Ekri pa avoka imigrasyon ekspè ASAP yo · Mizajou nan dat
Èske se pa kote ou rete a? Chèche yon lòt eta.
Men kèk enfòmasyon enpòtan:
Moun k ap chèche azil ki gen yon pemi travay ki valid elijib pou yo gen lisans chofè nan Minnesota, sa gen ladan l lisans chofè REAL ID! Li plis enfòmasyon sou kondisyon yo anba a.
Tout lòt imigran elijib tou pou yo gen lisans chofè nan Minnesota – menmsi ou pa gen yon pemi travay oswa okenn estati imigrasyon! Pou plis enfòmasyon sou kondisyon yo, klike sou lyen sa a ki nan paj entènèt Minnesota a epi sou paj òganizasyon United We Dream lan.
Nan pifò eta, pou ou resevwa yon lisans chofè, ou bezwen: pase yon tès ekri, pase yon tès kondwi, pase yon tès vizyon, peye yon frè, epi pote dokiman pou montre ou elijib.
Lisans chofè pou moun k ap chèche azil ki gen pemi travay
Moun k ap chèche azil ki gen pemi travay ki valid elijib pou yo gen lisans chofè nan Minnesota!
W ap bezwen:
yon pemi travay ki valid
yon nimewo social security (SSN)
yon adrès kote w rete nan Minnesota. Si ou vle aplike pou yon lisans chofè REAL ID, w ap bezwen 2 dokiman pou montre adrès kote w rete a.
Pou plis enfòmasyon sou kondisyon yo ak frè yo, klike sou lyen sa a pou Minnesota.
Èske mwen dwe pote lòt dokiman imigrasyon ki pa nan lis anlè a?
Anplis kat pemi travay ou a, li ka itil pou w pote prèv ki montre aplikasyon azil ou a ap tann toujou – pa egzanp, lèt USCIS voye ba ou pou fè w konnen yo te resevwa aplikasyon w lan (receipt notice) pou azil la oswa yon avi pou yon randevou k ap vini nan tribinal imigrasyon.
Si ou te aplike pou renouvle pemi travay ou, ou ka pote lèt konfimasyon resepsyon an tou pou aplikasyon renouvèlman w lan. Si ou te aplike pou renouvle pemi travay ou anvan kat ou genyen kounye a te ekspire, lèt konfimasyon resepsyon w lan se yon prèv ki montre pemi travay ou a valid toujou pou 540 jou apre dat ekspirasyon ki ekri sou li a.
Ki dokiman mwen dwe pote pou montre adrès kote m rete nan eta a?
Pou pwouve ou rete nan eta a, w ap bezwen pote dokiman ofisyèl ki montre adrès kote w rete a ak non konplè w. Kèk egzanp ki kouran se bòdwo sèvis piblik resan (tankou yon bòdwo kouran), kontra lwaye, ak dosye lekòl ofisyèl.
An jeneral, se yon bon lide pou w pote plizyè dokiman diferan avèk ou, si yo ta refize kèk ladan yo.
Ki kote pou m ale pou m aplike pou yon lisans chofè?
Biwo kote w aplike pou yon lisans chofè a rele an jeneral “Department of Motor Vehicles,” oswa “DMV,” men li ka gen yon non ki yon ti jan diferan tou. Tape non eta w la ak “Department of Motor Vehicles” nan yon navigatè entènèt tankou Google pou w jwenn adrès yo ak enfòmasyon ki pi resan yo.
E si mwen pote tout dokiman mwen bezwen yo men yo di m mwen pa ka jwenn yon lisans chofè?
Si ou se yon moun k ap chèche azil ki gen yon pemi travay ki valid epi ou gen tout dokiman yo mande yo, nou rekòmande pou w eseye ankò. Ou ka eseye ale nan yon lòt biwo DMV nan eta w la, oswa menm eseye pale ak yon lòt anplwaye nan menm DMV a.
Kisa pou m fè ankò, anplis pote dokiman yo?
Nan pifò eta, pou w resevwa yon lisans chofè, ou bezwen tou:
pase yon tès ekri, ki ka disponib nan plizyè lang
pase yon tès kondwi, ki ka mande pou w vini ak yon machin
pase yon tès vizyon
peye yon frè
Ka gen lòt kondisyon tou, epi ou ta dwe tcheke paj entènèt eta w la!
Èske mwen kapa b kondui nan yon lòt eta ak lisans mwen an?
An jeneral, ou kapa b kondui nan yon lòt eta Ozetazini ak yon lisans nenpòt lòt eta. Men, gen kèk eksepsyon. Florid ak Wyoming ka pa aksepte lisans estanda ki soti nan Minnesota ki make “Not for Federal Identification” (Pa pou Idantifikasyon Federal). Si ou gen plan pou kondui nan Florid oswa Wyoming, ou ka vle pale ak yon avoka anvan. Jwenn yon avoka isit la.
Mwen gen tout dokiman yo, men mwen pa kondui. Èske mwen ka toujou jwenn yon kat idantite eta a?
Si ou pa vle kondui oswa si ou pa pare pou pase tès lisans yo, men ou vle yon kat idantite eta a toujou, ou ka eseye aplike pou yon kat idantite eta a pito. Pifò eta mande menm kalite dokiman pou kat idantite ak pou lisans. An jeneral, ou ka aplike pou yon kat idantite nan menm biwo kote ou aplike pou yon lisans lan.
Èske mwen ka jwenn yon lisans REAL ID?
Wi. Nan Minnesota, ou ka aplike pou yon lisans REAL ID (REAL ID) ak dokiman sa yo:
yon pemi travay ki valid
yon kat nimewo social security (SSN)
2 dokiman ki montre adrès lakay ou nan Minnesota
Pou plis enfòmasyo, klike sou lyen sa.
Remak: Apati 7 me 2025, granmoun ki gen 18 an oswa plis ap bezwen yon idantite ki satisfè egzijans REAL ID pou yo vwayaje nan avyon anndan peyi Etazini. Pa egzanp, ou ka sèvi ak yon kat pemi travay, yon paspò Etazini oswa yon lòt peyi, oswa yon lisans ki konfòm ak REAL ID (sa yo gen yon zetwal nan kwen anwo kat la). Ou ka wè yon lis konplè idantite yo aksepte isit la epi repons pou keksyon moun poze souvan isit la.
Èske mwen ka jwenn yon lisans pou chofè komèsyal (CDL)?
Non. Depi 16 mas 2026, gouvènman ameriken an bloke moun k ap chèche azil ak lòt imigran pou yo pa resevwa nouvo lisans pou chofè komèsyal, ki se lisans espesyal pou kondui gwo machin ki lou. Imigran yo ap konteste règ final sa a epi yo depoze yon pouswit lajistis. Ou ka jwenn plis enfòmasyon isit la.
ASAP (Pwojè ki an Defans pou Moun k ap Chèche Azil) gen kòm objektif pou bay enfòmasyon ki baze sou reyalite konsènan lwa imigrasyon aktyèl yo. Enfòmasyon sa yo pa konsèy legal.
Tout kontni legal se ekip avoka ekspè nan imigrasyon ASAP la ki ekri yo epi revize yo. Avoka ekspè ASAP yo gen plizyè dizèn ane eksperyans nan lwa imigrasyon ak nan litij. Ansanm, yo genyen plizyè santèn ka. Avoka nou yo gen lisans pou pratike nan plizyè eta Ozetazini, yo gen diplòm nan dwa nan inivèsite tankou Harvard, Yale, ak UCLA, epi yo genyen plizyè pri pou travay legal yo fè.