Ekri pa avoka imigrasyon ekspè ASAP yo · Mizajou nan dat
Sa a se yon avi gouvènman an te voye bay kèk moun ki gen pawol (“parole”) CBP One pou yo eseye fini otorizasyon yo a pi bonè. Sitiyasyon sa a ap chanje rapidman.
Kouman pou mwen konnen si Parole CBP One mwen an toujou valab?
Parole CBP One pifò moun pa valab ankò. Men kijan pou w tcheke:
Si ou te resevwa yon lèt anilasyon nan mwa mas 2026 oswa apre: Parole ou a fini nan dat ki make nan lèt la. Nenpòt otorizasyon travay ou te genyen ki baze sou parole CBP One ou a ap fini tou. Si ou pa gen yon lòt aplikasyon imigrasyon ki ankou oswa yon lòt estati ki valab, yo kapa b mete ou nan pwosesis depòtasyon.
Si ou te resevwa yon lèt anilasyon an 2025: Parole ou a ta kapa b toujou valab pou kounye a— sof si dat ekspirasyon ki sou dokiman parole orijinal ou a te deja pase. Men, gouvènman an ap voye nouvo lèt anilasyon, donk ou kapa b resevwa yon lòt talè konsa. Tcheke bwat lèt ou, ak kont USCIS ou a si ou genyen youn. Ou kapa b chèche tou fòm I-94 elektwonik ou ki ajou sou paj entènèt gouvènman sa a lè w sèvi ak enfòmasyon paspò ou oswa nimewo alyen (A number) ou pou “Document Number”.
Sa k te pase?
An 2025, gouvènman an te eseye anile parole CBP One pi bonè. Imigran yo te konteste sa nan tribinal, epi nan mwa mas 2026, yon jij te di fason gouvènman an te eseye fini Parole CBP One nan pi bonè a te ilegal.
Men, kòmanse nan mwa mas 2026, gouvènman an ap voye nouvo lèt anilasyon, sa vle di pifò moun ki te resevwa parole CBP One pwobableman pa gen yon estati parole ki valab nan moman sa a. Si ou resevwa yon nouvo lèt, parole ou a fini nan dat ki make nan lèt sa a.
E si mwen gen yon lòt aplikasyon imigrasyon ki ankou anplis parole a?
Si ou deja gen yon lòt aplikasyon imigrasyon ki ankou tankou azil, aplikasyon sa a rete valab epi ou kapa b kontinye avè l, menm si yo anile parole ou a. Ou pa oblije kite Etazini si ou te deja aplike pou azil epi aplikasyon w lan toujou ankou. Ou pa oblije kite Etazini tou si ou gen yon lòt estati tankou Estati Pwoteksyon Tanporè (TPS).
Si ou gen yon pemi travay ki pa baze sou parole, pemi travay sa a rete valab tou.
Si ou gen yon dosye nan tribinal imigrasyon, dosye w la toujou aktif jiskaske jij la pran yon desizyon. Ou pa oblije kite Etazini jiskaske jij la pran yon desizyon.
E si mwen pa gen yon lòt aplikasyon imigrasyon ki annatant deja?
Ou kapa b anvizaje aplike kounye a, si ou elijib. Gen kèk moun ki gen pawol (“parole”) ki ta kapa b elijib pou azil oswa lòt opsyon. Men, soumèt yon nouvo aplikasyon imigrasyon kapa b yon desizyon konplike ki depann de sikonstans espesifik ou yo. Chak fwa ou ranpli yon nouvo aplikasyon, ou bay gouvènman an enfòmasyon ajou yo kapa b pa t genyen deja.
Si ou vle pale ak yon avoka sou opsyon ou yo, ou kapa b jwenn èd legal. Ou kapa b li plis tou sou fason lwa yo ap chanje ak mezi sekirite yo.
E si pawol mwen an pa t fèt pa mwayen CBP One?
Ou kapa b li sou fason lwa yo ap chanje, sa gen ladan l enfòmasyon sou sa k ap pase ak pawol la.
ASAP (Pwojè ki an Defans pou Moun k ap Chèche Azil) gen pou objektif pou bay enfòmasyon reyèl sou lwa imigrasyon aktyèl yo. Enfòmasyon sa a se pa konsèy legal.
Tout kontni legal se ekip avoka ekspè nan imigrasyon ASAP la ki ekri epi revize yo legalman. Avoka ekspè ASAP yo gen plizyè dizèn ane eksperyans nan lwa imigrasyon ak litij. Kolektifman, yo genyen plizyè santèn ka. Avoka nou yo admèt nan Bawo nan plizyè eta Ozetazini, yo gen diplòm lalwa nan inivèsite tankou Harvard, Yale, ak UCLA, epi yo genyen plizyè prim pou travay legal yo.