Ekri pa avoka imigrasyon ekspè ASAP yo · Mizajou nan dat
Piblikasyon sa a se pou moun k ap chèche azil Ozetazini ki gen kè sote konsènan avoka imigrasyon yo. Si ou pa satisfè ak avoka ou a, ou kapab aprann sou etap ou ka pran yo anba a.
1. Ou kapab mande yon dezyèm opinyon.
Ou kapab mande yon lòt avoka opinyon li. Ou kapab chèche asistans legal isit la, sa gen ladan l èd legal gratis ak sa ki pa koute chè, ansanm ak avoka prive ki mande frè.
Si yon avoka di li pa kapab ede w, ou kapab mande l si li gen rekòmandasyon pou lòt avoka serye nan zòn kote w ye a. Gen kèk biwo ki pran sèlman sèten kalite ka, donk sa kapab itil pou w rele plizyè biwo.
Ou kapab tou jwenn enfòmasyon sou pwosesis azil la isit la.
2. Ou kapab pran dokiman w yo nan men avoka w la.
Ou gen dwa pou w gen yon kopi nenpòt kontra ekri pou sèvis avoka a.
Ou gen dwa pou w gen yon kopi konplè tout dokiman ki nan dosye w la, eksepte nòt pèsonèl avoka a. Avoka a kapab mande yon frè rezonab pou l ba w kopi sa a, men li pa kapab refize ba ou li.
Ou gen dwa pou w gen tout dokiman orijinal ou yo, tankou paspò oswa batistè.
Ou gen dwa tou pou enfòmasyon w rete konfidansyèl. Avoka w la pa kapab pataje dokiman w yo oswa enfòmasyon ou ba li ak gouvènman an oswa ak lòt moun san pèmisyon w.
3. Ou kapab mande avoka w la enfòmasyon sou dosye w la, pou ede w pran desizyon.
Ou gen dwa pou avoka w la kominike avèk ou. Si w poze kesyon, li dwe ba w enfòmasyon sou dosye w la nan yon tan ki rezonab.
Si pèsonn pa reponn lè w rele nan biwo avoka w la, ou kapab kite yon mesaj vokal ak non w ak nimewo telefòn ou. Epi ou kapab kontinye eseye! Ou kapab eseye ale nan biwo avoka w la tou an pèsòn pandan lè travay.
Ou gen dwa pou w pran tout desizyon enpòtan nan dosye w la. Avoka w la ta dwe konseye w sou sa li panse ki pi bon ak poukisa. Men, ou gen dwa pou w pran desizyon final yo.
4. Si w deside ou pa vle kontinye travay ak avoka w la, ou kapab revoke li.
Si w deside ou pa vle kontinye travay ak avoka w genyen kounye a, ou gen dwa pou w revoke li.
Si avoka a pa t fè tout travay ou te peye l pou l fè a, lalwa kapab egzije l pou l rann ou lajan w. Si w gen yon kontra ekri, ou kapab revize l epi konpare sa yo te pwomèt ou ak sa yo te fè tout bon vre.
5. Si w te gen yon pwoblèm grav ak avoka w la, ou kapab depoze yon plent.
Pou w chèche konnen ki jan pou w depoze yon plent kont yon avoka nan eta kote w ye a, ale sou Google epi tape “lawyer complaint in [eta w la]”.
Si w te viktim yon magouy oswa yon fwod nan zafè imigrasyon, aprann sou etap pou w pran apre sa yo.
ASAP (Pwojè ki an Defans pou Moun k ap Chèche Azil) gen pou objektif pou bay enfòmasyon ki baze sou reyalite konsènan lwa imigrasyon aktyèl yo. Enfòmasyon sa yo pa konsèy legal.
Tout kontni legal se ekip avoka imigrasyon ekspè ASAP yo ki ekri l epi ki revize l nan nivo legal. Avoka ekspè ASAP yo gen plizyè dizèn ane eksperyans nan lwa imigrasyon ak nan pwosè nan tribinal. Ansanm, yo genyen plizyè santèn ka. Avoka nou yo admèt nan Bawo nan plizyè eta Ozetazini, yo gen diplòm nan dwa nan inivèsite tankou Harvard, Yale, ak UCLA, epi yo genyen plizyè pri pou travay legal yo fè.