Se avoka imigrasyon ekspè ASAP yo ki ekri sa · Mizajou
Èske se pa kote ou rete a? Chèche yon lòt eta.
Men kèk enfòmasyon enpòtan:
Moun k ap chèche azil ki gen yon pemi travay ki valid elijib pou yo gen lisans chofè nan North Dakota, sa gen ladan l lisans chofè REAL ID! Li plis enfòmasyon sou kondisyon yo anba a.
Si ou gen yon lòt kalite pemi travay oswa yon lòt kalite estati imigrasyon, ou ka elijib pou yon lisans chofè nan North Dakota. Pou plis enfòmasyon sou règleman yo, klike sou lyen sa a pou paj entènèt North Dakota a, oswa chèche yon òganizasyon lokal pou mande èd.
Si ou pa gen okenn kalite estati imigrasyon, malerezman ou pa elijib pou yon lisans chofè nan North Dakota.
Nan pifò eta yo, pou ou resevwa yon lisans chofè, ou bezwen: pase yon egzamen ekri, pase yon egzamen kondwi, pase yon egzamen vizyon, peye yon frè, epi pote dokiman pou montre ou elijib.
Lisans chofè pou moun k ap chèche azil ki gen pemi travay
Moun k ap chèche azil ki gen pemi travay ki valid elijib pou yo gen lisans chofè nan North Dakota!
W ap bezwen:
yon pemi travay ki valid
yon kat nimewo social security (SSN)
2 dokiman pou montre adrès lakay ou nan North Dakota
Pou plis enfòmasyon sou kondisyon ak frè yo nan North Dakota.
Èske mwen ta dwe pote lòt dokiman imigrasyon ki pa nan lis anlè a?
Anplis kat pemi travay ou a, li ka itil pou ou pote prèv ki montre aplikasyon azil ou a toujou ankou — pa egzanp, lèt USCIS voye ba ou pou fè w konnen yo te resevwa aplikasyon w lan (receipt notice) pou azil ou a oswa yon avi pou yon randevou k ap vini nan tribinal imigrasyon.
Si ou te fè demann pou renouvle pemi travay ou, ou ka pote lèt konfimasyon resepsyon an tou pou aplikasyon renouvèlman an. Si ou te aplike pou renouvle pemi travay ou anvan kat ou genyen kounye a te ekspire, lèt konfimasyon resepsyon ou a se yon prèv ki montre pemi travay ou toujou valid pou 540 jou apre dat ekspirasyon ki ekri sou li a.
Ki dokiman mwen ta dwe pote pou montre adrès lakay mwen nan eta a?
Pou pwouve ou rete nan eta a, w ap bezwen pote dokiman ofisyèl ki montre adrès lakay ou ak non konplè ou. Kèk egzanp komen gen ladan bòdwo sèvis piblik resan (tankou yon bòdwo kouran), kontra lwaye, ak dosye lekòl ofisyèl.
Anjeneral, se yon bon lide pou ou pote plizyè dokiman diferan avèk ou, si yo ta refize kèk ladan yo.
Ki kote pou m ale pou m aplike pou yon lisans chofè?
Biwo kote ou aplike pou yon lisans chofè a anjeneral rele “Department of Motor Vehicles,” oswa “DMV,” men li ka gen yon non ki yon ti jan diferan tou. Tape non eta ou a ak “Department of Motor Vehicles” nan yon navigatè entènèt tankou Google pou jwenn kote yo ye ak enfòmasyon ki pi resan yo.
E si mwen pote tout dokiman mwen bezwen yo men yo di m mwen pa ka jwenn yon lisans chofè?
Si ou se yon moun k ap chèche azil ki gen yon pemi travay ki valid epi ou gen tout dokiman yo mande yo, nou rekòmande pou ou eseye ankò. Ou ka eseye ale nan yon lòt biwo DMV nan eta ou a, oswa menm eseye pale ak yon lòt anplwaye nan menm DMV a.
Kisa mwen bezwen fè ankò, anplis pote dokiman yo?
Nan pifò eta yo, pou ou resevwa yon lisans chofè, ou bezwen tou:
pase yon egzamen ekri, ki ka disponib nan plizyè lang
pase yon egzamen kondwi, ki ka mande pou ou vini ak yon machin
pase yon egzamen vizyon
peye yon frè
Ka gen lòt kondisyon tou, epi ou ta dwe tcheke paj entènèt eta ou a!
Èske mwen kapa b kondi nan yon lòt eta ak lisans kondi mwen an?
Si ou gen yon lisans kondi ki soti nan North Dakota, ou ta dwe kapab sèvi avè l pou w kondi nan nenpòt eta Ozetazini.
Mwen gen tout dokiman yo, men mwen pa kondi. Èske mwen ka toujou jwenn yon kat idantite eta a?
Si ou pa vle kondi oswa si ou pa pare pou w pase tès lisans kondi yo, men ou vle yon kat idantite eta a toujou, ou ka eseye aplike pou yon kat idantite eta a pito. Pifò eta mande menm kalite dokiman pou kat idantite eta a ak pou lisans kondi. An jeneral, ou ka aplike pou yon kat idantite eta a nan menm biwo kote ou aplike pou yon lisans kondi.
Èske mwen ka jwenn yon lisans kondi REAL ID?
Wi. Nan North Dakota, ou ka aplike pou yon lisans kondi REAL ID ak menm dokiman ki nan lis anwo a.
Nòt: Apati 7 me 2025, granmoun ki gen 18 an oswa plis ap bezwen yon idantite ki satisfè egzijans REAL ID pou yo vwayaje nan avyon anndan peyi Etazini. Pa egzanp, ou ka sèvi ak yon kat pemi travay, yon paspò Etazini oswa yon lòt peyi, oswa yon lisans kondi ki konfòm ak REAL ID (sa yo gen yon zetwal nan kwen anwo kat la). Ou ka wè yon lis konplè idantite yo aksepte isit la epi repons pou kesyon moun poze souvan isit la.
Èske mwen ka jwenn yon lisans pou chofè komèsyal (CDL)?
Non. Depi 16 mas 2026, gouvènman ameriken an bloke moun k ap chèche azil ak lòt imigran pou yo pa resevwa nouvo lisans chofè komèsyal, ki se lisans espesyal pou kondi gwo machin ki lou. Imigran yo ap konteste règ final sa a epi yo depoze yon pouswit lajistis. Ou ka jwenn plis enfòmasyon isit la.
ASAP (Pwojè ki an Defans pou Moun k ap Chèche Azil) vize bay enfòmasyon ki baze sou reyalite konsènan lwa imigrasyon aktyèl yo. Enfòmasyon sa yo se pa konsèy legal.
Tout kontni legal se ekip avoka ekspè nan imigrasyon ASAP la ki ekri yo epi ki revize yo legalman. Avoka ekspè ASAP yo gen plizyè dizèn ane eksperyans nan lwa imigrasyon ak nan litij. Ansanm, yo genyen plizyè santèn ka. Avoka nou yo gen lisans pou yo pratike (Bar) nan plizyè eta Ozetazini, yo gen diplòm nan dwa nan inivèsite tankou Harvard, Yale, ak UCLA, epi yo genyen plizyè pri pou travay legal yo fè.