Se avoka imigrasyon ekspè ASAP yo ki ekri sa · Mizajou nan dat
Èske se pa kote w ap viv la? Chèche yon lòt eta.
Men kèk enfòmasyon enpòtan:
Malerezman, yon pemi travay ki valid sèlman pa sifi pou yon moun k ap chèche azil jwenn oswa renouvle yon lisans chofè nan Tennessee. Li plis enfòmasyon sou kondisyon yo anba a.
Si ou gen yon lòt kalite estati imigrasyon, ou ka elijib pou yon lisans chofè nan Tennessee. Pou plis enfòmasyon sou règleman yo, klike sou lyen sa pou paj entènèt Tennessee a, oswa chèche yon òganizasyon lokal pou mande èd.
Si ou pa gen okenn kalite estati imigrasyon, malerezman ou pa elijib pou yon lisans chofè nan Tennessee.
Nan pifò eta yo, pou w resevwa yon lisans chofè, ou bezwen: pase yon egzamen ekri, pase yon egzamen kondwi, pase yon egzamen vizyon, peye yon frè, epi pote dokiman pou montre ou elijib.
Lisans chofè pou moun k ap chèche azil
Malerezman, menmsi ou gen yon dosye azil k ap tann yon desizyon epi ou gen yon pemi travay ki valid, sa pa sifi pou w resevwa yon lisans chofè nan Tennessee. Akòz chanjman nan lwa Tennessee yo nan ane 2026, si ou pa yon sitwayen Ameriken oswa yon rezidan pèmanan (lawful permanent resident) (kat rezidan pèmanan), w ap bezwen montre:
Yon paspò ki “valid”
Yon Fòm I-94 ki “valid”, fòm yon moun resevwa lè Lèzetazini pèmèt li antre nan peyi a, tankou avèk yon viza oswa yon pawòl (“parole”)
Yon kat nimewo social security (SSN)
2 dokiman pou montre adrès lakay ou nan Tennessee
Biwo DMV a ap pwobableman di “valid” vle di paspò a ak I-94 la pa dwe ekspire.
Pou plis enfòmasyon sou kondisyon yo ak frè yo, klike sou lyen sa pou Tennessee.
Èske mwen ta dwe pote lòt dokiman imigrasyon ki pa nan lis anlè a?
Anplis dokiman ki nan lis anlè a, li ka itil pou w pote lòt dokiman ki gen rapò ak dosye imigrasyon w lan, tankou prèv ki montre aplikasyon azil ou a toujou ap tann yon desizyon – pa egzanp, lèt USCIS voye ba ou pou fè w konnen yo te resevwa aplikasyon w lan (receipt notice) pou azil ou a oswa yon avi pou yon randevou k ap vini nan tribinal imigrasyon.
Ki dokiman mwen ta dwe pote pou montre adrès lakay mwen nan eta a?
Pou pwouve ou rete nan eta a, w ap bezwen pote dokiman ofisyèl ki montre adrès lakay ou ak non konplè ou. Kèk egzanp komen gen ladan bòdwo sèvis piblik resan (tankou bòdwo kouran), kontra lokasyon, ak dosye lekòl ofisyèl.
Anjeneral, se yon bon lide pou w pote plizyè dokiman diferan avèk ou, si yo ta refize kèk ladan yo.
Ki kote pou m ale pou m fè demann pou yon lisans chofè?
Biwo kote w ap fè demann pou yon lisans chofè a rele anjeneral “Department of Motor Vehicles,” oswa “DMV,” men li ka gen yon non ki yon ti jan diferan tou. Tape non eta w la ak “Department of Motor Vehicles” nan yon navigatè entènèt tankou Google pou w jwenn adrès yo ak enfòmasyon ki pi resan yo.
E si mwen pote tout dokiman mwen bezwen yo men yo di m mwen pa ka jwenn yon lisans chofè?
Si ou se yon moun k ap chèche azil ki gen yon pemi travay ki valid epi ou gen tout dokiman yo mande yo, nou rekòmande pou w eseye ankò. Ou ka eseye ale nan yon lòt biwo DMV nan eta w la, oswa menm eseye pale ak yon lòt anplwaye nan menm DMV a.
Kisa ankò mwen bezwen fè, apa pote dokiman yo?
Nan pifò eta yo, pou w resevwa yon lisans chofè, ou bezwen tou:
pase yon tès ekri, ki ka disponib nan plizyè lang
pase yon tès kondwi, ki ka mande pou w pote yon machin
pase yon tès vizyon
peye yon frè
Ka gen lòt kondisyon tou, epi ou ta dwe tcheke sit entènèt eta w la!
Èske mwen kapa b kondwi nan yon lòt eta ak lisans chofè mwen an?
Ou kapab kondwi nan nenpòt eta Ozetazini ak yon lisans chofè REAL ID ki valid.
Men, si ou gen yon lisans chofè ki pa yon REAL ID, yo ka pa aksepte l nan Florida, New Hampshire, Tennessee, ak Wyoming. Si ou gen youn, konsidere pale ak yon avoka anvan ou kondwi nan eta sa yo.
Mwen gen tout dokiman yo, men mwen pa kondwi. Èske mwen ka toujou jwenn yon kat idantite eta a?
Si ou pa vle kondwi oswa si ou pa pare pou w pran tès lisans chofè yo, men ou vle yon kat idantite eta a toujou, ou ka eseye aplike pou yon kat idantite eta a pito. Pifò eta mande dokiman ki sanble pou kat idantite eta a ak lisans chofè. An jeneral, ou ka aplike pou yon kat idantite eta a nan menm biwo kote ou aplike pou yon lisans chofè a.
Èske mwen ka jwenn yon lisans chofè REAL ID?
Wi. Nan Tennessee, ou ka aplike pou yon lisans chofè REAL ID ak menm dokiman ki nan lis pi wo a.
Tanpri pran nòt: Apati 7 me 2025, granmoun ki gen 18 an oswa plis ap bezwen yon idantite ki satisfè kondisyon REAL ID pou yo vwayaje nan avyon Ozetazini. Pa egzanp, ou ka sèvi ak yon kat pemi travay, yon paspò Etazini oswa yon lòt peyi, oswa yon lisans chofè ki konfòm ak REAL ID (sa yo gen yon zetwal nan kwen anwo kat la). Ou ka wè yon lis konplè idantite yo aksepte isit la epi repons pou kesyon moun poze souvan isit la.
Èske mwen ka jwenn yon lisans pou chofè komèsyal (CDL)?
Non. Depi 16 mas 2026, gouvènman ameriken an bloke moun k ap chèche azil ak lòt imigran pou yo pa resevwa nouvo lisans chofè komèsyal, ki se lisans espesyal pou kondwi gwo machin ki lou. Imigran yo ap konteste règ final sa a epi yo depoze yon pouswit lajistis. Ou ka jwenn plis enfòmasyon isit la.
ASAP (Pwojè ki an Defans pou Moun k ap Chèche Azil) vize bay enfòmasyon ki baze sou reyalite konsènan lwa imigrasyon aktyèl yo. Enfòmasyon sa yo se pa konsèy legal.
Tout kontni legal se ekip avoka ekspè nan imigrasyon ASAP la ki ekri li epi ki revize li legalman. Avoka ekspè ASAP yo gen plizyè dizèn ane eksperyans nan lwa imigrasyon ak nan litij. Kolektifman, yo genyen plizyè santèn ka. Avoka nou yo admèt nan Baro nan plizyè eta Ozetazini, yo gen diplòm nan dwa nan inivèsite tankou Harvard, Yale, ak UCLA, epi yo genyen plizyè pri pou travay legal yo.