevou byometrik (biometrics appointment) mwen an epi USCIS pa chanje dat la pou mwen?

Sa k pral rive apre a depann de ki kalite dosye randevou byometrik la te ye: yon aplikasyon pou pemi travay, yon dosye azil nan tribinal imigrasyon, oswa yon dosye azil ak USCIS.

Aplikasyon pou pemi travay:

USCIS kapa b refize aplikasyon pou pemi travay ou a, epi ou kapa b bezwen soumèt yon nouvo aplikasyon epi peye frè a ankò. Ou kapa b tcheke estati aplikasyon pemi travay ou a lè w sèvi ak zouti USCIS sa a pou tcheke estati dosye.

Dosye azil nan tribinal imigrasyon: 

Jij imigrasyon an kapa b deside refize dosye azil ou a. Rele liy dirèk tribinal imigrasyon an nan 1-800-898-7180 epi ale sou sit entènèt tribinal sa a pou tcheke estati dosye w la

Dosye azil ak USCIS: 

Sa k pral rive apre nan dosye azil ou a depann de estati imigrasyon w. 

• Si ou pa gen lòt estati imigrasyon (tankou Estati Pwoteksyon Tanporè (TPS) oswa yon viza valab ki poko ekspire), USCIS pral pwobableman kòmanse yon dosye nan tribinal imigrasyon kont ou.

• Si ou gen pawol (“parole”), USCIS kapa b deside mete fen nan pawol ou a epi kòmanse yon dosye nan tribinal imigrasyon kont ou. 

• Si ou gen yon lòt estati imigrasyon, USCIS pral anile (dismiss) dosye azil ou a.

Ou kapa b tcheke estati dosye azil ou a lè w sèvi ak zouti USCIS sa a pou tcheke estati dosye. 

Anplis de sa, si sa fè mwens pase 180 jou depi ou te aplike pou azil, lefètke ou rate randevou byometrik ou a kapa b tou reta premye aplikasyon pou pemi travay ou a.