Swen Sante pou Moun k ap Chèche Azil

Swen sante Ozetazini kapab koute chè anpil. Pou ede peye depans medikal yo, anpil moun Ozetazini pran asirans sante. Kalite asirans sante ou kapab jwenn nan depann de estati imigrasyon w ak eta kote w ap viv la.

Kontinye li oswa klike sou lyen ki anba yo pou w aprann sou:

• Kijan pou w jwenn swen medikal si w pa gen asirans sante

• Asirans sante yon anplwayè bay

• Asirans sante gouvènman an bay, atravè pwogram tankou Medicaid, Medicare, Pwogram Asirans Sante pou Timoun (CHIP), ak pwogram eta yo bay

• Asirans sante ki soti nan yon "echanj" oswa "mache" swen sante, ki se sit entènèt kote moun kapab achte asirans sante epi pafwa resevwa asistans finansye nan men gouvènman an

Kisa pou m fè si m bezwen swen medikal men m pa gen asirans sante?

Pou swen medikal ijan, ou kapab toujou ale nan sal ijans yon lopital, menmsi w pa gen asirans. Gen anpil chans pou yo mande w peye apre vizit ou nan lopital la. Men, nan kèk lopital, ou ka kapab mande pou "swen charite" (charity care) epi jwenn swen medikal gratis oswa a yon pri ki pi ba. Si w ap akouche yon bebe oswa si w gen yon ijans medikal grav, ou ka kapab aplike tou pou Medicaid Ijans (Emergency Medicaid) nan lopital la. Ou kapab pale ak yon travayè sosyal oswa yon anplwaye lopital pou w wè si w ka kalifye pou swen charite oswa Medicaid Ijans.

Epitou, gen kèk klinik medikal ki ofri swen gratis oswa a yon pri ki ba pou moun ki pa gen asirans, san wete imigran yo. Men kèk resous pou w chèche opsyon nan zòn kote w ye a:

• Vizite Anyè Klinik Gratis sa a epi antre kòd postal ou (zip code), oswa vil ak eta kote w ap viv la, pou w jwenn klinik medikal gratis ak sa ki koute mwens chè nan zòn ou an.

• Ou kapab rele 211 nan anpil kote Ozetazini pou w jwenn èd pou w jwenn sant swen sante lokal ak lòt sèvis.

• Resous sa a ki soti nan United We Dream genyen lyen tou pou klinik gratis ak sa ki koute mwens chè nan diferan eta. Tanpri pran nòt resous sa a te fèt an 2020, donk kèk nan enfòmasyon yo ka pa ajou ankò.

• Pou resous sou sèvis sante mantal, ou kapab vizite paj entènèt sa a.

• Ou kapab tou eseye chèche òganizasyon kominotè nan zòn ou an pou w mande èd.

Èske moun k ap chèche azil yo kapab jwenn asirans sante nan men yon anplwayè?

Wi – an jeneral, si anplwayè w la ofri anplwaye li yo asirans sante, ou kapab chwazi jwenn asirans sante nan fason sa a. Gen kèk anplwayè ki ofri anplwaye yo asirans sante, epi gen lòt ki pa fè sa.

Èske moun k ap chèche azil yo kapab jwenn asirans sante gouvènman an tankou Medicaid oswa CHIP?

Petèt. Kounye a, gen kèk moun k ap chèche azil ki kapab kalifye pou kalite asirans sante gouvènman an espesifik. Sa depann de konbyen lajan ou touche, kote w ap viv, ki laj ou genyen, epi si ou ansent. Chak eta Ozetazini gen règ diferan.

Moun ki ansent ak timoun

Nan kèk eta Ozetazini, moun ki ansent ak timoun k ap chèche azil kapab aplike pou asirans sante gouvènman an atravè pwogram gouvènman an. Pou w kalifye, ou dwe montre lajan ou touche a pi ba pase yon sèten kantite.

Anba la a gen enfòmasyon sou ki eta Ozetazini ki ofri asirans sante gouvènman an bay moun k ap chèche azil ki ansent ak timoun, depi mas 2026. Pou plis detay ak enfòmasyon ki ajou, ou kapab gade paj entènèt an sa a ak kat sa yo.

• Eta ki gen asirans sante gouvènman an pou tout moun ki ansent, kèlkeswa estati imigrasyon yo:

  • Alabama, Arkansas, Kalifòni, Kolorado, Konektikòt, Ilinwa, Lwizyann, Mèn, Merilann, Masachousèt, Michigann, Minesota, Misouri, Nebraska, New Jersey, New York, Oklahoma, Oregon, Rhode Island, Dakota di Sid, Tenèsi, Teksas, Vèmon, Vijini, Washington, Washington D.C., ak Wisconsin

• Eta ki gen asirans sante gouvènman an pou moun ki ansent ki kalifye kòm moun ki “rete legalman,” sa gen ladan l moun ki gen yon pemi travay baze sou demann azil yo:

  • Delaware, Jòji, Awayi, Indiana, Kentucky, Nevada, New Hampshire, New Mexico, Kawolin di Nò, Dakota di Nò, Ohio, Pennsilvani, Kawolin di Sid, West Virginia, ak Wyoming

• Eta ki gen asirans sante gouvènman an pou tout timoun, kèlkeswa estati imigrasyon yo:

  • Kalifòni, Kolorado, Konektikòt (ki gen mwens pase 15 an), Ilinwa, Mèn, Masachousèt, Minesota, New Jersey, New York, Oregon, Rhode Island, Utah, Vèmon, Washington, ak Washington D.C.

• Eta ki gen asirans sante gouvènman an pou timoun ki kalifye kòm moun ki “rete legalman,” sa gen ladan l timoun ki gen yon pemi travay baze sou demann azil yo, oswa timoun ki gen mwens pase 14 an ki te aplike pou azil depi omwen 180 jou:

  • Arkansas, Delaware, Florid, Jòji, Awayi, Indiana, Iowa, Kentucky, Lwizyann, Merilann, Michigann, Montana, Nebraska, Nevada, New Hampshire, New Mexico, Kawolin di Nò, Dakota di Nò, Ohio, Pennsilvani, Kawolin di Sid, Teksas, Vijini, West Virginia, ak Wisconsin

Tanpri pran nòt: si pitit ou a te fèt Ozetazini, li se yon sitwayen ameriken epi li elijib pou asirans sante gouvènman an nan chak eta. Timoun ki sitwayen ameriken elijib pou asirans sante gouvènman an kèlkeswa estati imigrasyon paran yo.

Moun k ap chèche azil ki gen 65 an oswa plis

Moun k ap chèche azil ki gen 65 an oswa plis ki gen pemi travay epi ki t ap travay Ozetazini pandan 10 ane oswa plis te konn kalifye pou asirans sante gouvènman an pou granmoun aje yo rele Medicare. Men, yon lwa ki te pase an jiyè 2025 te limite elijibilite pou Medicare. Pifò moun k ap chèche azil pa elijib ankò pou yo aplike pou premye fwa. Si ou se yon moun k ap chèche azil epi ou gen Medicare kounye a, pwoteksyon ou an ap gen anpil chans fini pa pita pase 4 janvye 2027.

Men, menm avèk nouvo lwa ki te pase nan mwa jiyè 2025 lan, gen kèk eksepsyon. Illinois ak New York gen opsyon swen sante pou moun ki gen plis pase 65 an, kèlkeswa estati imigrasyon yo. 

Lòt gwoup moun k ap chèche azil

Kèk eta kapa b ofri asistans swen sante bay lòt moun k ap chèche azil ak imigran.

Si ou gen kesyon sou si ou kapa b elijib pou benefis sante gouvènman an nan eta kote ou ye a, ou kapa b eseye chèche òganizasyon kominotè nan zòn ou an pou mande plis enfòmasyon.

Pataje enfòmasyon ak ajans imigrasyon yo

Si ou aplike pou asirans sante gouvènman an, enfòmasyon pèsonèl ou yo kapa b pataje ak ajans imigrasyon yo, sa depann de kote finansman an soti. Men, tanpri pran nòt ke ajans imigrasyon yo kapa b deja gen enfòmasyon ou yo, pa egzanp, si ou gen yon dosye k ap tann nan tribinal imigrasyon oswa nan USCIS. 

Pou pwogram asirans sante gouvènman federal la finanse, tankou CHIP oswa Medicaid, enfòmasyon ou yo kapa b pataje ak ajans imigrasyon yo. Pou pwogram asirans sante se eta ou a sèlman ki finanse yo, pifò eta yo p ap pataje enfòmasyon ou yo, atout gen kèk eksepsyon. Ou kapa b jwenn plis detay isit la.

Èske moun k ap chèche azil kapa b achte asirans sante atravè yon bous asirans nasyonal oswa nan yon eta (yo rele tou yon “marketplace”)?

Nan mwa jiyè 2025, yo te pase yon lwa ki pral anpeche moun k ap chèche azil achte asirans sante atravè yon bous asirans nasyonal – kòmanse nan dat 1ye janvye 2027. Anvan 1ye janvye 2027, si ou se yon moun k ap chèche azil ki gen yon pemi travay ki valid, ou ta dwe kapa b achte asirans sante sou yon bous asirans nasyonal oswa yon bous asirans yon eta jere. Si ou gen yon lòt estati imigrasyon, ou kapa b tcheke paj entènèt an gouvènman sa a.

Gen kèk eta tou ki gen pwòp bous asirans pa yo imigran kapa b itilize, kèlkeswa estati imigrasyon yo:

• Depi ane 2023, ou kapa b achte asirans sante sou bous asirans eta Colorado a epi aplike pou sipò finansye kèlkeswa estati imigrasyon ou.

• Depi ane 2024, rezidan nan eta Washington kapa b itilize bous asirans eta a tou kèlkeswa estati imigrasyon yo.

Vizite sit entènèt sa yo pou plis enfòmasyon: 

• Echanj nasyonal healthcare.gov

• Echanj asirans sante nan nivo eta: Kalifòni, Kolorado, Konèktikòt, Idaho, Kentucky, Maine, Maryland, Masachousèt, Minesota, Nevada, New Jersey, Nouvèl Meksik, New York, Pènsilvani, Rhode Island, Vèmon, Vijini, Washington, D.C. epi eta Washington.

• Jwenn enfòmasyon sou lwa Jiyè 2025 la sou paj entènèt an sa a.

Lòt Sijè

Klike sou lyen ki anba yo pou w ka aprann plis sou:

• Lisans Chofè

• Lekòl

• Asistans Manje

• Lòt Benefis Gouvènman an